کراچی :  وزارت داخلہ نے سندھ حکومت کی جانب سے رینجرز کو دیئے گئے مشروط اختیارات اور تجاویز کو مسترد کرتے ہوئے اسے انسداد دہشت گردی کے قانون کے منافی قرار دے دیا۔

تفصیلات کے مطابق رینجرز اختیارات پر وفاق اور صوبے میں ایک بار پھر ٹھن گئی ہے اور صوبہ سندھ کی جانب سے رینجرز کو دیئے گئے مخصوص لیکن مشروط اختیارات کو وفاقی وزارت داخلہ نے مسترد کرتے ہوئے اسے آئین کے منافی قرار دیا ہے۔

وزارت داخلہ کی جانب سے جاری کردہ نوٹی فکیشن کے مطابق رینجرز کو اختیارات اے ٹی اے 1997 کے تحت تفویض کیے گئے جس کے بعد رینجرز کے قیام میں 90 روز کی توسیع کی گئی جب کہ مخصوص شرائط کے ساتھ رینجرز کو اختیارات دینے کی سندھ حکومت کی تجویز کو مسترد کردیا گیا ہے۔

 وزارت داخلہ کا موقف ہے کہ انسداد دہشت گردی قانون پر کسی قسم کی قدغن نہیں لگائی جا سکتی اور نہ ہی اس قانون کی متعلقہ شقوں کو جزوی طورپرعلیحدہ یا بدلا جا سکتا ہے اس لیے صوبائی حکومت کی سفارشات کا قانون کے دائرہ کار میں ہونا ضروری ہے اوررینجرزاختیارات کے سلسلے میں تجاویزمتعلقہ قانون کے زمرے میں نہیں آتیں۔

واضح رہے کہ وزارت داخلہ کی جانب سے جاری مراسلے میں رینجرز اختیارات سے متعلق سندھ حکومت کی تجویز کردہ شرائط کو نوٹی فکیشن کا حصہ نہیں بنایا گیا بلکہ رینجرز کو پرانے اختیارات غیرمشروط طور پرتفویض کردیے گئے ہیں جس سے محسوس ہوتا ہے کہ ایک مرتبہ پھر رینجرز کے مخصوص اختیارات پروفاق اور سندھ حکومت آمنے سامنے آگئی ہیں۔

واضح رہے رینجرز کو تین ماہ کے لیے انسداد دہشت گردی کے قانون کے تحت خصوصی اختیارات دیے جاتے ہیں تا ہم جب سے سندھ حکومت اور ان کے رفقاء کے خلاف کارروائیوں کا آغاز ہوا ہے تب سے سندھ حکومت رینجرزاختیارات کی معیاد پوری ہونے کے باوجود توسیع میں حجت سے کام لیتی آئی ہے۔

تاہم اس بارسندھ کابینہ میں مرتب کی گئی سفارشات کی بنیاد پر رینجرز کو محدود اختیارات دینے کا عندیہ دیا گیا اور انسداد دہشت گردی کے قانون کے کچھ جز کو معطل کرنے کی سفارش کی گئی تھی جسے وفاقی وزارت داخلہ نے مسترد کردیا گیا ہے۔

کراچی : جامعہ بنوریہ کے مہتمم اعلیٰ مفتی نعیم نے کہا ہے کہ اگر سندھ حکومت نے رینجرز اختیارات میں توسیع نہیں کی گئی تو تاجر برادری کے ساتھ مل کر بھر پور احتجاج کیا جائے گا۔

مفتی نعیم نے کراچی میں پریس کانفرنس کرتے ہوئے کہا کہ کراچی میں  امن و امان فوج، رینجرز اور پولیس کی کوششوں سے بحال ہوا ہے جس کے لیے رینجرز کے سپاہیوں نے شہادتیں بھی دیں اور کئی زخمی بھی ہوئے جس کے بعد کراچی کی روشنیاں بحال ہوئیں

*بغیر اختیارات کے رینجرز کو چوراہوں پر کھڑا نہیں کر سکتے، چوہدری نثار

انہوں نے کہا کہ مجھے رات بھر تاجروں کے فون آتے رہے ہیں جن کا کہنا تھا کہ رینجرز کے آپریشن کے باعث ہم آزادانہ اور بے خوف کاروبار کرنے کے قابل ہوئے ہیں اور اگر سندھ حکومت نے رینجرز کو اختیارات نہیں دیئے تو ہم اپنا کاروبار بند کر دیں گے یاپھر کہیں اور منتقل ہوجائیں گے۔

*مزید انتظار نہیں کیا جائے گا، رینجرز کو اختیارات آج ہی دیئے جائیں، مصطفی کمال

معروف مذہبی شخصیت مفتی نعیم کا کہنا تھا کہ تاجروں کی گواہی ایک طرف میں بھی کراچی کا شہری ہونے کی حیثیت سے دیکھتا ہوں کہ رینجرز کی کارروائیوں کے باعث شہر میں امن قائم ہوا ہے اس لیے مطالبہ کرتے ہیں کہ حکومت سندھ فی الفور رینجرز اختیارات میں توسیع کرے ورنہ تاجر براداری کے ساتھ مل کر بھرپوراحتجاج کریں گے۔

رینجرز اختیارات، فیصلہ کابینہ اجلاس میں کیا جائے گا*

دوسری جانب سندھ حکومت 15 اپریل سے رینجرز کو حاصل خصوصی اختیارات کی معیاد ختم ہونے کے بعد  دوبارہ  تو سیع کرنے میں جلد بازی سے کام نہیں لینا چاہتی اور آج وزیر اعلیٰ سندھ نے ایک اہم میٹنگ کے بعد یہ معاملہ سندھ کابینہ کے اجلاس میں لے جانے کا فیصلہ کیا ہے۔

