Tag: سارہ شریف

لندن: سارہ شریف قتل کیس کی سماعت مکمل ہو گئی، اب جیوری اپنا فیصلہ دے گی۔

تفصیلات کے مطابق 10 سالہ سارہ شریف کے قتل کیس میں والد، سوتیلی ماں اور چچا کے خلاف اولڈ بیلی کی عدالت میں چلنے والے مقدمے کی سماعت مکمل ہو گئی، جج نے جیوری کو اپنا فیصلہ دینے کے لیے کہہ دیا ہے۔

جیوری ممبران کیس پر غور کرنے کے بعد الگ الگ اپنا فیصلہ دیں گے، یہ جیوری 9 خواتین اور 3 مردوں پر مشتمل ہے، ہائیکورٹ کے جج نے جیوری ممبران کو ہدایت کی کہ اگر ہو سکے تو وہ ایک متفقہ فیصلے کے ساتھ واپس آئیں۔

جج نے جیوری سے یہ بھی کہا کہ وہ ہر ملزم کے خلاف قتل کے متبادل الزام کے طور پر غیر ارادی قتل کی فرد جرم پر بھی غور کر سکتے ہیں۔

سارہ شریف کی لاش گزشتہ سال ووکنگ، سرے میں اپنی رہائش گاہ سے ملی تھی، واقعے کے بعد سارہ کے والد، چچا اور سوتیلی والدہ پاکستان فرار ہو گئے تھے، سارہ کے جسم پر تشدد کے درجنوں نشانات پائے گئے تھے۔

43 سالہ عرفان شریف، 30 سالہ بینش بتول اور 29 سالہ فیصل ملک پر قتل اور اقدام قتل کی فرد جرم عائد ہے، سارہ کے والد نے سماعت کے دوران جرم کے ارتکاب کا اعتراف کیا تھا تاہم سوتیلی والدہ اور چچا نے صحت جرم سے انکار کیا ہے۔

لندن: 10 سالہ سارہ شریف قتل کیس کی سماعت کا لندن کے اولڈ بیلی کی عدالت میں گزشتہ روز باقاعدہ آغاز ہو گیا ہے، عدالت کو بتایا گیا کہ مقتولہ کے والد نے پولیس کو فون کال میں‌ قتل کا اعتراف کیا ہے۔

استغاثہ نے عدالت کو بتایا کہ 10 سالہ سارہ شریف کے والد عرفان شریف نے پاکستان سے پولیس کو فون کیا اور اعتراف کیا کہ اس نے سارہ کو ان کے سرے کے گھر میں قتل کیا ہے۔

عرفان شریف نے یہ اعتراف 8 منٹ کی کال میں گزشتہ سال 10 اگست کو ان کے اہل خانہ کی پرواز کے اسلام آباد میں لینڈنگ کے تقریباً ایک گھنٹے بعد کیا تھا۔

تاہم 42 سالہ عرفان شریف، سارہ کی سوتیلی ماں 30 سالہ بینش بتول اور اس کے چچا فیصل ملک نے اولڈ بیلی میں لڑکی کو قتل کرنے سے انکار کیا ہے۔

پراسیکیوٹر نے دعویٰ کیا کہ سارہ کی موت کی ذمہ دار بینش بتول ہیں، پراسیکیوٹر بل ایملن جونز کیوسی نے عدالت کو بتایا کہ سارہ طویل مدت تک پرتشدد حملوں کا شکار رہی۔

انھوں نے بتایا کہ سارہ کے جسم پر تشدد کے نمایاں نشانات پائے گئے، جسم پر استری کے نشان اور کئی ہڈیاں بھی ٹوٹی تھیں، دانتوں کے کاٹنے کے نشانات بھی موجود تھے۔

پولیس نے بیان دیا کہ سوتیلی ماں بینش بتول نے اپنے دانتوں کے نمونے دینے سے انکار کیا ہے، پراسیکیوشن نے مزید کہا کہ سارہ کو اپنی پسلیوں، کندھے کے بلیڈ، انگلیوں اور ریڑھ کی ہڈی میں 11 علیحدہ فریکچر کے ساتھ ساتھ دماغی تکلیف دہ چوٹ کے نشانات کا بھی سامنا کرنا پڑا۔

کیس کی سماعت ایک دن کے لیے ملتوی کر دی گئی، اور اس کی سماعت آج پھر کی جائے گی۔