ARYNews.tv | Urdu – Har Lamha Bakhabar

Tag: ریڈ بک

  • لیبیا کشتی حادثے میں ملوث ریڈ بک کا بدنام زمانہ اشتہاری ملزم گرفتار

    لیبیا کشتی حادثے میں ملوث ریڈ بک کا بدنام زمانہ اشتہاری ملزم گرفتار

    ایف آئی اے گجرانوالہ زون نے بڑی کارروائی کرتے ہوئے لیبیا کشتی حادثے میں ملوث ریڈ بک کے بدنام زمانہ اشتہاری ملزم کو گرفتار کرلیا۔

      ایف آئی اے کے مطابق اشتہاری ملزم بشیر احمد کے خلاف 10 سے زائد مقدمات درج تھے، ملزم کے خلاف کمپوزٹ سرکل گجرات نے سال 2022 میں مقدمات درج کئے۔

    ایف آئی اے حکام کا کہنا ہے کہ ملزم کا نام ریڈ بک کے انتہائی مطلوب افراد کی فہرست میں شامل ہے، گرفتار ملزم نے متاثرین کو یورپ بھجوانے کے نام کروڑوں روپے ہتھیائے، ملزم نے 12 متاثرین سے فی کس 18 لاکھ روپے وصول کئے تھے۔

    حکام کا کہنا ہے کہ ملزم نے گینگ کے دیگر ملزمان کی مدد سے متاثرین کو غیر قانونی طور پر نائیجریا اور لیبیا میں محصور رکھا، ملزم نے متاثرین کو کشتی کے ذریعے لیبیا سے اٹلی بھجوانے کی کوشش کی، کشتی حادثے میں متاثرہ شہریوں کی موت واقع ہوئی۔

    ایف آئی اے کا کہنا ہے کہ ملزم کو جدید ٹیکنالوجی کو بروئے کار لاتے ہوئے حافظ آباد سے گرفتار کیا گیا ملزم کو گرفتار کر کے تفتیش کا آغاز کر دیا گیا دیگر ملزمان کی گرفتاری کے لئے چھاپے مارے جا رہے ہیں۔

  • ریڈ بک میں شامل انتہائی مطلوب انسانی اسمگلر سمیت 3 ملزمان گرفتار

    ریڈ بک میں شامل انتہائی مطلوب انسانی اسمگلر سمیت 3 ملزمان گرفتار

    لاہور: ایف آئی اے نے ریڈ بک میں شامل انتہائی مطلوب انسانی اسمگلر سمیت 3 ملزمان کو گرفتار کرلیا۔

    تفصیلات کے مطابق ایف آئی اے نے مختلف علاقوں میں کارروائی کرتے ہوئے ریڈ بک کے انتہائی مطلوب انسانی اسمگلر سمیت 3 ملزمان کو گرفتار کرلیا، گرفتار ملزمان میں محمد اکبر، محمد ظہیر اور آمنہ ہاشمی شامل ہیں۔

    ایف آئی اے ترجمان کے مطابق ریڈ بک کے انتہائی مطلوب ملزم محمد اکبر کیخلاف 7 سے زائد مقدمات درج تھے، ملزم نے شہریوں کو بیرون ملک ملازمت کا جھانسہ دے کر لاکھوں روپے لیے تھے۔

    ترجمان کا کہنا ہے کہ اشتہاری ملزم محمد ظہیر نے پرتگال بھجوانے کے نام 88 لاکھ روپے ہتھیائے، اشتہاری ملزمہ  نے شہری کو یو اے ای ملازمت کی غرض سے بھجوانے کیلئے 2 لاکھ روپے لیے۔

    ایف آئی اے ترجمان کا کہنا ہے کہ گرفتار ملزمان متاثرین سے رقم وصول کرنے کے بعد روپوش ہو گئے تھے۔

    ریڈ بک کیا ہے اور اس میں کون لوگ شامل کیے جاتے ہیں؟

    ریڈ بک ایک سرکاری دستاویز ہے جس میں ان خواتین و حضرات کے نام شامل کیے جاتے ہیں جو پولیس، سی ٹی ڈی یا دیگر ایجنسیز کو انتہائی مطلوب ہوں۔

    رپورٹ کے مطابق ریڈ بک میں کسی شدت پسند کا نام شامل کرنے کا مقصد پولیس، مختلف ایجنسیز اور عوام الناس کو آگاہی فراہم کرنا ہوتا ہے کہ یہ لوگ کتنے خطرناک ہیں اور ریڈ بک میں شامل ہونے کے بعد ان کی گرفتاری میں آسانی ہوتی ہے۔

  • سنگین مقدمات مطلوب دہشت گردوں کی ریڈ بک تیار

    سنگین مقدمات مطلوب دہشت گردوں کی ریڈ بک تیار

    اسلام آباد: ایف آئی اے، وفاقی اور صوبائی پولیس کو سنگین مقدمات میں مطلوب دہشت گردوں کی ریڈ بک تیار کر لی گئی۔