دریں اثناء صحافیوں سے گفتگو کرتے ہوئے مفتی نعیم نے مطالبہ کیا کہ مشال قتل جیسے واقعات کو روکنےکے لیےقانون سازی کی جائے اور بے بنیاد الزام لگانے والوں کے خلاف سخت سے سخت قانون وضع کیے جائیں کیوں کہ توہین رسالت کا الزام ثابت کیے بغیر کسی کو قتل کرنا جائزنہیں بلکہ بذات خود یہ اقدام اہانت مذہب سے زیادہ بڑا جرم ہے۔

کراچی : سندھ حکومت نے رینجرز اختیارات کا معاملہ کابینہ میں لے جانے کا فیصلہ کیا ہے جو 21 اپریل کو بلائے جانے کا امکان ہے جہاں پنجاب میں رینجرز کو حاصل اختیارات کی بنیاد پر فیصلہ کیا جائے گا۔

اے آر وائی نیوز کے رپورٹر ارباب چانڈیو کے مطابق یہ فیصلہ وزیر اعلیٰ سندھ سید مراد علی شاہ کی زیر صدارت آج ہونے والے اجلاس میں کیا گیا جس میں سیکرٹری قانون سمیت اعلیٰ حکام نے شرکت کی اور وزیراعلیٰ کو اس آئینی اور قانونی معاملے بریفنگ بھی دی گئی۔

ذرائع کے مطابق وزیراعلیٰ سندھ سید مراد علی شاہ رینجرز اختیارات کے معاملے کو اپنی کابینہ میں زیر بحث لانا چاہتے ہیں اورمتفقہ طور پر کوئی لائحہ عمل طے کرنا چاہتے ہیں۔

صوبائی وزیر قانون سندھ ضیاءالحسن لنجار نے رینجرز اختیارات کا معاملہ سندھ کابینہ اجلاس میں لے جانے کی تصدیق کرتے ہوئے کہا کہ آئیں کے تحت رینجرز اختیارات پر سندھ حکومت مشاورت کر سکتی ہے جس سے مراد سندھ کابینہ ہی ہے اس لیے کابینہ اس معاملے پر جو فیصلہ دے گی اس پر عمل کیا جائے گا۔

خیال ظاہر کیا جا رہا ہے کہ سندھ میں رینجرز کو اختیارات پنجاب کی طرح پر تفویض کیے جائیں گے اور اس سلسلے میں پنجاب حکومت نے جو نوٹیفیکیشن جاری کیا اس سے استفادہ کیا جائے گا اور پنجاب میں حاصل اختیارات سندھ میں بھی دیئے جائیں گے۔

اے آر وائی نیوز کے رپورٹرارباب چانڈیو کا کہنا ہے کہ سانگھڑ میں ضمنی انتخاب ہونے جا رہے ہیں جہاں سندھ کے وزراء مصروف ہیں اس لیے سندھ کابینہ کا اجلاس 21 اپریل کو بلایا جائے گا اور رینجرز اختیارات پر حتمی فیصلہ کیا جائے گا۔

خیال رہے کہ سندھ میں رینجرز کو حاصل خصوصی اختیارات کی معیاد 15 اپریل کو ختم ہو چکی ہے اور سندھ حکومت کی جانب سے ابھی تک توسیع نہیں کی گئی ہے اس سلسلے میں وزیر اعلیٰ سندھ کی صدارت میں ہونے والے اجلاس میں بھی کوئی فیصلہ نہیں ہوسکا اور اب یہ معاملہ سندھ کابینہ میں زیر بحث لایا جائے گا۔

کراچی : چیئرمین پاک سرزمین پارٹی مصطفیٰ کمال نے کہا ہے کہ رینجرز کے اختیارات پر سیاست انتہائی حساس معاملہ ہے اور اس میں کسی بھی کسی قسم کی سیاسی مداخلت برسوں کی محنت پر پانی پھیر دے گی۔

چیئرمین مصطفی کمال نے میڈیا سے بات کرتے ہوئے کہا کہ اس سے قبل سیاسی مداخلت کرکے پولیس کے ادارے کو برباد کردیا گیا جس کا نتیجہ یہ نکلا کہ پولیس امن عامہ کے قیام کے اولین فرض کو نبھانے کے قابل نہیں رہی جس خمیازہ کراچی کے عوام نے بھگتا۔

*کراچی : رینجرز اختیارات ختم ہوئے 60گھنٹے گزر گئے

انہوں نے کہا کہ رینجرز کے سپاہیوں نے اپنی جانوں پر کھیل کر شہر میں امن قائم کیا لیکن اقتدار کے بھوکوں کو شاید یہ پسند نہیں آیا اس لیے ہر تین ماہ بعد رینجرز کے اختیارات کی معیاد پوری ہونے کے بعد اس
معاملے کو پچیدہ اور حساس بنا دیا جاتا ہے جس سے سندھ حکومت کی سنجیدگی کا اندازہ لگایا جا سکتا ہے۔

*اختیارات ختم،چوکیاں خالی،آپریشن نہیں کرسکتے،سندھ رینجرز

مصطفیٰ کمال کا کہنا تھا کہ رینجرز اختیارات پر سیاست کرکے عوام کی سیکیورٹی سے کھیلا جارہا ہے اس لیے سندھ حکومت سے مطالبہ کرتے ہیں کہ رینجرز اختیارات کامعاملہ آج ہی حل کیا جائے اور اختیارات نہ دیئے گئے تو دہشت گرد اپنی کارروائیوں کے لیے آزاد ہوجائیں گے اور اگر کوئی واقعہ ہوا تو وزیراعلٰی سندھ ذمے دار ہوں گے۔