سکھر میں 7 سہلیوں کے مزار سے منسوب کہانی دنیا بھر کے سیاحوں کے لیے توجہ کا باعث ہے، مگر کیا ان کہانیوں کا ذکر تاریخ کی کتابوں میں بھی موجود ہے؟
اس مزار سے جڑی کہانی کی حقیقت کیا ہے؟
مزار کی تعمیر کب ہوئی اور کون کون سی شخصیات یہاں مدوفون ہیں؟ اس ویڈیو میں دیکھیں۔
سکھر: دریائے سندھ کے کنارے روہڑی کے قریب 7 سہیلیوں کا مزار تاریخ کے صفحوں میں تو کہیں نہیں ملتا، البتہ یہ ایک تفریحی مقام ضرور بن چکا ہے۔
صوبہ سندھ میں روہڑی کے قریب واقع اس مزار میں 7 نمایاں قبریں موجود ہیں جن پر خوبصورت نقش و نگار بنے ہیں۔ بعض روایات میں انہیں 7 بہنوں اور بعض میں 7 سہیلیوں کی قبریں بتایا گیا ہے۔
روایات کے مطابق یہ سات نیک دامن بیبیاں تھیں جنہوں نے اس وقت کے حکمران یا چند اوباشوں سے محفوظ رہنے کے لیے اس جگہ پناہ لی اور خدا سے اپنی عزت و آبرو کے تحفظ کی دعا مانگی۔
ان کی یہ دعا اس طرح قبول ہوئی کہ ایک چٹان ان پر آ گری اور ساتوں سہیلیاں چل بسیں، یہ بھی کہا جاتا ہے کہ وہ زندہ زمین میں دفن ہوگئیں۔ اس مقام کے بارے میں کوئی تاریخی دستاویز دستیاب نہیں۔
اس مقام کو سندھی زبان میں ستین جو آستان یعنی 7 سہیلیوں کا آستانہ کہا جاتا ہے اور ملک بھر سے سیاح اس مقام کو دیکھنے آتے ہیں۔