نئی دہلی: بھارت میں زہریلی شراب پینے سے ہلاک ہونے والے افراد کی تعداد 156 ہوگئی اور سینکڑوں زیرعلاج ہیں۔
تفصیلات کے مطابق دو روز قبل بھارتی ریاست آسام میں زہریلی شراب پینے کے دو مختلف واقعات سامنے آئیں تھے جس کے باعث ہلاکتوں کی تعداد 156 تک پہنچ چکی ہے۔
بھارتی میڈیا کا کہنا ہے کہ شراب پینے کے باعث تقریباً 85 لوگوں کی ہلاکتیں آسام کے ضلع گولگھات جبکہ ضلع جورہت میں 71 افراد کی ہلاکتوں کی تصدیق ہو چکی ہے۔
مختلف اسپتال میں زیراعلاج متاثرین میں سے کئی کی حالت نازک بتائی جاتی ہے، ہلاک یا متاثر ہونے والوں میں زیادہ تر افراد مزدور پیشہ ہیں۔
دوسری جانب وزیراعلیٰ آسام نے دونوں واقعات کی تحقیقات کا حکم دیتے ہوئے ذمہ داروں کو منطقی انجام تک پہنچانے کا حکم دے رکھا ہے، جس کے بعد پولیس نے کارروائی کرتے ہوئے ایک شخص کو گرفتار بھی کیا ہے۔
بھارت میں زہریلی شراب پینے سے 92 افراد ہلاک
دو روز قبل محکمہ ایکسائز نے انکوائری کمیٹی تشکیل دیتے ہوئے زہریلی شراب کی فروخت کی روک تھام میں ناکامی پر دو مقامی افسران کو معطل کردیا۔
بھارت میں زہریلی شراب پینے سے ہلاکتوں کے واقعات کوئی نئی بات نہیں، اس سے قبل بھی متعدد واقعات پیش آچکے ہیں، جس کے باعث درجنوں لوگ اپنی جان سے ہاتھ دھو بیٹھے ہیں۔
واضح رہے کہ دو ہفتے قبل بھی اترپردیش اور اترکھنڈ میں ایک ہی دن میں زہریلی شراب پینے سے 92 سے زائد افراد ہلاک ہوگئے تھے۔
