کراچی: شہر قائد کے علاقے سائٹ سپر ہائی وے میں ایک دل دہلا دینے والی واردات ہوئی ہے، لٹیروں نے نیوی کے ایک سابق اہل کار کو نشانہ بنا کر 10 لاکھ کی رقم لوٹی۔
اے آر وائی نیوز نے علاقے کی پولیس پر بڑا سوالیہ نشان لگانے والے اس واقعے کی مختلف سی سی ٹی وی فوٹیجز حاصل کی ہیں، جن میں دیکھا جا سکتا ہے کہ واردات کیسے کی گئی تھی۔
یہ واقعہ آج شام کو سائٹ سپر ہائی وے میں پیش آیا تھا، جب ڈاکوؤں نے ایک گاڑی پر اندھا دھند فائرنگ کی، اور اندر بیٹھے شخص سے 10 لاکھ سے زائد رقم چھین کر فرار ہو گئے۔
معلوم ہوا کہ ڈاکوؤں کی فائرنگ سے سابق سیکیورٹی افسر ریٹائرڈ کمانڈر اشتیاق زخمی ہوئے تھے، فوٹیجز کے مطابق 4 ڈاکو 2 موٹر سائیکلز پر سوار تھے، اور انھوں نے اشتیاق کو گھر پہنچتے ہی گھیر لیا۔
فوٹیجز میں لٹیروں کے چہرے بھی واضح طور پر دیکھے جا سکتے ہیں، جس سے علاقے میں ان کی بے خوفی کا پتا چلتا ہے، اور اسی لیے سندھ اسمبلی میں اپوزیشن لیڈر حلیم عادل شیخ نے مقامی ایس ایچ او پر مختلف قسم کے سنگین الزامات عائد کر کے ان کے ہٹائے جانے کا مطالبہ کیا ہے۔
فوٹیجز میں دیکھا جا سکتا ہے کہ ریٹائرڈ افسر نے جب گاڑی نہ روکی تو مسلح لٹیروں نے گاڑی پر فائرنگ کر دی، اور کچھ دیر کی مزاحمت کے بعد آخر کار انھوں نے گاڑی روک دی۔
معلوم ہوا کہ سابق نیوی کمانڈر اشتیاق بینک سے رقم نکلوا کر گھر پہنچے تھے، ڈاکوؤں نے ان کا وہیں سے پیچھا کیا تھا، اور ان کے گھر کی دہلیز پر پہنچتے ہی واردات کی اور فرار ہو گئے۔
واردات کے دوران گلی میں موجود بچوں اور دیگر افراد کو بھی سراسیمگی اور خوف سے ادھر ادھر بھاگتے دیکھا جا سکتا ہے۔
واضح رہے کہ حلقہ پی ایس 99 میں جرائم کی وارداتوں میں اضافہ ہو گیا ہے، پچھلے تین چار ماہ میں ڈکیتی کی بڑی وارداتیں، ٹارگٹ کلنگ، گینگ ریپ جیسے واقعات سامنے آ چکے ہیں۔
موٹر سائیکل چھیننے کی واردات، گولیوں سے 2 افراد کے زخمی ہونے کی فوٹیجز (بچے ویڈیو نہ دیکھیں)
واقعے پر اپوزیشن لیڈر سندھ اسمبلی حلیم عادل شیخ نے مذمت کرتے ہوئے کہا کہ میرے حلقے میں کرائم بڑھ چکا ہے اور کوئی روکنے والا نہیں، ایس ایچ او سائٹ سپر ہائی وے زمینوں پر قبضے اور بھتے لینے میں مصروف ہے، پولیس کی موبائل قبضہ کرنے اور کسی کا قبضہ چھڑوانے میں مصروف ہوتی ہے، اس کرپٹ اور بھتہ خور ایس ایچ او کو ہٹایا جائے۔
حلیم عادل شیخ نے کہا اگر جلد ملزمان گرفتار نہ ہوئے، اور امن و امان کی صورت حال بہتر نہ ہوئی تو سپر ہائی وے پر احتجاج کی قیادت میں خود کروں گا۔ انھوں نے کہا اس ایس ایچ او کے وقت میں قتل گینگ ریپ ڈکیتیوں کی بڑی وارداتیں ہو چکی ہیں، دو روز قبل ایک پولیس کا سپاہی ڈاکوؤں کے پیچھے گیا تو اسے مار دیا گیا، پولیس اہل کار کے قاتل بھی ابھی تک گرفتار نہیں ہوئے۔
