لاہور : سابق صدر آصف زرداری نے کہا ہے کہ طاہر القادری کے ساتھ مل کر شہباز شریف کے خلاف تحریک سڑک پر چلائیں گے اور اگر علامہ صاحب کا حکم ملا تو کنٹینر میں بھی پاکستان عوامی تحریک کے ساتھ کھڑے ہوں گے.

ان بعد اعلان انہوں نے ادارہ منہاج القرآن کے مرکزی دفتر میں سربراہ پاکستان عوامی تحریک طاہر القادری کے ہمراہ مشترکہ کانفرنس سے خطاب کرتے ہوئے کیا، آصف زرداری نے سانحہ ماڈل ٹاؤن پر شہباز شریف سے استعفیٰ کا بھی مطالبہ کردیا.

حکومت کے خلاف تحریک چلانے کے کا اعلان کرتے ہوئے سابق صدر کا کہنا تھا کہ ہم آئین کو توڑنے کی بات نہیں کر رہے بلکہ صرف حکومت سے لڑنے کی بات کر رہے ہیں جس کے لیے سڑکوں پہ آنا پڑا تو دریغ نہیں کریں گے.

انہوں نے مزید کہا کہ حکومت کی کارکردگی کا یہ عالم ہے کہ سی سی آئی کے اجلاس 6،6 ماہ نہیں ہوتے اور پورے ملک میں غیر یقینی صورت حال ہے جس میں پتہ ہی نہیں چل رہا ہے کہ کار حکومت کون چلا رہا ہے.

آصف زرداری نے کہا کہ ملک میں تبدیلی کا واحد طریقہ ووٹ ہی ہے اور ملک کے موجودہ مسائل کا حل صرف سیاسی قوتیں ہی حل کرسکتی ہیں چنانچہ اصولی بنیادوں پر طاہر القادری کے ساتھ کھڑے ہیں اسے سیاسی ڈیل کا نام نہیں دیا جائے۔

قبل ازیں پریس کانفرنس سے خطاب کرتے ہوئے سربراہ پاکستان عوامی تحریک طاہر القادری نے کہا کہ سانحہ ماڈل ٹاؤن نواز شریف کی ایما پر ہوا ہے جس کے کمانڈر رانا ثنا اللہ تھے اور جس کا حکم شہباز شریف نے دیا تھا چنانچہ نے شہباز شریف اور رانا ثنا اللہ فوری طور پر مستعفی ہوں۔

ڈاکٹر طاہر القادری نے کہا کہ مظلوموں کی مدد کیلئے جو بھی قدم اٹھانا پڑا تو اٹھائیں گے لیکن شہداء کے خون کا سودا نہیں کریں گے، مظلوموں کی آہ و بکا تخت رائے ونڈ کو ہلا دے گی اور جاتی امراء جلد اپنے منطقی انجام کو پہنچ جائے گا ۔

انہوں منہاج القرآن آمد پر سابق صدر آصف زرداری کا شکریہ ادا کرتے ہوئے کہا کہ یہ زرداری صاحب کا اپنا گھر ہے، مظلوموں کی دادرسی کے لیے ان کا جذبہ دیکھ کر بہت خوشی ہوئی ہے۔

اسلام آباد : سابق صدر آصف زرداری نے کہا ہے کہ پیپلز پارٹی نے شملہ سمجھوتے سے پاک بھارت کے درمیان جنگوں کو رُکوایا اور نیوکلیئر اور میزائل ٹیکنالوجی دے کر ملک کے دفاع کو مضبوط کیا.

ان خیالات کا اظہار انہوں نے پاکستان پیپلزپارٹی کے 50 ویں یوم تاسیس پر اپنے خصوصی پیغام میں کیا، پاکستان پیپلزپارٹی پارلیمنٹیرین کے صدر آصف زرداری نے کارکنوں اور تمام جمہوریت پسند عوام کو مبارک باد پیش کرتے ہوئے کہا کہ یہ دن خوشیاں منانے اور اپنی غلطیوں کا تجزیہ کرنے اور پارٹی کی تنظیم نو کرنے کا دن ہے.

