فیصل آباد: حساس اداروں نے وزیر داخلہ رانا ثنااللہ اور ریکروٹمنٹ ٹریننگ سینٹر پر حملہ آوروں کی شناخت کرلی۔
چیئرمین پی ٹی آئی عمران خان کی گرفتاری کے خلاف مظاہرہ کرتے ہوئے پی ٹی آئی کارکنوں کی بڑی تعداد رانا ثنا اللہ کے گھر کے باہر جمع ہوگئی اور گھر پر پتھراؤ کیا ۔
اس موقع پر پولیس کی جانب سے کارکنوں کو منتشر کرنے کے لیے لاٹھی چارچ بھی کیا۔
تاہم اب پولیس کا کہنا ہے کہ حساس اداروں نے وزیر داخلہ اورریکروٹمنٹ ٹریننگ سینٹر پر 73 حملہ آوروں کی شناخت کرلی ہے۔
فیصل آباد پولیس کا کہنا ہے کہ وزیر داخلہ رانا ثنااللہ کے گھر پر حملہ کرنے والے 23 افرادکی شناخت مکمل ہوگئی ہے اور ریکروٹمنٹ ٹریننگ سینٹر پر حملہ کرنے والے 50 سے زائد افراد کا ڈیٹا اکٹھا کر لیاگیا۔
پولیس کا کہنا ہے کہ تمام حملہ آوروں کا ڈیٹا متعلقہ تھانوں کو ایڈرس اور تصاویر کے ساتھ فراہم کر دیاگیا، حملہ آوروں میں صدر ویسٹ ریجن پنجاب فیض اللہ کموکا، پی ٹی آئی رہنما اسرار احمد اور حامد رضا شامل ہیں۔
پولیس نے بتایا کہ سابق ایم پی اے فردوس رائے، صدر یوتھ ونگ یعقوب راسم سمیت 100 سے زائد افراد اس حملے میں شامل تھے۔
پولیس کا مزید کہنا تھا کہ 9 مئی واقعے پر تھانہ سمن آباد، سول لائن میں 600 ملزمان کیخلاف دہشتگردی دفعات کے تحت مقدمات درج ہیں، شناخت کیے جانے والےحملہ آوروں کیخلاف آج سے باقاعدہ کارروائی کا آغازکر دیا جائے گا۔