کراچی : مسلم لیگ (ق) کے سربراہ چوہدری شجاعت نے کراچی بلاول ہاؤس میں سابق صدر آصف علی زرداری سے ملاقات کی جس میں حکومت مخالف تحریک اور پیپلز پارٹی کے چار مطالبات سمیت دیگر معاملات پر تبادلہ خیال کیا گیا۔
تفصیلات کے مطابق سابق صدر آصف علی زرداری اور مسلم لیگ (ق) کے صدر چوہدری شجاعت سے ملاقات کی ہے ملاقات کے دوران چئیرمین پیپلز پارٹی بلاول بھٹو زرداری اور وزیراعلی سندھ مراد علی بھی موجود تھے، دوران ملاقات سابق صدر کا کہنا تھا پاکستان میں جمہوریت کی مضبوطی کامطلب حکمرانوں کومضبوط کرنا نہیں، ہماری مفاہمت صرف جمہوریت سے ہے۔
اس موقع پرچوہدری شجاعت نے آصف علی زرداری کو لاہور آنے کی دعوت دیتے ہوئے کہا کہ اپوزیشن جماعتیں ایک نکاتی ایجنڈے پرمتفق ہوجائیں کیوں کہ اب انفرادی سیاست کا نہیں بلکہ مشترکہ جدوجہد کا وقت ہے۔
طویل عرصے بعد دونوں رہنماؤں میں ہونے والی ملاقات میں ساتھ مل کر چلنے پر اتفاق کیا گیا اور حکومت مخالف تحریک کے مراحل پر بھی غور کیا گیا۔
واضح رہے سابق صدر آصف علی زرداری 18 ماہ کی خود ساختہ جلاوطنی ختم کر کے 23 دسمبر کو کراچی پہنچے ہیں جب کہ چوہدری شجاعت اپنی پارٹی کے مختلف پروگرامز کے سلسلے میں کراچی کے دورے پر آئے ہوئے ہیں۔
