ARYNews.tv | Urdu – Har Lamha Bakhabar

Tag: زیورات

  • جعلی بابا نے خاتون کو ہپناٹائز کرکے زیورات کیسے چرائے؟ ویڈیو وائرل

    جعلی بابا نے خاتون کو ہپناٹائز کرکے زیورات کیسے چرائے؟ ویڈیو وائرل

    بھارتی پنجاب میں ایک دل دہلا دینے والا واقعہ پیش آیا ہے جہاں ایک جعلی بابا نے ایک خاتون کو ہپناٹائز کر کے اس کا قیمتی سونا چرا لیا۔

    بھارتی میڈیا رپورٹ کے مطابق پنجاب کے ضلع موگا میں روحانی علاج سے زندگی کے مسائل کو حل کرنے کا دعویٰ کرنے والے ایک جعلی بابا نےخاتون کو ہپناٹائز کر کے اس کے زیورات چرا لیے۔

    رپورٹ کے مطابق مذکورہ خاتون نے مقامی بازار کے قریب ایک بابا سے ملاقات کی جو روحانی علاج اور مشکلات کے حل کا دعویٰ کر رہا تھا، بابا نے خاتون کو ڈرا کر کہا کہ اس کے برے دن شروع ہونے والے ہیں اور اس کی جان و مال کو خطرہ لاحق ہے۔

    بابا نے دعویٰ کیا کہ وہ اس کے سونے کے زیورات پر کچھ پڑھ کر مصیبت کو ٹال دے گا، اور خاتون کو کہا کہ وہ اپنے تمام زیورات اتار کر ایک کپڑے میں باندھ کر اسے دے دے۔

    رپورٹ کے مطابق خاتون اس وقت بابا کے ہپناٹائز کے زیرِ اثر تھی، جس کے بعداس نے اپنے تمام زیورات بابا کو تھما دیے، بابا نے ایک تعویذ پڑھنے کا ڈرامہ کیا اور کچھ دیر بعد وہ کپڑا واپس دے دیا۔

    بعد ازاں جب خاتون کو ہوش آیا تو اس نے کپڑا کھولا جسے دیکھ کر اسے جھٹکا لگا کیوں کہ زیورات کی جگہ صرف سوکھی گھاس اور تنکے موجود تھے۔

    پنجاب پولیس نے خاتون کی شکایت پر مقدمہ درج کر لیا ہے اور جعلی بابا کی تلاش جاری ہے، حکام نے عوام سے اپیل کی ہے کہ وہ ایسے جعلی روحانی علاج کرنے والوں سے ہوشیار رہیں۔

  • پاکستان سے طلائی زیورات کی ایکسپورٹ معطل، کروڑوں ڈالر کے آرڈر منسوخ ہونے کا خطرہ

    پاکستان سے طلائی زیورات کی ایکسپورٹ معطل، کروڑوں ڈالر کے آرڈر منسوخ ہونے کا خطرہ

    کراچی: پاکستان سے طلائی زیورات کی ایکسپورٹ معطل ہو گئی ہے، جس سے کروڑوں ڈالر کے آرڈر منسوخ ہونے کا خطرہ پیدا ہو گیا ہے۔

    تفصیلات کے مطابق ایس آر او کے خاتمے کی وجہ سے پاکستان سے طلائی زیورات کی ایکسپورٹ معطل ہونے سے کروڑوں ڈالر کے آرڈر منسوخ ہونے کا خطرہ بڑھ گیا ہے۔

    چیئرمین پاکستان جیم اینڈ جیولرز حبیب الرحمان کا کہنا ہے کہ ایف بی آر نے وی باک سے ایس آر او 760 خارج کر دیا ہے، ایس آر او ختم ہونے سے ایئر پورٹس پر ایکسپورٹ آرڈرز رک گئے ہیں۔

    انھوں نے کہا کہ کراچی ایئرپورٹ پر 15 روز سے 4 ایکسپورٹرز کا 20 کلو سے زائد سونا پھنسا ہوا ہے، اور کسٹم حکام ایک کلو سونا کلیئر کرنے کے لیے 30 لاکھ روپے ٹیکس کا تقاضا کر رہے ہیں۔

    حبیب الرحمان نے کہا پاکستان سے ماہانہ 70 کلو سے زائد سونے کے زیوارت ایکسپورٹ ہوتے ہیں، ایس آر او 760 سونے کے زیورات کی اسکیم کے تحت ٹیکس استثنیٰ فراہم کرتا ہے، اس سہولت کے خاتمے پر بھاری ٹیکسز دینا پڑیں گے۔

