ٹوبہ ٹیک سنگھ : زہریلی چائے پینے سے ہونے والی جاں بحق خاتون نازیہ بی بی کی ابتدائی پوسٹ مارٹم رپورٹ سامنے آگئی، جس میں بتایا کہ ازیہ بی بی کی موت زہرخورانی سے ہوئی۔
تفصیلات کے مطابق ٹوبہ ٹیک سنگھ میں زہریلی چائے پینے سے خاتون اور بچوں کی اموات کے واقعے کی تحقیقات جاری ہے، جاں بحق خاتون نازیہ بی بی کی ابتدائی پوسٹ مارٹم رپورٹ سامنے آگئی۔
رپورٹ میں بتایا گیا کہ خاتون کے جسم پر تشدد کے کوئی نشانات نہیں تھے، نازیہ بی بی کا ابتدائی پوسٹ مارٹم میڈیکل بورڈکی زیرنگرانی کیاگیا، نازیہ بی بی کی موت زہرخورانی سے ہوئی۔
ابتدائی رپورٹ میں کہا گیا کہ موت کی وجہ کاحتمی تعین پنجاب فارنزک سائنس ایجنسی کی رپورٹ کے بعد ہوگا۔
یاد رہے ٹوبہ ٹیک سنگھ میں چائے پینے سے خاتون اور پانچ بچوں کی حالت غیر ہو گئی تھی، جس کے بعد اسپتال لے جانے پر پتا چلا تھا کہ تمام افراد کو زہر دیا گیا ہے۔
افسوسناک واقعے میں خاتون اور پانچ بچوں جاں بحق ہوگئے تھے، بچوں کی ماں نے شوہر پر زہر دینے کا الزام عائد کیا تھا۔
بعد ازاں زہریلی چائے پینے سے اموات کا مقدمہ بچوں کے ماموں کی مدعیت میں درج کیا گیا، جس کے بعد پولیس نے ملزم کو گرفتار کر لیا تھا تاہم ملزم نے بیوی بچوں کو زہریلی چائے پلانے کے الزام سے انکار کر دیا تھا۔
