اسلام آباد: آرمی چیف جنرل قمر جاوید باجوہ نے ساؤتھ ایشین گیمز سے متعلق اجلاس میں شرکت کی ہے۔
اے آر وائی نیوز کے مطابق پیر کو وزیر اعظم عمران خان کی زیر صدارت ساؤتھ ایشین گیمز سے متعلق اجلاس منعقد ہوا، جس میں آرمی چیف جنرل قمر جاوید باجوہ نے بھی شرکت کی۔
ذرائع کا کہنا ہے کہ اجلاس میں وفاقی وزیر بین الصوبائی رابطہ فہمیدہ مرزا اور دیگر حکام نے بھی شرکت کی، وزیر اعظم نے ساؤتھ ایشین گیمز کے پاکستان میں انعقاد کے انتظامات کی ہدایت کی۔
ذرائع کے مطابق اجلاس میں وزیر اعظم نے ساؤتھ ایشین گیمز سے متعلق ایک اسٹیئرنگ کمیٹی بنانے کی ہدایت کی، انھوں نے وزیر اعظم آفس اور تمام متعلقہ اداروں کو گیمز کے انعقاد کے لیے مکمل تعاون کے لیے کہا۔
وزیر اعظم کا کہنا تھا کہ پاکستان میں سیکیورٹی کی صورت حال بہترین ہے، کسی ملک کو پاکستان میں آ کر کھیلنے میں مسئلہ نہیں ہونا چاہیے، تمام کھلاڑیوں اور آفیشلز کو بہترین سیکیورٹی فراہم کی جائے گی۔
وزیر اعظم نے ہدایت کی کہ ساؤتھ ایشین گیمز کے لیے گراؤنڈز سمیت تمام انفرا اسٹرکچر بہتر کیا جائے، اور وزارت بین الصوبائی رابطہ اس سلسلے میں اپنی تیاری کر لے۔