    اس سلسلے میں پاکستان جیم اینڈ جیولرز ٹریڈرز اینڈ مرچنٹس ایسوسی ایشن کی جانب سے چیئرمین ایف بی آر کو ایک خط بھیجا گیا ہے، جس میں موجودہ صورت حال میں کروڑوں ڈالر کے آرڈر منسوخ ہونے کے خطرے سے آگاہ کیا گیا ہے۔

  • فوٹیج: وائٹ کرولا گینگ کی بڑی واردات، 1 کروڑ مالیت کی کرنسی اور زیورات لوٹ کر فرار

    فوٹیج: وائٹ کرولا گینگ کی بڑی واردات، 1 کروڑ مالیت کی کرنسی اور زیورات لوٹ کر فرار

    کراچی: شارع فیصل کے علاقے میں وائٹ کرولا گینگ نے اہلخانہ کو یرغمال بنا کر گھر میں واردات کی جس کی فوٹیج سامنے آگئی۔

    اے آر وائی نیوز کے مطابق کراچی کے علاقے شارع فیصل گلشن 10 میں کرولا گینگ نے گھر میں ڈکیتی کے دوران مکینوں کو یرغمال بنا کر 1 کروڑ مالیت کی ملکی، غیر ملکی کرنسی اور زیورات لوٹ کر فرار ہوگئے۔

     

    فوٹیج میں ملزمان کو وائٹ کرولا میں واردات کیلئے آتے دیکھا جاسکتا ہے، پولیس نے واردات کی رپورٹ درج کرلی جس کے بعد سے ملزمان کی تلاش جاری ہے۔

    بڑھتی وارداتوں سے شہری خوف کا شکار ہیں، شارع فیصل سےملحقہ علاقوں میں ڈکیت گینگ ایک ہفتے کے دوران درجنوں شہریوں کو قیمتی اشیا سے محروم کرچکے ہیں۔

  • سعودی عرب میں سونے کے زیورات خریدنے کے حوالے سے اہم ہدایات

    سعودی عرب میں سونے کے زیورات خریدنے کے حوالے سے اہم ہدایات

    ریاض : سعودی حکومت نے سونے کے زیورات خریداری کرنے والے شہریوں اور غیر ملکیوں کو اہم ہدایات جاری کی ہیں۔

    اس حوالے سے سعودی وزارت تجارت کا کہنا ہے کہ ماہ اپریل میں زیورات سازی کے شعبے کے لیے236 تجارتی لائسنس جاری کیے گئے ہیں۔

    العربیہ نیٹ کے مطابق وزارت تجارت نے سونے کی خریداری کے حوالے سے صارفین کو ہدایت کی ہے کہ وہ جب بھی سونے کے زیورات خریدیں اس بات کو یقینی بنائیں کہ خریدے جانے والے زیورات پر سونے کے معیار کی مخصوص مہر لگی ہو۔

    ترجمان وزارت تجارت کا کہنا ہے کہ اس ہدایت پر عمل سے یہ معلوم ہوسکے گا کہ سونا کتنے قیراط کا ہے؟معیار کے علاوہ زیورات کا وزن بھی حساس میٹر سے کیا جانا ضروری ہے۔

    علاوہ ازیں زیورات خریداری کے لیے دکاندار سے خریدے گئے زیورات کی مہرشدہ رسید ضرور حاصل کریں جس میں زیور کا مجموعی وزن اور رقم کی تمام ترتفصیلات درج ہونا ضروری ہے۔

    واضح رہے کہ سونے کی تجارت کرنے والے اس امر سے بخوبی واقف ہیں کہ سونے کے زیورات کی قیمت کا تعین اوپن مارکیٹ میں بناوٹ کے حساب سے کیا جاتا ہے۔

    عالمی مارکیٹ میں سونے کے نرخ روزانہ بلکہ گھنٹوں کے حساب سے اترتے چڑھتے ہیں جن کا اثر مقامی مارکیٹ پربھی مرتب ہوتا ہے۔

    زیورات کی بناوٹ کے اعتبار سے سعودی عرب میں بھی سونے کے نرخوں کا تعین کرنا مشکل ہوتا ہے کیونکہ یہاں دنیا بھر کے ماڈلز اور مصنوعات ہوتی ہیں جن کے نرخ بھی جدا ہوتے ہیں۔

