اسلام آباد : سپریم کورٹ نے زلفی بخاری دہری شہریت کیس میں فریقین کو نوٹس جاری کردیئے، چیف جسٹس نے ریمارکس جو منتخب ہونے کے اہل نہیں لیکن ماہر ہیں تو انہیں مشیر لگایا جاسکتا ہے۔
تفصیلات کے مطابق سپریم کورٹ میں چیف جسٹس ثاقب نثار کی سربراہی میں دہری شہریت کے حامل زلفی بخاری کی بطور معاون تقرری سے متعلق کیس کی سماعت ہوئی۔
سپریم کورٹ نے زلفی بخاری سمیت فریقین کو نوٹس جاری کردئیے، درخواست گزارنے مؤقف اختیارکیاکہ زلفی بخاری دہری شہریت رکھتے ہیں، وہ پارلیمنٹ کے رکن منتخب ہونے کے اہل نہیں ہیں۔
چیف جسٹس نے ریمارکس دئیے جو لوگ منتخب ہونے کے اہل نہیں ہوتے لیکن کسی کام میں ماہر ہوں تو انھیں مشیر لگایا جاسکتا ہے ، ایسے افراد آئین کے آرٹیکل باسٹھ کی زد میں نہیں آتے ، اور رولز کے مطابق یہ صدر مملکت کا اختیار ہے کہ وہ مشیر تعینات کریں۔
درخواست گزار کے وکیل نے کہا جو کام ایک طریقے سے نہیں ہوسکتا وہ کام دوسرے راستے سے بھی نہیں کیا جاسکتا، مزید سماعت جمعے تک ملتوی کردی گئی۔
یاد رہے کہ وزراتِ عظمیٰ کا حلف اٹھانے کے بعد عمران خان نے 18 ستمبر کو زلفی بخاری کو معاونِ خصوصی برائے اووسیز پاکستانی مقرر کیا تھا تاکہ وہ سمندر پار بسنے والی پاکستانیوں کے مسائل اور معاملات میں وزیراعظم کی معاونت کریں۔
زلفی بخاری کو سرکاری عہدہ ملنے کے بعد سپریم کورٹ میں 26 ستمبر کو اُن کی اہلیت چیلنج کی گئی تھی جس پر رجسٹرار سپریم کورٹ نے اعتراض اٹھائے تھے۔
مزید پڑھیں: زلفی بخاری وزیراعظم عمران خان کے معاون خصوصی مقرر
وزیراعظم کے معاون خصوصی کا عہدہ ملنے کے بعد زلفی بخاری نے اپنی تنخواہ سپریم کورٹ وزیراعظم ڈیم فنڈ میں دینے کا اعلان کرتے ہوئے کہا تھا کہ جب تک عہدہ ہے اُس وقت تک کی تنخواہ ڈیم فنڈ میں جمع کراؤں گا۔
وزیراعظم عمران خان نے اپنے معاون خصوصی کو سمندر پار پاکستانیوں سے متعلق مفصل رپورٹ تیار کرنے کی ہدایت کی تھی جبکہ انہیں بیرون ملک پاکستانیوں کے ڈیم فنڈ سے متعلق امورکو بھی دیکھنے کی ہدایت کی گئی تھی۔
خیال رہے زلفی بخاری وزیراعظم عمران خان کے قریبی ساتھی ہے اور ان کی این اے 53انتخابی مہم کے انچارج بھی رہ چکے ہیں، اُن کے پاس پاکستان کے علاوہ برطانوی شہریت بھی ہے۔
مزید پڑھیں: وزیراعظم کے معاون خصوصی زلفی بخاری کا تنخواہ ڈیم فنڈ میں دینے کا اعلان
زلفی بخاری کا نام نیب کی درخواست پر ای سی ایل میں ڈال گیا تھا، جب وہ عمران خان اور اہلیہ کے ہمراہ عمرہ ادائیگی کے لیے سعودی عرب جارہے تھے تو انہیں ائیرپورٹ حکام نے جانے کی اجازت نہیں دی تھی۔
بعد ازاں وزارتِ داخلہ نے مراسلہ جاری کرکے زلفی بخاری کو بیرونِ ملک سفر کی مشروط اجازت دی تھی جس کے بعد چار روز میں عمرہ ادا کر کے عمران خان کے ہمراہ ہی وطن واپس آگئے تھے۔