    تفصیلات کے مطابق وفاقی تحقیقاتی ادارے کی کاؤنٹر ٹیررازم وِنگ نے انتہائی مطلوب دہشت گردوں پر مبنی ریڈ بک تیار کی ہے، جس میں کہا گیا ہے کہ ایف آئی اے کو 45، اسلام آباد پولیس کو 33 دہشت گرد مطلوب ہیں۔

    گلگت بلتستان کو 20، خیبر پختون خوا پولیس کو 850 دہشت گرد، بلوچستان پولیس کو 127، سندھ کو 138 دہشت گرد، اور ملک کے سب سے بڑے صوبے پنجاب کو 118 دہشت گرد مطلوب ہیں۔

    ایف آئی اے نے مجموعی طور پر انتہائی مطلوب 1331 دہشت گردوں کی سالانہ ریڈ بک جاری کی ہے، ان مطلوب دہشت گردوں میں ٹی ٹی پی کمانڈر مولانا صدر حیات کے سر کی قیمت 80 لاکھ مقرر کی گئی ہے۔

    ریڈ لسٹ میں شامل دہشت گردوں نور زیب خان کے سر کی قیمت چالیس لاکھ، انعام اللہ اور نعمت اللہ کے سر کی قیمت بھی چالیس چالیس لاکھ مقرر کی گئی ہے۔

    دہشت گرد ضیاء اللہ خان، محمد سعید، قیصر خان، ثاقب رحمٰن، اور ٹی ٹی پی ٹارگٹ کلر یاسر کے سر کی قمیت تیس لاکھ مقرر کی گئی ہے۔

  • گوجرانوالہ میں دو مبینہ دہشت گردوں کی ہلاکت کا مقدمہ درج

    گوجرانوالہ میں دو مبینہ دہشت گردوں کی ہلاکت کا مقدمہ درج

    گوجرانوالہ: گزشتہ روز گوجرانوالہ میں 2 مبینہ دہشت گردوں کی ہلاکت کا مقدمہ درج کر لیا گیا ہے، ہلاک ملزمان ریڈ بک میں شامل تھے۔

    تفصیلات کے مطابق کاؤنٹر ٹیرر ازم ڈیپارٹمنٹ کے ہاتھوں ہلاک دو مبینہ دہشت گردوں کی ہلاکت کا مقدمہ درج کر لیا گیا، دہشت گردوں نے خود کش جیکٹس پہن رکھی تھیں۔

    [bs-quote quote=”ملزمان حساس اداروں پر حملوں کے علاوہ اغوا اور قتل کی وارداتوں میں ملوث تھے۔” style=”style-7″ align=”left” color=”#dd3333″][/bs-quote]

    ایف آئی آر کے مطابق ہلاک دہشت گرد کاشف اور عبد الرحمان ریڈ بک کے ملزم تھے۔

    ایف آئی آر میں کہا گیا ہے کہ گاڑی روکنے پر ملزمان نے فائرنگ کی اور اپنی گاڑی کو دھماکے سے اڑا دیا، نا معلوم ڈرائیور موقع سے فرار ہوگیا۔

    ایف آئی آر کے مطابق ملزمان حساس اداروں پر حملوں کے علاوہ اغوا اور قتل کی وارداتوں میں ملوث تھے۔

    خیال رہے کہ گزشتہ روز گوجرانوالہ میں مارے گئے دہشت گردوں کے بارے میں کہا گیا تھا کہ ان میں سے ایک جسٹس (ر) تصدق جیلانی کے بھتیجے کے قتل میں بھی ملوث تھا۔

    یہ بھی پڑھیں:  گوجرانوالہ: سی ٹی ڈی کا ایک اور مقابلہ، 2 مبینہ دہشت گرد ہلاک

    واضح رہے کہ گزشتہ روز انسدادِ دہشت گردی کے مبینہ جعلی مقابلے میں دو خواتین سمیت 4 افراد کو زندگیوں سے محروم کیا گیا، گاڑی میں موجود ایک بچہ بھی زخمی ہوا، عینی شاہدین اور سی ٹی ڈی اہل کاروں‌ کے بنایات میں واضح تضادات ہیں۔

  • ریڈ بک میں شامل انتہائی مطلوب انسانی اسمگلر گرفتار

    ریڈ بک میں شامل انتہائی مطلوب انسانی اسمگلر گرفتار

    کراچی: ایف آئی اے انسداد انسانی اسمگلنگ سیل نے منڈی بہا الدین میں کارروائی کرتے ہوئے ریڈبک میں شامل انتہائی مطلوب ملزم بشیر احمد کو گرفتار کرلیا۔

    ترجمان ایف آئی اے کے مطابق ملزم بشیر احمد کی گرفتاری کے لیے ٹیم تشکیل دی گئی تھی، ملزم انسانی اسمگلنگ کے مقدمات میں انتہائی مطلوب ہے۔

    ترجمان کے مطابق ملزم کا نام ریڈ بک کے سیریل نمبر 74 میں موجود ہے، گرفتار ملزم کے خلاف ایف آئی اے میں 2 مقدمات درج تھے، ملزم کی گرفتاری پر 2 لاکھ کا انعام بھی مقرر کیا گیا ہے۔