    مقامی سطح پر بھی سونے کے زیورات تیار کرنے والے کارخانے موجود ہیں تاہم امارات اور دبئی کے علاوہ بحرین کے تیار کردہ زیورات کی قیمت نسبتاً دیگر ممالک سے زیادہ ہوتی ہیں۔

  • سونے کے زیورات کی خریداری، سعودی وزارت تجارت کی اہم ہدایات

    سونے کے زیورات کی خریداری، سعودی وزارت تجارت کی اہم ہدایات

    ریاض: سعودی وزارت تجارت نے سونے کے زیورات کی خریداری اور اس کے حوالے سے صارف کے حقوق سے متعلق ہدایات جاری کی ہیں۔

    سعودی ویب سائٹ کے مطابق سعودی وزارت تجارت نے کہا ہے کہ سونا خریدنے والے صارف کا حق ہے کہ اگر موتیوں کا وزن 5 فیصد سے زیادہ ہو تو بل میں اس کا بھی اندراج کیا جائے۔

    وزارت تجارت کا کہنا ہے کہ سونا خریدنے والے صارف کا حق ہے کہ خریدے گئے زیور کے قیراط، زیور ساز کی علامت کا اندراج اور اگر پرانا زیور فروخت کیا جارہا ہو تو ایسی صورت میں بل میں اس کا تذکرہ بھی کیا جائے۔

    وزارت کے مطابق دکاندار سے تفصیلی بل بھی طلب کیا جا سکتا ہے جس میں شوروم کا نام، اس کا پتہ، لائسنس نمبر، کمرشل رجسٹریشن کا نمبر، ٹیلی فون نمبر، سودے کی تاریخ، سونے کا وزن، زیور کی تفصیل اور گاہک کا نام شامل ہو۔

    اگر زیور میں موتی جڑے ہوئے ہوں تو ایسی صورت میں ان کا وزن 5 فیصد سے زیادہ ہونے کی صورت میں بل میں اس کی نشاندہی ضروری ہے، بل میں قیمتی پتھر اور سونے کا وزن بھی لکھا جائے۔ قیمتی پتھروں سے مراد الماس، یاقوت، زمرد اور قدرتی موتی شامل ہیں۔

    وزارت تجارت نے مزید کہا کہ بل میں قیمتی پتھر کا نام، اس کی نوعیت، صنف، اس کی عمدگی کا معیار، شکل و صورت، وزن وغیرہ تمام تر تفصیلات درج کی جائیں۔

  • مراکش: ڈیڑھ لاکھ سال قدیم زیورات دریافت

    مراکش: ڈیڑھ لاکھ سال قدیم زیورات دریافت

    رباط: مراکش میں انسانی تاریخ کے قدیم ترین زیورات دریافت ہوئے ہیں۔

    تفصیلات کے مطابق شمالی افریقی ملک مراکش کے ساحل سے انسانی تاریخ کے قدیم ترین زیورات دریافت ہوئے ہیں، ماہرین آثار قدیمہ کا کہنا ہے کہ یہ زیورات ڈیڑھ لاکھ سال پرانے ہیں۔

    مراکش میں محققین نے جمعرات کو ایک لاکھ 42 ہزار سال اور ایک لاکھ پچاس ہزار سال کے درمیان قدیم ترین زیورات کی نقاب کشائی کی، یہ زیورات ملک کے جنوب مغربی علاقے میں واقع ساحلی شہر الصویرہ کے بیزمون غاروں میں دریافت ہوئے۔

    مراکشی ماہر آثار قدیمہ عبدالجلیل بوزوگر نے میڈیا کو بتایا کہ یہ دریافت سوراخ شدہ اور سیاہی والے 30 سمندری خولوں پر مشتمل ہے، یعنی انسانوں نے ان خولوں پر آئرن آکسائیڈ سے بھرپور سرخ مادہ لگایا تھا۔

    انھوں نے کہا کہ سرخ مٹی کے رنگ سے رنگے ہوئے چھوٹے سوراخوں والی سیپیوں سے بنے کئی ہار اور کنگن ملے ہیں، جو چند ہفتے قبل الصویرہ کے قریب بیزمون غار میں پائے گئے تھے۔

