چیمپئنز ٹرافی کے تیسرے میچ میں جنوبی افریقا نے افغانستان کو 107 رنز کے بھاری مارجن سے شکست دے دی۔
کراچی کے نیشنل اسٹیڈیم میں کھیلے گئے میچ میں جنوبی افریقا کی جانب سے دیے گئے 316 رنز کے تعاقب میں افغانستان کی ٹیم 48.3 اوورز میں 208 رنز پر ڈھیر ہوگئی۔
رحمت شاہ کے 90 رنز کی اننگز کے علاوہ کوئی بھی بیٹر خاطر خواہ کارکردگی نہ دکھا سکا۔
رحمان اللہ گرباز 10، ابراہیم زدران 17، کپتان حمشت اللہ شاہدی صفر اور محمد نبی 8 رنز بنا کر پویلین لوٹ گئے، راشد خان 18 رنز بنا کر مہاراج کا نشانہ بنے۔
جنوبی افریقا کی جانب سے ربادا نے تین کھلاڑیوں کو آؤٹ کیا، ویان ملڈر اور لنگی نگیدی نے دو، دو وکٹیں حاصل کیں۔
اس سے قبل جنوبی افریقا نے پہلے بیٹنگ کرتے ہوئے مقررہ اوورز میں 6 وکٹوں کے نقصان پر 315 رنز بنائے اور افغانستان کو جیت کے لیے 316 رنز کا ہدف دیا تھا۔
ریان ریکلٹن نے شاندار 103 رنز کی اننگز کھیلی، کپتان ٹمبا باووما 58، رسی وین ڈر ڈوسن 52 اور ایڈن مارکرم بھی 52 رنز بنا کر نمایاں رہے۔
ٹونی ڈی زورزی 11 رنز بنا کر آؤٹ ہوئے، ڈیوڈ ملر 14 رنز بنا کر فضل اللہ فاروقی کو وکٹ دے بیٹھے، مارکو جینسن بغیر کوئی رن بنائے پویلین لوٹ گئے، ویان ملڈر 12 رنز کے ساتھ ناٹ آؤٹ رہے۔
افغانستان کی جانب سے محمد نبی نے دو کھلاڑیوں کو آؤٹ کیا، فضل اللہ فاروقی، عظمت اللہ عمرزئی اور نور احمد نے ایک، ایک وکٹ حاصل کی۔
اس سے قبل جنوبی افریقا نے افغانستان کے خلاف ٹاس جیت کر بیٹنگ کا فیصلہ کیا تھا۔
ٹاس کے موقع پر جنوبی افریقہ کے کپتان نے کہا کہ افغانستان کیخلاف زیادہ سے زیادہ رنز کرنے کی کوشش کرینگے، یہ کہنا قبل ازوقت ہے کہ اس پچ پر کتنا اسکور بن سکتا ہے۔
View this post on Instagram
دوسری جانب افغانستان ٹیم کے کپتان نے کہا کہ ہم جلد سے جلد وکٹ حاصل کرنے کی کوشش کرینگے، اسپنرز بہت اچھی بولنگ کررہے ہیں امید ہے اچھا نتیجہ ملے گا۔
واضح رہے کہ چیمپئنز ٹرافی کے پہلے میچ میں نیوزی لینڈ نے پاکستان کو اور دوسرئ میچ میں بھارت نے بنگلا دیش کو شکست دی تھی۔
