اترپردیش: بھارت میں سارس سے دوستی شہریوں کو مہنگی پڑنے لگی ہے، ایک اور شہری کے خلاف مقدمہ درج کر لیا گیا۔
بھارتی میڈیا رپورٹس کے مطابق ریاست اتر پردیش کے شہر امیٹھی میں سارس رکھنے والے عارف خان کے خلاف مقدمے کے بعد ایک اور شہر سلطان پور میں بھی ریاستی پرندے سارس کی پرورش کرنے پر ایک شہری افروز خان کے خلاف وائلڈ لائف پروٹیکشن ایکٹ کے تحت مقدمہ درج ہو گیا۔
افروز خان اور سارس کی ویڈیو بھی سوشل میڈیا پر وائرل ہو گئی تھی، جس پر بدھ کے روز محکمہ جنگلات کے اہل کار متحرک ہو گئے، اور پھرتیاں دکھاتے ہوئے اہل کاروں نے افروز خان سے سارس چھین لیا۔
افروز نے بتایا کہ انھیں 6 ماہ قبل سارس ملا تھا، جو اس وقت بہت چھوٹا تھا، اور انھوں نے گھر پر اس کی پرورش کی، اب سارس سے اس کی دوستی بہت گہری ہو گئی ہے۔
سارس سے دوستی شہری کو مہنگی پڑ گئی
افروز کے مطابق دونوں مل کر کھانا کھاتے تھے، اور اکثر جب افروز گھر سے نکلتا تھا تو سارس بھی اڑ کر اس کے پیچھے آ جاتا۔
محکمہ جنگلات کا کہنا تھا کہ سارس مکمل طور پر صحت مند اور محفوظ ہے۔