    عبدالجلیل نے بتایا کہ یہ سیپیاں ڈیڑھ لاکھ سال پرانی ہیں، فی الحال اس کا مطلب یہ ہے کہ یہ دنیا میں سب سے قدیم ہیں، دوسرا مطلب یہ ہے کہ یہ پہلا موقع تھا جب انسانوں نے ان سیپیوں کو آپس میں یا دوسرے لوگوں کے گروہوں کے ساتھ بات چیت کے ایک ذریعے کے طور پر استعمال کیا۔

    انھوں نے کہا کہ یہ مراکش اور انسانیت کے لیے ایک بڑی دریافت ہے، یہ خیال کیا جاتا ہے کہ دریافت ہونے والے ہاروں میں سے کچھ کو قدیم زمانے میں مواصلات کی ایک شکل کے طور پر استعمال کیا جاتا تھا۔

    یہ دریافت رباط میں مراکشی آثار قدیمہ ادارے، ایریزونا یونیورسٹی اور یورپ افریقا کی بحیرۂ روم کی لیبارٹری پر مشتمل ایک بین الاقوامی ٹیم نے کی۔

    واضح رہے کہ ایسے ہی نوادرات مشرق وسطیٰ اور افریقا میں بھی ملے ہیں تاہم ان کی عمر 35 ہزار سال سے لے کر ایک لاکھ پینتیس ہزار سال کے درمیان کی تھی۔

    محققین کے مطابق مراکش میں دنیا کے قدیم ہومو سیپیئنز (ارتقا کے دوران بالکل ابتدائی انسان) سے تعلق رکھنے والے پانچ افراد کی باقیات دریافت ہوئی تھیں، جو 3 لاکھ 15 ہزار سال پرانے تھے، انھیں 2017 میں فرانسیسی محقق ژاں ژاک ہوبلن کی ٹیم نے جبل الرحود میں دریافت کیا تھا۔

  • جیولری شاپ میں پونے 2 کروڑ روپے کے زیورات کی ڈکیتی، ویڈیو وائرل

    جیولری شاپ میں پونے 2 کروڑ روپے کے زیورات کی ڈکیتی، ویڈیو وائرل

    انگلینڈ میں چند ڈکیتوں نے زیورات کی دکان سے کروڑوں مالیت کی گھڑیاں اور انگوٹھیاں لوٹ لیں، چہروں پر نقاب ہونے کی وجہ سے پولیس ان کی تلاش کے لیے اندھیرے میں ٹامک ٹوئیاں مار رہی ہے۔

    انگلینڈ کے علاقے کیمبرج شائر میں واقع جیولری شاپ میں ہونے والی اس ڈکیتی کی سی سی ٹی وی فوٹیج جاری کی گئی ہے۔

    فوٹیج میں دیکھا جاسکتا ہے کہ 4 نقاب پوش افراد دکان کا دروازہ توڑ کر اندر داخل ہوئے اور دکان میں موجود شیشوں کے شوکیسز توڑنے لگے۔ چاروں ڈکیت شوکیسز سے خطیر مالیت کی گھڑیاں اور انگوٹھیاں نکال کر اپنے پاس موجود تھیلوں میں ڈال لیتے ہیں۔

    ڈکیتوں کے دکان میں داخل ہوتے ہی ایک زوردار الارم بجتا ہے اور 30 سیکنڈ بعد دکان میں دھواں بھی پھیلنا شروع ہوجاتا ہے تاہم ڈکیت اپنی کارروائی جاری رکھتے ہیں۔

    ڈکیتی کی اس واردات میں دکان سے 1 لاکھ یورو یعنی 1 کروڑ 87 لاکھ سے زائد پاکستانی روپے کے زیورات کا صفایا ہوگیا۔

    اگلے روز جیولری شاپ کی انتظامیہ نے سماجی رابطے کی ویب سائٹ فیس بک پر اپنے پیج پر لکھا کہ ہم یہ بتاتے ہوئے نہایت دلگرفتہ ہیں کہ ہماری دکان میں ڈکیتی ہوئی ہے۔

    پوسٹ میں کہا گیا کہ اگر کوئی شخص رات 2 سے 3 بجے کے درمیان علاقے میں کسی مشکوک سرگرمی سے واقف ہو یا اسے دیکھا ہو تو ہماری مدد کرے۔

