Tag: سارنگی نواز

معروف سارنگی نواز استاد اللہ رکھا خان کو یہ اعزاز حاصل ہے کہ انھوں نے بانی پاکستان قائداعظم کے سامنے اپنے فن کا مظاہرہ کیا۔ آج نہ تو وہ شخصیات رہیں اور نہ ہی وہ سارنگی باقی بچی جس کے بے روح وجود کو ایک ماہر اپنے فن و مہارت سے گویا زندہ کرنا جانتا تھا۔

پاکستان کے معروف سارنگی نواز استاد اللہ رکھا خان 27 جنوری 2002ء کو وفات پاگئے تھے۔ برصغیر پاک و ہند میں‌ کلاسیکی موسیقی کے عروج کے دور میں مختلف سازوں اور ان کے بجانے والوں کو بھی بڑی عزّت اور احترام حاصل رہا ہے اور ان کی شہرت دور دور تک ہوتی تھی۔ استاد اللّہ رکھا خان بھی انہی میں سے ایک تھے۔ وقت گزرا تو یہ ساز بھی متروک ہوگئے اور سازندے دنیا سے ایک ایک کرکے اٹھتے چلے گئے۔ آج نہ تو سارنگی کی شکل ہمارے ذہنوں میں محفوظ ہے اور نہ ہی وہ فن کار جنھیں موسیقی کی دنیا میں کبھی اہمیت اور مقام حاصل تھا۔ دوسری طرف موجودہ دور میں موسیقی پر مبنی کسی پروگرام میں اس فن اور اس سے وابستہ ان ناموں کا تذکرہ بھی نہیں کیا جاتا جو کبھی ہاتھوں کی جنبش اور سانس کے زیر و بم سے سُر اور موسیقی چھیڑا کرتے تھے۔ شاید اسی کا نام گردشِ دوراں ہے۔ مگر ہندستانی موسیقی، اور تقسیم کے بعد سرحد کے دونوں اطراف بسے ان فن کاروں کا ذکر کتابوں میں اب بھی ملتا ہے اور یہ ساز اب بھی کسی میوزیم میں دیکھے جاسکتے ہیں۔

ہندوستانی کلاسیکی سنگیت میں سارنگی وہ ساز تھا جس کے بارے میں‌ کہا جاتا ہے کہ یہ انسانی آواز سے سب سے زیادہ ملتا ہے۔ سارنگی نواز استاد اللہ رکھا خان 1932ء میں سیالکوٹ کے ایک گاؤں میں پیدا ہوئے۔ وہ بچپن ہی میں امرتسر چلے گئے تھے، اور وہیں اپنے والد استاد لال دین سے سارنگی بجانی سیکھی۔ بعدازاں استاد احمدی خان، استاد اللہ دیا اور استاد نتھو خان جیسے ماہر سازندوں سے استفادہ کیا۔ تقسیمِ ہند کے بعد وہ 1948ء میں پاکستان آگئے تھے۔ یہاں وہ ریڈیو پاکستان میں ملازم ہوگئے اور 1992ء تک اسی سے وابستہ رہے۔

سارنگی نواز استاد اللہ رکھا کو 1994ء میں حکومتِ پاکستان نے صدارتی تمغہ برائے حسنِ کارکردگی عطا کیا تھا۔

متحدہ ہندوستان اور تقسیم کے بعد دونوں ممالک میں کئی بڑے نام تھے جو اپنے فن میں یکتا اور ہنر میں بے مثال تھے۔ ایک زمانہ میں جب فن و ثقافت اور ہنر کی قدر تھی تو موسیقی کی دنیا میں بندو خاں کا نام بڑے احترام سے لیا جاتا تھا۔ انھیں یہ کمال حاصل تھا کہ وہ سارنگی کی مدد سے مختلف سریلی اور نازک آوازیں نکال سکتے تھے جو عام طور پر سازوں کے ذریعے نہیں پیدا کی جا سکتیں۔

معروف موسیقار اور سارنگی نواز بندو خان کا یہ تذکرہ ان کی برسی کی مناسبت سے کیا جارہا ہے۔ وہ 13 جنوری 1955ء کو وفات پاگئے تھے۔

