یوکرین کے صدر زیلنسکی نے بڑا یوٹرن لےلیا، امریکی صدر کی جانب سے فوجی امداد بند کرنے کے بعد زیلنسکی کے ہوش ٹھکانے آگئے۔

زیلنسکی نے ایکس پر پیغام جاری کرتے ہوئے لکھا کہ میں امن کےلیے یوکرین کے عزم کا اعادہ کرنا چاہتا ہوں، ہم میں سے کوئی بھی نہ ختم ہونے والی جنگ نہیں چاہتا، یوکرین دیرپا امن کیلئے جلد مذاکرات کی میز پر آنے کےلیے تیار ہے۔

یوکرینی صدر نے 2 دن پہلے کہا تھا کہ وہ روس کیساتھ جنگ ختم ہوتے نہیں دیکھ رہے، امریکا کی جانب سے فوجی امداد کی بندش کے بعد یوکرینی صدر نے بیان بدل لیا۔

یوکرینی صدر زیلنسکی نے ایکس پر پیغام میں کہا کہ یوکرین سے زیادہ کوئی امن نہیں چاہتا، دیرپا امن کیلئے صدر ٹرمپ کی مضبوط قیادت میں کام کرنے کیلئے تیار ہوں، ہم جنگ کے خاتمے کےلیے تیزی سے کام کرنے کےلیے تیار ہیں۔

زیلنسکی نے کہا کہ پہلے مرحلے میں قیدیوں کی رہائی اور فضائی جنگ بندی پر بات ہوسکتی ہے، جنگ بندی معاہدے پر متفق ہونے کیلئے امریکا کے ساتھ کام کرنا چاہتے ہیں

قدر کرتے ہیں کہ امریکا نے یوکرین کی خودمختاری کو برقرار رکھنے میں کتنی مدد کی، وہ لمحہ یاد ہے صدر ٹرمپ نے یوکرین کو جیولن فراہم کیے، ہم شکر گزار ہیں، وائٹ ہاؤس میں ہماری ملاقات اس طرح نہیں ہوئی جس طرح ہونی چاہیے تھی۔

یوکرینی صدر ولادیمیر زیلنسکی نے کہا کہ افسوسناک ہے کہ وائٹ ہاؤس میں جو کچھ ہوا، یہ چیزیں درست کرنے کا وقت ہے، چاہتے ہیں مستقبل میں تعاون تعمیری ہو۔

زیلنسکی نے کہا کہ معدنیات اور سلامتی معاہدے پر یوکرین دستخط کرنے کےلیے تیار ہے، معاہدے کو سیکیورٹی اور ٹھوس حفاظتی ضمانتوں کی جانب قدم کےطور پر دیکھتے ہیں۔

امریکی صدر ڈونلڈ ٹرمپ کا غصہ ٹھنڈا نہ ہوا اور وہ یوکرینی ہم منصب زیلنسکی پر دوبارہ برس پڑے کہا یہ شخص امن نہیں چاہتا۔

امریکا کے صدارتی آفس میں صدر ٹرمپ اور ان کے یوکرینی ہم منصب ولادیمیر زیلنسکی کی تلخ ملاقات کی دنیا میں گونج ابھی برقرار ہے کہ امریکی صدر زیلنسکی پر ایک بار پھر برس پڑے اور سوشل میڈیا پلیٹ فارم پر پوسٹ کرتے ہوئے انہیں شدید تنقید کا نشانہ بناتے ہوئے کہا کہ ’’یہ شخص امن نہیں چاہتا۔‘‘

ٹرمپ نے یہ بیان ولادیمیر زیلنسکی کے گزشتہ روز کے اس بیان کہ ’’یوکرینی جنگ کا خاتمہ ابھی دور ہے‘‘ پر ردعمل دیتے ہوئے کہا ہے۔

ڈونلڈ ٹرمپ نے سوشل میڈیا پلیٹ فارم ٹروتھ پر یوکرینی صدر کو کڑی تنقید کا نشانہ بناتے ہوئے زیلنسکی کے مذکورہ بیان کو سب سے بُرا بیان قرار دیتے ہوئے واضح کہا کہ امریکا اب اس رویے کو زیادہ دیر تک برداشت نہیں کرے گا۔

امریکی صدر نے اس کے ساتھ ہی دیگر یورپی رہنماؤں پر بھی کڑی تنقید کی اور کہا کہ یورپ جتنا پیسہ یوکرین کے دفاع پر خرچ کر رہا ہے، اس سے کہیں زیادہ رقم روس سے تیل اور گیس خریدنے پر خرچ کر رہا ہے۔

واضح رہے کہ دو روز قبل یوکرین کے صدر ولادیمیر زیلنسکی نے امریکی صدارتی ہاؤس میں صدر امریکا ڈونلڈ ٹرمپ سے ملاقات کی تھی۔ تاہم یہ ملاقات خوشگوار ماحول کے بجائے انتہائی تلخ ماحول میں ہوئی۔

اس ملاقات کے دوران ٹرمپ مسلسل زیلنسکی پر برہمی کا مظاہرہ کرتے رہے۔ جس کے بعد مشترکہ پریس کانفرنس منسوخ کر دی گئی جب کہ یوکرینی صدر ظہرانہ میں شرکت کیے بغیر چلے گئے تھے۔

اس غیر معمولی واقعہ کے بعد یورپی ممالک کی جانب سے زیلنسکی حمایت کی جا رہی ہے۔ برطانیہ، فرانس، جرمنی سمیت کئی ممالک یوکرینی صدر سے اظہار یکجہتی کرتے ہوئے ٹرمپ کے رویے کی مذمت کر رہے ہیں۔

https://urdu.arynews.tv/ukrain-president-gift-for-trump/