پاکستان کے سابق ٹیسٹ کرکٹر سرفراز نواز کی گزشتہ روز اسپتال سے وائرل ہونے والی تصویر نے ان کے پرستاروں کو تشویش میں مبتلا کر دیا۔
پاکستان کے سابق ٹیسٹ کرکٹر اور کرکٹ میں ریورس سوئنگ کے موجود سرفراز نواز کی گزشتہ روز اسپتال سے ایک تصویر سوشل میڈیا پر وائرل ہوئی۔ اس تصویر میں وہ اسپتال کے بستر پر ہیں اور ان کے جسم پر آلات لگے ہوئے ہیں۔
یہ تصویر وائرل ہوتے ہی ان کے پرستاروں سمیت شائقین کرکٹ میں تشویش کی لہر دوڑ گئی اور وہ سابق فاسٹ بولر کی بیماری سے متعلق جاننے کے لیے بے چین ہو گئے۔
تاہم اب سرفراز نواز نے اپنی وائرل تصویر کے حوالے سے ویڈیو بیان جاری کیا ہے۔ اس بیان میں انہوں نے اپنی صحت سے متعلق بھی اپنے پرستاروں کو بتایا ہے۔
سابق قومی کرکٹر نے اپنے وضاحتی ویڈیو بیان میں کہا ہے کہ سوشل میڈیا پر جو میری تصویر وائرل ہوئی ہے، وہ میرے دل کے سالانہ چیک اپ کی ہے۔
انہوں نے کہا کہ سالانہ چیک تو ہمیشہ ہوتا ہے۔ تاہم پریشانی کی کوئی بات نہیں، میری صحت ٹھیک ہے۔
واضح رہے کہ سرفراز نواز کو کرکٹ میں ریورس سوئنگ کا بانی کہا جاتا ہے، جس سے آنے والے وقت میں بولرز نے بڑا نام کمایا۔ 70 اور 80 کی دہائی میں پاکستان کے یہ عظیم فاسٹ بولر مخالف بلے بازوں کے لیے دہشت کی علامت سمجھے جاتے تھے۔
