کراچی: پاکستان تحریک انصاف کی کارکن زہرہ شاہد قتل کیس میں انسداد دہشت گردی عدالت نے فیصلہ سناتے ہوئے ایم کیو ایم کارکن راشد ٹیلراور زاہد عباس زیدی کو سزائے موت سنا دی گئی۔
تفصیلات کے مطابق سنہ 2013 میں قتل کی جانے والی پاکستان تحریک انصاف کی کارکن زہرہ شاہد کے قتل کیس کا فیصلہ سنا دیا گیا۔
انسداد دہشت گردی عدالت نے ایم کیو ایم کارکن راشد ٹیلراور زاہد عباس زیدی کو سزائے موت سنا دی جبکہ 2 مزید ملزمان عرفان اور کلیم کو عدم ثبوت کی بنیاد پر بری کردیا۔
رینجرز پراسیکیوٹر کا کہنا تھا کہ قتل میں ملوث ملزمان ایم کیو ایم سے ہیں، ملزمان نے تفتیش میں زہرہ شاہد کے قتل کا اعتراف کیا تھا۔
پراسیکیوشن ٹیم کے مطابق ملوث ملزمان کو گواہوں نے بھی شناخت کر لیا تھا۔
دوسری جانب ملزمان نے عدالت میں اعتراف کیا کہ تحریک انصاف کو خوفزدہ کرنے کے لیے قیادت کے حکم پر زہرہ شاہد کو قتل کیا۔
یاد رہے کہ زہرہ شاہد کو مئی 2013 میں ان کے گھر کے باہر قتل کیا گیا تھا۔ حکومت نے ملزمان کی نشاندہی کے لیے 25 لاکھ روپے انعام رکھا تھا۔
