پشاور: سول سوسائٹی اور اسکول کے بچوں نے دوسرے روز بھی ریڈیو پاکستان پشاور کا دورہ کیا۔
تفصیلات کے مطابق شرپسندوں کے ہاتھوں جلنے کے بعد ریڈیو پاکستان پشاور کو عوام کے لیے دوبارہ کھول دیا گیا ہے، دوسرے روز بھی سول سوسائٹی اور اسکولوں کے بچوں نے عمارت کا دورہ کیا۔
طلبہ کا تعلق شہر کے مختلف اسکولوں سے تھا، سوسائٹی کی خواتین نے بھی ریڈیو پاکستان کی جلی ہوئی عمارت کے مختلف حصوں کا دورہ کیا، عملے نے ان کو 9 اور 10 مئی کو ہونے والے واقعے کی تفصیلات بھی بتائیں۔
سول سوسائٹی کی خواتین اور بچوں نے شر پسندوں کی طرف سے سرکاری اور غیر سرکاری املاک کو نقصان پہنچانے پر شدید غم اور غصے کا اظہار کیا، انھوں نے کہا کہ سیاست کی آڑ میں املاک کو نقصان پہنچانا غیر مناسب اور شرمناک ہے۔
اس موقع پر اسکول کے طلبہ نے عہد کیا کہ وہ اس قوم کی آواز بنیں گے۔