آج کلاسیکی موسیقی کی دنیا کے بندو خان اور ان جیسے کئی فن کار اور ماہر سازندے ہی ہمارے درمیان موجود نہیں بلکہ بدقسمتی یہ ہے کہ سارنگی اور اس جیسے کئی ساز اپنی تمام تر نزاکت و دل کشی اور کمال و ہنر کے باوجود متروک ہوچکے ہیں۔ نئی نسل کو سارنگی سے کوئی دل چسپی نہیں اور یوں بھی انھیں اس کی باریکیاں کون بتائے اور اس کا سلیقہ قرینہ کوئی نوجوان موسیقار کس سے سیکھے؟ پھر جدید موسیقی میں تو سارنگی کی کوئی گنجائش ہی نہیں ہے۔

حکومتِ پاکستان نے 1959ء میں بعد از مرگ استاد بندو خان کو صدارتی تمغہ برائے حسنِ کارکردگی عطا کیا تھا۔ بندو خان نے موسیقی اور سارنگی کا ابتدائی درس اور سازوں کی تربیت اپنے والد علی جان خان سے لی، پھر اپنے ماموں اُستاد مَمَن سے موسیقی کی تعلیم پائی اور ریاضت کرکے فن کو نکھارا۔ آل انڈیا ریڈیو، دہلی اسٹیشن کا قیام عمل میں لایا گیا تو اس سے منسلک ہو گئے۔ بندو خان ریاست رام پور اور اندور کے دربار میں بھی اپنے فن کا مظاہرہ کرکے عزّت اور انعام پاتے رہے تھے۔

کہتے ہیں کہ ہندوستان کی قدیم کلاسیکی موسیقی کو سمجھنے اور اس کا حق ادا کرنے کی غرض سے استاد بندو خان نے سنسکرت بھی سیکھی تھی۔ یہ ان کے اپنے فن سے لگاؤ اور جنون کی ایک مثال ہے۔

بندو خان 1880ء میں دہلی میں پیدا ہوئے۔ ان کے والد علی جان خان بھی سارنگی نواز تھے جب کہ سُر ساگر کے موجد ممّن خان ان کے ماموں تھے۔ یوں اپنے گھر میں فنِ موسیقی پر باتیں اور ساز کا مظاہرہ دیکھتے ہوئے بندو خان بھی اس کے شیدائی ہوگئے۔ قیامِ پاکستان کے بعد بندو خان کراچی چلے آئے تھے۔ یہاں ریڈیو پاکستان سے وابستہ ہوئے اور اسی شہر میں ان کا انتقال ہوا۔

استاد بندو خان کو 500 راگوں پر مکمل دسترس حاصل تھی۔ کہا جاتا ہے کہ ” تان پلٹے “، ” روایتی بندشیں“، ” راگ مالکوس “، ” راگ ملہار “ اور ” راگ بھیرویں “ استاد کے آگے ہاتھ باندھے کھڑے رہتے تھے۔ استاد بندو خاں نے سارنگی بجانے میں تو کمال حاصل کیا مگر وہ اس میں نت نئی تبدیلیاں کرنے کا بھی سوچتے رہتے تھے، اور سارنگی کے تاروں کی تعداد 34 سے گھٹا کر 12 کر دی جس کی وجہ سے اس کے سریلے پن میں اضافہ ہو گیا۔ بندو خان کلاسیکی موسیقی پر بھی مکمل عبور رکھتے تھے۔

افسوس سے کہنا پڑتا ہے کہ استاد بندو خان اپنے فن کے اوج اور نہایت پذیرائی کے باوجود کبھی مالی طور پر آسودہ نہ ہوسکے۔ بہت تنگی ترشی سے وقت گزارا۔ ان کی قدر دانی زبانی جمع خرچ اور واہ وا تک محدود تھی۔ بندو خان نے اُردو اور ہندی میں دو کتابیں بھی تحریر کی تھیں جن کے نام ” جوہرِ موسیقی “ اور ” سنگیت وِوِیک درپَن“ ہیں۔