زلزلہ ایک ایسی آفت ہے جس سے ہر کوئی پناہ مانگتا ہے، دنیا کے بیشتر ممالک بشمول پاکستان بھی ایسے خطرناک زلزلوں سے متاثر ہوچکا ہے جس کے سبب ہزاروں افراد اپنی زندگیوں سے محروم ہوچکے ہیں، زلزلے اپنے ساتھ تباہی کی ایک نہ ختم ہونے والی داستان لاتے ہیں، عام طور پر لوگ اس ناگہانی آفت کو بھی بھول جاتے ہیں مگر جو افراد زلزلوں کی ہولناکیوں سے متاثر ہوچکے ہوتے ہیں یا اپنے پیاروں سے محروم ہوچکے ہوتے ہیں، ان کے لئے اپنی بقیہ زندگی گزارنا ایک ڈراؤ نے خواب کی مانند ہوتا ہے۔
اکثر و بیشتر دیکھا گیا ہے کہ بڑے زلزلے آنے سے قبل معمولی جھٹکے بھی محسوس ہوتے ہیں، انہیں Fore Shocks کہتے ہیں، مگر جب بڑا زلزلہ آکر ختم ہوجاتا ہے تو اس کے اثرات کے طور پر چھوٹے چھوٹے زلزلے آنے کا سلسلہ جاری رہتا ہے، جنہیں ہم ”آفٹر شاکس“ بھی کہتے ہیں۔ زلزلوں کے متعلق قرآن مجید میں اللہ رب العزت کا واضح فرمان موجود ہے کہ وہ زلزلہ پوری زمین کو ہلا کر رکھ دے گا، سورہ زلزال میں اللہ تعالی کا ارشاد ہے: ”جب زمین اپنی پوری شدت کے ساتھ ہلادی جائے گی اور زمین اپنے اندر کے سارے بوجھ نکال کر باہر ڈال دے گی“۔
بہرحال اگر ہم سال 2023 میں آنے والے زلزلوں کی اگر بات کریں تو بہت سے ایسے زلزلے بھی آئے جنہوں نے پوری بستیاں اجاڑدیں۔ ترکی اور شام میں آنے والے تباہ کن زلزلوں نے سب سے زیادہ قیامت خیز تباہی مچائی، جس کے سبب بہت زیادہ جانی اور مالی نقصان کا سامنا کرنا پڑا، صرف ترکی اور شام میں آنے والے زلزلوں سے تقریباً 50 ہزار سے زائد افراد موت کی نیند سوگئے۔ آج ہم 2023میں آنے والے زلزلوں پر نظر ڈالتے ہیں۔
دہلی میں زلزلہ:
دہلی: نیپال میں اکتوبر 2023ء کو 4.6 اور 6.2 شدت کے دو زلزلے آئے جس کے اثرات دہلی میں بھی محسوس کیے گئے۔ اس زلزلے میں 17 افراد زخمی ہوئے اور کئی مکانات اور سڑکوں کو نقصان پہنچا۔ تاہم بڑے پیمانے پر کسی نقصان کی اطلاع موصول نہیں ہوئی۔
نیپال میں آنے والا زلزلہ:
نیپال میں نومبر 2023ء کو 6.4 شدت کا شدید زلزلہ محسوس کیا گیا، جس کے بعد 382 سے زائد آفٹر شاکس محسوس کیے گئے۔ اس زلزلے میں 130 سے زائد افراد لقمہ اجل بن گئے، جبکہ متعدد عمارتیں ملبے کا ڈھیر بن گئیں۔
شام اور ترکی میں زلزلے کی تباہ کاریاں:
ترکی اور شام میں 6 فروری2023ء کو 7.8 شدت کا زلزلہ آیا۔ جس نے پوری کی پوری بستیاں تہس نہس کردیں، یہ زلزلہ سب سے خوفناک زلزلوں میں سے ایک تھا۔ اس حادثے میں 50,000 سے زیادہ لوگ اپنی جانوں سے ہاتھ دھو بیٹھے۔ بلند و بالا عمارتیں دیکھتے دیکھتے ملبے کا ڈھیر بن گئیں۔
نیپال میں آنے والا تباہ کُن زلزلہ:
24 جنوری کو نیپال میں زلزلہ آیا، اس زلزلے کے جھٹکے اتر پردیش، دہلی اور اتراکھنڈ میں بھی محسوس کیے گئے۔ اس سے بڑے پیمانے پر جانی و مالی نقصان کا سامنا نہیں کرنا پڑا، تاہم محدود پیمانے پر عمارتوں کو نقصان پہنچنے کی اطلاعات سامنے آئیں۔
افغانستان میں زلزلے کی تباہ کاریاں:
افغانستان میں 21 مارچ2023ء کو 6.8 شدت کا زلزلہ آیا۔ اس کے جھٹکے جموں و کشمیر، ہریانہ، پنجاب، ہماچل پردیش، اتراکھنڈ اور راجستھان میں بھی محسوس کیے گئے۔ اس آنے والی آفت کے نتیجے میں 12قیمتیں زندگیاں ضائع ہوگئیں۔
اسرائیل نے جبالیہ کیمپ پر بھی بم برسا دیئے، مزید 90 فلسطینی شہید
پاکستان کے مختلف شہروں میں زلزلہ:
18نومبر 2023کو پاکستان میں پشاور، وادی سوات اور دیگر ملحقہ علاقوں میں زلزلے کے جھٹکے محسوس کیے گئے جس سے عوام میں خوف و ہراس پھیل گیا، اس واقعے میں کسی کے ہلاک یا زخمی ہونے کی اطلاعات موصول نہیں ہوئیں۔زلزلے کا مرکز پاک۔افغان سرحد پر واقع کوہ ہندو کش بتایا گیا۔