آصف زرداری نے کہا کہ عوام کی خدمات کے حوالے سے پارٹی اپنے ریکارڈ پر فخر کرتی ہے جس نے تین آمروں کا مقابلہ کرنے کے ساتھ ساتھ ملک کو متفقہ آئین بھی دیا جب کہ شملہ سمجھوتہ اور پاک بھارت جنگ کے خاتمے کا سہرہ بھی پیپلز پارٹی کے سر جاتا ہے اسی طرح مسلم ممالک کو اجتماعی آواز دی اور 1971 میں بھی ہماری قیادت نے ہی گنوائی گئی زمین بھی وا گزار کرائی.

انہوں نے کہا کہ یہ پیپلز پارٹی کی حکومت تھی جس نے مشترکہ مفادات کونسل بنا کر صوبوں کو آواز دی اور پاکستانی معاشرے میں محکوم طبقے خواتین، محنت کشوں، کسانوں اور پسے ہوئے طبقات کو بااختیار بنایا اور پی پی نے ہی حبس بےجا کے قانون کو متعارف کرا کر بنیادی انسانی حقوق کا تحفظ کیا.

آصف زرداری نے کہا کہ پارٹی کے ریکارڈ اور جمہوریت کے لئے جدوجہد کا کوئی ثانی نہیں ہے جوہمیشہ جوڑ توڑ سے سیاسی تبدیلی کی مخالفت اور سیاسی انجینئرنگ، مذہبی و نسل پرستی تھوپنے کی کوششوں کی مخالفت کرتی آئی ہے جس کا ماننا ہے کہ سیاسی تبدیلی آزادانہ اور منصفانہ انتخابات کے ذریعے ہی آنی چاہیے.

اپنے پیغام میں کارکنوں کو پی پی کا امید اور ظلم وجبر سے نجات کا پیغام پھیلانے کی ہدایت کرتے ہوئے آصف زرداری کا مزید کہنا تھا کہ کارکنان خاموش اور مایوس عوام کو روشن صبح کی نوید سنائیں اور جمہوریت کے فروغ اور بھٹو کے نظریے کی ترویج میں دن رات ایک کردیں.

اسلام آباد : سابق صدر آصف زرداری نے کہا ہے کہ نواز شریف نے عدالتی فیصلے کو ججز کا غصہ اور بغض قرار دیا جس سے انہوں نے اپنا جمہوریت دشمن ایجنڈا خود ہی بے نقاب کر دیا.

وہ سپریم کورٹ کی جانب سے تفصیلی فیصلہ جاری ہونے کے بعد شریف خاندان کے ردعمل پر تبصرہ کررہے تھے انہوں نے کہا کہ نوازشریف نے عدالت کے خلاف مہم چلا کر ہمارے مؤقف کی تصدیق کردی ہے.

سابق صدر آصف زرداری نے کہا کہ نواز شریف سے تعاون کا مطلب سازش کا حصہ بننے کے مترادف ہے نواز شریف قوم کے ساتھ ڈبل گیم کر رہے ہیں ایک طرف ان کا بھائی اور کچھ وزراء میرے خلاف بیان دیتے ہیں تو دوسری طرف مجھے ملاقات کے پیغام بھیجے جا رہے ہیں.

انہوں نے کہا کہ قوم جان لے کہ نوازشریف نے ججز پرحملہ کرکے اپنا ایجنڈا سب کے سامنے رکھ دیا ہے عدلیہ پرحملہ آئین پرحملہ ہے اور آئین پر حملہ جمہوریت پر حملہ ہے البتہ میرا ایجنڈا سب کو معلوم ہے کہ ہم جمہوریت کے خلاف کسی سازش کا حصہ نہیں بنیں گے.

آصف زرداری نے کہا کہ نواز شریف اپنے آپ کو قانون اور احتساب سے بالا ترسمجھتے ہیں اور اپنے ہر دورِ حکومت میں فوج کو ذیر دست رکھنے کی کوشش کی لیکن اپنی مذموم کوشش میں کامیاب نہیں ہوئے.

انہوں نے کہا کہ نوازشریف نے اپنے وزیروں کو فوج و عدلیہ کے خلاف صف آراء کردیا ہے تاکہ اداروں کو بلیک میل کیا جاسکے اور اب تو معزز جج صاحبان پر ذاتی حملے کرنا بھی شروع کردیئے ہیں، نوازشریف جمہوری نظام کو سبوتاژ کرکے سیاسی شہید بننا چاہتے ہیں.

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