کولمبو : سری لنکا کے سابق نیول چیف ایڈمرل نشانتھا الوگتنے کو 15 سال پرانے اغوا اور گمشدگی کے کیس میں گرفتار کر لیا گیا ہے۔
تفصیلات کے مطابق سری لنکن پولیس نے بحریہ کے سابق سربراہ ایڈمرل نشانتھا الوگتنے کو 15 سال قبل پیش آنے والے ایک پراسرار اغوا اور گمشدگی کے کیس میں حراست میں لے لیا ہے۔
یہ واقعہ سال 2010 میں پیش آیا تھا جب ایک 48 سالہ شخص اچانک لاپتہ ہو گیا تھا۔
پولیس حکام نے بتایا کہ ایڈمرل الوگتنے اُس وقت سری لنکن نیوی کے انٹیلیجنس ڈائریکٹوریٹ کے سربراہ کی حیثیت سے فرائض انجام دے رہے تھے۔
تاہم معاملے کی تازہ تفتیش کے دوران ان کا بیان ریکارڈ کیا گیا، جس کے بعد انہیں باقاعدہ گرفتار کر کے عدالت میں پیش کیا گیا۔
عدالت نے ایڈمرل الوگتنے کو ریمانڈ پر پولیس کے حوالے کر دیا ہے اور انہیں بدھ تک تفتیشی تحویل میں رکھنے کا حکم دیا گیا ہے تاکہ مزید شواہد اکٹھے کیے جا سکیں۔
ایڈمرل نشانتھا الوگتنے 2020 سے 2022 تک سری لنکن بحریہ کے 24 ویں سربراہ کے طور پر خدمات انجام دے چکے ہیں اور ریٹائرمنٹ کے بعد وہ کیوبا میں سری لنکا کے سفیر بھی مقرر کیے گئے تھے۔
ان کے خلاف یہ گرفتاری ایک سنجیدہ نوعیت کی کارروائی سمجھی جا رہی ہے جو ماضی کے حساس اور غیر حل شدہ کیسز کی نئی چھان بین کی عکاسی کرتی ہے۔