افغان حکومت نے اپنے ہی شہریوں کے لیے زمین تنگ کردی، افغان حکومت نے پاکستان سے واپس جانے والے شہریوں کو قبول کرنے سے انکار کردیا۔
وائس اف امریکی کے ایک خبر کے مطابق پاکستان میں 37 لاکھ افغان شہریوں میں سے17 لاکھ سے زائد شہری غیر قانونی طور پر پاکستان میں مقیم ہیں جبکہ یو این کی ایک رپورٹ میں بتایا گیا کہ افغانستان میں طالبان حکومت کے بعد 7 لاکھ سے زائد افغان شہری فرار ہو کر پاکستان آئے۔
غیر قانونی افغان باشندوں کے باعث پاکستان میں جرائم، دہشتگردی، اسمگلنگ میں اضافہ ہوا، ملکی سالمیت کے پیش نظر حکومت پاکستان نے غیر قانونی مقیم افراد کو واپس جانے کا حکم دیا جس کے بعد نومبر سے اکتوبر تک 2 لاکھ 40 ہزار سے زائد غیر قانونی افغانی رضاکارانہ طور پر واپس جاچکے ہیں۔
رپورٹ میں بتایا گیا کہ پاکستان سے جانے والے افغان باشندوں کو اپنے ملک واپس پہنچنے پر بے شمار دشواریوں اور رکاوٹوں کا سامنا ہے، پاکستان سے واپس جانے والے شہریوں کو افغان حکومت نے قبول کرنے سے ہی انکار کردیا۔
رپورٹ کے مطابق افغان حکومت نے واپس پہنچنے والے شہریوں پر ان کی اپنی ہی زمین ان کیلئے تنگ کردی، افغان حکومت نے اپنے شہریوں پر اپنا سامان ساتھ لانے پر بھی پابندی عائد کردی۔
تجزیہ کاروں کا اس حوالے سے کہنا ہے کہ افغان شہریوں کو اپنے ملک میں داخل ہونے کی اجازت نہ دینا عالمی قوانین کی خلاف ورزی ہے، اپنے ضروری سامان سے محرومی کے باعث افغان شہری اپنے ہی ملک میں روزگار کمانے سے قاصر ہیں۔
تجزیہ کار نے کہا کہ افغان حکومت واپس پہنچنے والے افغان شہریوں کو تمام سہولتیں فراہم کرے، ماضی میں بھی کئی ممالک مہاجرین کو ان کے ملک کے حالات بہتر ہونے پر واپس بھیج چکے ہیں جس میں ڈنمارک، برطانیہ، ناروے اور کئی دیگر ممالک شامل ہے۔
تجزیہ کار نے کہا کہ اُن تمام ممالک نے نہ صرف اپنے شہریوں کو قبول کیا بلکہ تمام حقوق، سہولتیں بھی فراہم کیں تو کیا اپنے ہی شہریوں کو مسترد کرنے والے ریاستی حکمران کہلانے کے قابل ہیں؟۔
تجزیہ کار کا کہنا تھا کہ اپنے شہریوں کے بنیادی حقوق کو پامال کرنے والے حکمران نہیں ملک دشمن عناصر کہلائے جاتے ہیں، پاکستان نے ہمیشہ ایک ذمہ دار ریاست کی حیثیت سے افغان مہاجرین کو پناہ دی، پاکستان نے عالمی قوانین کی پاسداری کرتے ہوئے مہاجرین کو تمام بنیادی سہولتیں بھی دیں۔
دوسری جانب الجزیرہ نے رپورٹ کہا کہ پاکستان نے ہمیشہ ایک ذمہ دار اور بے لوث میزبان کا کردار ادا کیا ہے، دیگر ممالک کے مقابلے میں پاکستان نے افغان شہریوں کو بہتر سہولتیں، مواقع فراہم کیے۔
افغان شہری کا کہنا ہے کہ 40 سال پہلے ہم افغانی پاکستان آئے تھے، ہم نے پاکستان میں بہت اچھا وقت گزارا ہے، پاکستان حکومت نے ہمیں اجازت دی کہ ہم اپنا سامان بھی لے آئیں، اب افغان حکومت سامان وہاں لیکر جانے کی اجازت دے تاکہ روزگار چلا سکیں۔
افغان شہریوں کا کہنا ہے کہ ہمارے پاس اپنی مشینیں اور گھر کا سامان ہے، افغان حکومت سے درخواست ہے ہمیں خوش آمدید کہیں جیسے پاکستان نے کیا تھا، پاکستان جیسی سہولتیں افغانستان میں بھی مل جائیں تو ہم بہت خوش ہونگے۔