    مقامی پولیس نے بھی اپیل کی ہے کہ اگر کوئی اس ڈکیتی کے حوالے سے کسی بھی قسم کی کوئی معلومات رکھتا ہے تو وہ پولیس سے رابطہ کرے۔

  • خاتون لاکھوں مالیت کے زیورات ایئرپورٹ ہی پر بھول کر دبئی پہنچ گئیں

    خاتون لاکھوں مالیت کے زیورات ایئرپورٹ ہی پر بھول کر دبئی پہنچ گئیں

    کراچی: شہر قائد سے دبئی جانے والی خاتون لاکھوں مالیت کے زیورات کراچی ایئرپورٹ ہی پر بھول کر دبئی پہنچ گئیں۔

    تفصیلات کے مطابق عائشہ اعجاز نامی خاتون مسافر اپنے شوہر کے ہم راہ پرواز EK 609 سے آسٹریلیا براستہ دبئی جا رہی تھیں، تاہم جہاز پر سوار ہونے سے قبل کراچی ایئرپورٹ کے کاؤنٹر پر بیش قیمت زیورات سے بھرا بیگ بھول گئیں۔

    اے آر وائی نیوز کے مطابق سول ایوی ایشن اتھارٹی کے عملے نے بھی فرض شناسی اور ایمان داری کا مظاہرہ کرتے ہوئے مذکورہ بیگ اس کی مالک خاتون تک پہنچایا۔

    خاتون کے رشتے دار زیورات لینے کے لیے رابطہ کر رہے ہیں

    ایئرپورٹ ذرایع کے مطابق خاتون عائشہ اعجاز لاکھوں مالیت کا سونا جہاز میں بیھٹنے سے پہلے ائیر لائن کے کاؤنٹر پر بھول گئی تھی، سی اے اے کے DFO راؤنڈ پر تھے، انھوں نے کاؤنٹر کے قریب بیگ پڑا ہوا دیکھا، بیگ کی تلاشی لی گئی تو اس میں لاکھو ں روپے کے طلائی زیورات موجود تھے۔

    ایئرپورٹ پر زیورات کے سلسلے میں تصدیق کی جا رہی ہے

    سی اے اے نے مسافر کا رابطہ نمبر حاصل کیا اور خاتون مسافر سے رابطہ کیا، خاتون نے بتایا کہ وہ دبئی پہنچنے کے بعد دستی سامان گم ہونے پر پریشان تھی۔ خاتون کی جانب سے زیورات کی وصولی کے لیے رشتے دار ایئرپورٹ بھیجے گئے۔ ائیر پورٹ مینجر عمران خان نے مسافر کے بھائی اور رشتے دار سے ضروری تصدیق کے بعد زیورات ان کے حوالے کر دیے۔

    سول ایوی ایشن اتھارٹی کے مطابق زیورات کی ما لیت 20 لاکھ روپے بتائی جاتی ہے۔

    یاد رہے کہ اس سے قبل بھی اس طرح کے واقعات پیش آتے رہے ہیں، جب مسافر زیورات سے بھرے دستی بیگ بھول گئے، تاہم سی اے اے عملے نے ایمان داری کا مظاہرہ کرتے ہوئے مال ان کے مالکان تک پہنچایا۔

  • برطانوی ماڈل کے 10 ارب روپے سے زائد مالیت کے زیورات چوری

    برطانوی ماڈل کے 10 ارب روپے سے زائد مالیت کے زیورات چوری

    لندن: برطانیہ کی نامور ماڈل تمارا اکیلسٹون کے گھر میں چور 10 ارب سے زائد مالیت کے زیورات چرا کر فرار ہوگئے، چوری ہونے والے زیورات تمارا کو ان کے والد نے شادی کے موقع پر تحفے میں دیے تھے۔

    تفصیلات کے مطابق برطانیہ کی معروف ماڈل اور فارمولا ون گروپ کے سابق چیف ایگزیکٹو برنی اکیلسٹون کی بیٹی تمارا اکیلسٹون کے گھر میں ڈکیتی کی واردات میں 10 ارب سے زائد مالیت کے زیورات چوری کر لیے گئے۔

    برطانوی ماڈل کے ترجمان کا کہنا ہے کہ جس وقت یہ واردات ہوئی اس وقت تمارا ملک سے باہر کرسمس کی چھٹیاں منا رہی تھیں۔ ڈکیتی کی واردات میں انگوٹھی، بریسلٹ اور بالیاں چوری کی گئیں۔

