ممبئی: بالی ووڈ کی نئی فلم زیرو کے پہلے رومانوی گانے کی ویڈیو جاری کردی گئی جس کو انوشکا شرما اور شاہ رخ خان پر فلمایا گیا ہے۔
تفصیلات کے مطابق آنند ایل رائے کی ہدایت کاری میں بننے والی فلم 21 دسمبر کو ملک بھر میں ریلیز کی جائے گی جس میں کنگ خان، انوشکا اور کترینہ کیف سمیت دیگر اسٹارز اداکاری کرتے نظر آئیں گے۔
قبل ازیں فلم کا ٹریلر شاہ رخ خان کی سالگرہ کے روز جاری کیا گیا تھا جس نے مختصر وقت میں ہی تہلکہ مچا دیا تھا۔
مزید پڑھیں: فلم ’زیرو‘ ’معذور لڑکی کی سچی محبت کو ٹھکرانے والا پستہ قد شخص‘
ہدایت کار آنند ایل رائے کی جانب سے فلم کا پہلا گانا ’میرے نام تو‘ کے نام سے ریلیز کیا گیا، جو شاہ رخ اور انوشکا (آفیہ) کے درمیان ہونے والی محبت کی عکاسی کررہا ہے۔
گانے کے کمپوزر اجے اتل ابھے جودھا پرکار ہیں جب کہ اس میں ارشاد کاملی نے اپنی آواز کا جادو جگایا ہے۔
قبل ازیں منگل کے روز شاہ رخ خان نے سماجی رابطے کی ویب سائٹ ٹویٹر پر فلم کا پوسٹر شیئر کرتے ہوئے لکھا تھا کہ ’ باؤا سنگھ کا پیار ہے، آفیہ اُسی کا نام ہے‘۔
دوسری جانب انوشکا شرما نے بھی یہی پوسٹر شیئر کرتے ہوئے لکھا تھا کہ ’جتنے یہ پورے ہیں اُس سے لمبا تو آفیہ یوسفزئی بھیندر کا نام ہے، پھر بھی مجھے کہتا ہے تو میرے نام ہے‘۔
دونوں اداکاروں نے اپنے ٹویٹ میں یہ بھی اعلان کیا تھا کہ ’میرے نام تو‘ گانا کل ریلیز ہونے جارہا ہے۔
اس فلم میں شاہ رخ خان پستہ قد (بونے) شخص کا کردار ادا کررہے ہیں جس کی عمر 38 برس ہے، علاوہ ازیں انوشکا شرما امیر گھرانے کی معذور لڑکی بنی ہیں جبکہ کترینہ اداکارہ کا کردار ادا کرتے ہی نظر آئیں گی۔
یہ بھی پڑھیں: فلم زیرو: مسٹرپرفیکٹ کنگ خان کی اداکاری کے معترف
قبل ازیں ریڈ چلی انٹرٹینمنٹ کی جانب سے جاری ہونے والے 3 منٹ 14 سیکنڈ دورانیے کے ٹریلر میں دکھایا گیا تھا کہ شاہ رخ خان اپنے لیے لڑکی کی تلاش میں ہوتے ہیں تو اسی دوران ان کے ہاتھ میں آفیہ یوسفزئی کی تصویر آجاتی ہے۔
کنگ خان کو تصویر پسند آجاتی ہے اس لیے باؤا سنگھ لڑکی کو دیکھنے کے لیے ایک اسکول کی تقریب میں پہنچ جاتے ہیں مگر اسی دوران جب اُن کی اسٹیج پر نظر پڑتی ہے تو وہ ہکا بکا رہ جاتے ہیں کیونکہ ’آفیہ ‘ دماغی فالج کی وجہ سے معذوری کی زندگی گزار رہی ہے۔
شاہ رخ خان انوشکا سے محبت کا اظہار کرتے ہیں اور پھر دونوں کی ایک دوسرے سے قربت بڑھ جاتی ہے، بعد ازاں اداکارہ کترینہ کیف کی انٹری ہوتی ہے جو فلم اسٹار کا کردار ادا کررہی ہیں۔
ویڈیو میں دکھایا گیا ہے کہ کنگ خان کا انوشکا سے تعلق ٹوٹ جاتا ہے جس کے بعد وہ کترینہ کی محبت میں گرفتار ہوجاتے ہیں مگر یہ کہانی بھی کامیاب ہوتی نظر نہیں آئی۔
اسے بھی پڑھیں: کنگ اور دبنگ خان کی مداحوں کے لیے عیدی، ”زیرو“ کانیا ٹیزر ریلیز
ٹریلر کے آخر میں یہ بھی دکھایا گیا ہے کہ شاہ رخ خان اسپیس شپ میں بیٹھ کر خلا میں جاررہے ہیں۔ فلم میں شاہ رخ خان باؤا سنگھ، انوشکا شرما عافیہ اور کترینہ کیف اپنا ہی کردار نبھا رہی ہیں۔
فلم کی ہدایت کاری کے انجام آنند ایل رائے نے انجام دیے جبکہ پروڈیوسر کنگ خان کی اہلیہ گوری خان ہیں۔
زیرو میں کنگ خان کے ساتھ کئی معروف فلمی شخصیات مختصر کردار کریں گی جن میں سلمان خان بھی شامل ہیں۔
