اسلام آباد: پاکستان پیپلز پارٹی کی جانب سے خیبر پختون خوا سے اے این پی کی بڑی وکٹ گرانے کی تیاریاں جاری ہیں، باچا خان کے پیروکار سینئر سیاست دان زاہد خان نے اے این پی کو خیرباد کہنے کا فیصلہ کر لیا ہے۔
ذرائع کے مطابق پیپلز پارٹی نے عوامی نیشنل پارٹی کے مرکزی ترجمان زاہد خان سے رابطے شروع کر دیے ہیں، پی پی کی جانب سے زاہد خان کی پارٹی میں شمولیت کے لیے بھرپور کوششیں جاری ہیں۔
ذرائع نے دعویٰ کیا ہے کہ زاہد خان سے پیپلز پارٹی میں شمولیت کے لیے معاملات حتمی مراحل میں ہیں، اور ان کی پیپلز پارٹی میں شمولیت جلد متوقع ہے، پی پی کی جانب سے زاہد خان کو شمولیت کی باضابطہ دعوت بھی دے دی گئی ہے۔
پی پی قیادت نے زاہد خان سے رابطوں کی ذمہ داری محمد علی باچا کو دی، محمد علی باچا وزیر مملکت آبی وسائل، صدر پی پی خیبر پختونخوا ہیں، قیادت سے گرین سگنل ملنے کے بعد انھوں نے زاہد خان کو پی پی میں شمولیت کی دعوت دی۔
ذرائع پیپلز پارٹی کا کہنا ہے کہ زاہد خان سے پارٹی شمولیت کے لیے معاملات طے کیے جا رہے ہیں، بتایا جا رہا ہے کہ زاہد خان کو پارٹی عہدہ، قومی یا صوبائی اسمبلی ٹکٹ کی پیشکش کی گئی ہے، زاہد خان سے پیپلز پارٹی کے وفود کی دو ملاقاتیں بھی ہو چکی ہیں، وفد جلد زاہد خان سے دوبارہ ملاقات کرے گا۔
پی پی ذرائع کے مطابق زاہد خان اے این پی قیادت کے رویے سے شدید دلبرداشتہ ہیں، طویل عرصے سے ان کے اے این پی قیادت سے رابطہ بھی منقطع ہے، اسفندیار ولی خان کے غیر فعال ہونے پر زاہد خان کو پارٹی میں کارنر کر دیا گیا تھا، انھیں طویل عرصے سے پارٹی اجلاسوں میں بھی نہیں بلایا جا رہا۔
واضح رہے کہ زاہد خان عوامی نیشنل پارٹی کے ٹکٹ پر دو بار سینیٹ کے رکن رہ چکے ہیں، وہ 1990 سے اے این پی کے مرکزی سیکریٹری اطلاعات ہیں، زاہد خان کا تعلق خیبر پختون خوا کے ضلع لوئر دیر سے ہے، مسلم لیگ ن بھی زاہد خان کو پارٹی میں شمولیت کی دعوت دے چکی ہے۔