    تمارا اکیلسٹون نے 55 کمروں پر مشتمل گھر 9 ارب روپے میں خریدا تھا، برطانوی ماڈل کا گھر کین سنگٹن میں واقع ہے۔

    رواں سال ستمبر میں برطانیہ کے سابق وزیراعظم ونسٹن چرچل کی جائے پیدائش بلنھایم پیلس میں نصب خالص سونے سے بنا ٹوائلٹ چوری ہوگیا تھا۔

    بلنھایم پیلس کے ترجمان کا کہنا تھا کہ اطالوی آرٹسٹ کے مطابق ٹوائلٹ کی مالیت 50 لاکھ امریکی ڈالرز سے زیادہ ہے۔

    یاد رہے کہ اکتوبر 2016 کو امریکی ماڈل، اداکارہ کم کارڈیشین ویسٹ کو پیرس میں ان کے ہوٹل کے کمرے میں نقاب پوش افراد نے لوٹ لیا تھا، چور ان سے قیمتی زیورات لے کر فرار ہوگئے تھے۔

  • مرجان: وہ پتھر جس کا ذکر قرآن اور دیگر آسمانی صحیفوں میں بھی ملتا ہے

    مرجان: وہ پتھر جس کا ذکر قرآن اور دیگر آسمانی صحیفوں میں بھی ملتا ہے

    قرآن میں جن نہایت عمدہ اور خوب صورت اشیا کا ذکر ملتا ہے ان میں سے ایک مرجان بھی ہے جسے بیش قیمت پتھر کہہ سکتے ہیں۔ توریت اور انجیل جیسی آسمانی کتب میں بھی اس پتھر کا ذکر آیا ہے۔

    کہتے ہیں ایک زمانے میں فلسطین کا شہر طائر اس پتھر کی تجارت کے لیے شہرت رکھتا تھا۔ اس کے حصول کے لیے بحرِ روم، بحرِ قلزم اور ہند ایک زمانے میں مشہور تھے۔ بیش قیمت اور نادر پتھروں کے علاوہ خوب صورت اور جاذبِ نظر پتھروں سے بھی زمانۂ قدیم میں بادشاہ اور امرا اپنے تخت و تاج مزین کرتے اور گھروں میں ان کا استعمال کیا جاتا تھا۔

    اس حوالے سے ماہر کاری گروں کی خدمات حاصل کی جاتی تھیں جو اس پتھر کی تراش خراش کے ساتھ اسے مہارت سے جڑنے کا کام کرتے اور اس کی قیمت کے ساتھ اپنے کام میں نفاست اور چابک دستی کی داد بھی پاتے تھے۔ اس سے زیورات تیار کرنے کے علاوہ نشست و پلنگ اور شاہانِ وقت کے زیرِ استعمال دیگر مصنوعات میں جڑا جاتا تھا۔

    یہ مختلف رنگوں کا ہوتا ہے۔ گہرا سرخ رنگ کا مرجان عمدہ و نفیس سمجھا جاتا ہے جب کہ گلابی، سفید اور دیگر رنگوں میں بھی مرجان پایا جاتا ہے۔ اس نگینے سے متعلق جہاں مستند مذہبی حوالے ملتے ہیں، وہیں اس کے بارے میں عجیب و غریب باتیں اور قصے بھی مشہور ہیں۔ یہ قدیم زمانے سے ہی داستانوں کا حصّہ رہا ہے اور اس سے پراسرار باتیں بھی منسوب کی جاتی ہیں۔ تاہم مسلمانوں کے نزدیک یہ اس لیے پاکیزہ و مقدس ہے کہ قرآن میں اس کا ذکر کیا گیا ہے۔

    مرجان کو اس کے خواص اور اس کے بعض اوصاف کی وجہ سے طبیب اور حکما نے مفید بھی بتایا اور کہتے ہیں کہ زمانۂ قدیم میں اسے مختلف امراض میں استعمال بھی کیا جاتا تھا۔

    طبِ یونانی میں خاص طور پر مرجان کو مفید بتایا گیا ہے اور اس حوالے سے کتب میں اس پتھر کے خواص اور امراض سے متعلق ذکر ملتا ہے۔

    طبِ یونانی میں مرجان کو جلا کر اس کی راکھ کو مخصوص طریقے سے بیماریوں کے علاج کے لیے استعمال کرنے کی ہدایت بھی کی جاتی تھی۔