Tag: سارہ شریف قتل کیس

دس سالہ بچی سارہ شریف کے قتل کا مقدمہ آئندہ سال سنا جائے گا،ابتدائی سماعت اسی سال کے آخر میں کی جائے گی۔

تفصیلات کے مطابق اولڈ بیلی کورٹ کا کہنا ہے کہ دس سالہ سارہ شریف کے قتل کا مقدمہ آئندہ سال 24 ستمبر کو سنا جائے گا۔ جج مارک لوکرافٹ کے مطابق عدالت ابتدائی سماعت اسی سال یکم دسمبر کو کرے گی ۔

حالیہ سماعت کے دوران ملزمان ہائی سیکیورٹی بیل مارش جیل سے بذریعہ ویڈیو لنک شامل ہوئے، مقدمہ مسلسل چھ ہفتے سنا جائے گا۔

پراسیکیوٹر کی جانب سے عدالت کو سارہ کی موت کے اسباب بتائے گئے۔ پراسیکیوٹر کا کہنا تھا کہ سارہ کے جسم پر شدید تشدد کے نشانات پائے گئے تھے۔

عدالت کو پراسیکیوٹر نے بتایا کہ سارہ کی پسلیاں فریکچرڈ تھیں، سارہ شریف کا برین ہیمبرج بھی ہوا تھا۔ سارہ کی باڈی 10 اگست کو گھر کے بیڈ روم سے ملی تھی۔

سارہ کا والد، سوتیلی ماں اور چچا 9 اگست کو پاکستان چلے گئے تھے۔ تینوں افراد کو 13 ستمبر کو لندن واپسی پر حراست میں لیا گیا تھا۔ پولیس نے تینوں افراد کو قتل اور وجہ قتل کے جرم میں چارج کیا تھا۔

لندن : سارہ شریف قتل کیس میں برطانوی پولیس نے بچی کے والد اور سوتیلی ماں کو لندن پہنچتے ہی گرفتار کرلیا ، گرفتار افراد گذشتہ روز پاکستان فرار ہوئے تھے۔

تفصیلات کے مطابق برطانیہ میں قتل ہونےوالی دس سالہ بچی سارہ شریف کے والدین کو لندن میں گرفتار کرلیا گیا، پولیس حکام نے بتایا کہ والد عرفان ،سوتیلی ماں بینش اور چچا کوفیصل گیٹ وِک ایئرپورٹ سے شک کی بنیادپرگرفتارکیاگیا ہے۔

برطانوی پولیس نے گرفتاری کی تصدیق کرتے ہوئے کہا کہ سارہ شریف کے والد عرفان شریف، سوتیلی والدہ بینش اور چچا فیصل ملک کو برطانیہ میں لینڈ کرتے ہی گرفتار کرلیا ہے۔

گذشتہ روز گرفتارافراد پاکستان فرار ہوگئےتھے اور سیالکوٹ ائیرپورٹ سے براستہ دبئی برطانیہ پہنچےتھے۔

انٹرپول کی درخواست پر پنجاب پولیس گزشتہ ایک ماہ سےملزمان کو تلاش کررہی تھی اور ملزمان کی گرفتاری کےلیے چھ ٹیمیں تشکیل دی گئی تھیں۔

گذشتہ ہفتے سارہ کی سوتیلی ماں بینش بتول نے ایک ویڈیو جاری کیا تھا، جس میں کہا تھا کہ پولیس فیملی کو ہراساں کررہی ہے، خدشہ ہے کہ تشدد کرے مار دے گی ۔

یاد رہے پاکستان میں عرفان اور بینش کے پانچ بچے پولیس کی حفاظتی تحویل میں ہیں ۔ پولیس ریکارڈ کے مطابق جہلم سے تعلق رکھنے والے عرفان شریف نے دوہزار نو میں برطانیہ میں پولش خاتون سے شادی کی تھی، جن سے ان کی ایک بیٹی اور بیٹے کی پیدائش ہوئی۔

عرفان شریف اپنی دوسری بیوی بینش بتول اور بچوں کے ساتھ سرے منتقل ہو گئے تھے، جس کے بعد سارہ شریف کی لاش دس اگست کوگھر سےملی تھی ، پوسٹمارٹم رپورٹ میں سارہ کے جسم پرزخموں کے نشانات پائے گئے تھے۔

جہلم : پولیس نے برطانیہ میں سارہ شریف قتل کیس کے مرکزی ملزم والد عرفان شریف کے 5 بچوں کو تحویل میں لے لیا، بچوں میں نعمان،حنا،بساء،احسان اوراذلان شامل ہیں۔

تفصیلات کے مطابق برطانیہ میں 10 سالہ سارہ شریف مبینہ قتل کیس کی تحقیقات جاری ہے ، جہلم پولیس نے مقتول بچی کے والد عرفان شریف کے گھر اور جنرل اسٹور پر دروازہ توڑ آپریشن کیا۔

ڈی پی او ناصرمحمود نے بتایا کہ سارہ شریف مبینہ قتل میں ملوث والد، والدہ اور چچاکی تلاش جاری ہے، آپریشن میں ملزم عرفان شریف کے 5 بچوں کو تحویل میں لے لیا۔

ناصرمحمود کا کہنا تھا کہ بچوں میں نعمان،حنا،بساء،احسان اوراذلان شامل ہیں، بچوں کو تحویل میں لینے کیلئے انٹرپول نے ییلو وارنٹ جاری کیے تھے، سارہ شریف کےمبینہ قاتلوں کو جلدگرفتارکرلیں گے۔

انہوں نے کہا کہ تحویل میں لیے جانے والے پانچوں بچوں کو ڈی پی او کے ریٹرنگ روم میں رکھا گیا ہے، بچوں کو سیف کسٹڈی کے تحت دادا کو دیا جائے گا۔

چند روز قبل برطانیہ میں پاکستانی نژاد بچی سارہ شریف کی پراسرار ہلاکت کے معاملے پر سوتیلی ماں کا ویڈیو بیان سامنے آیا تھا ، جس میں بینش بتول نے دعویٰ کیا تھا کہ سارہ سیڑھیوں سے گری، موت ایک حادثہ ہے، جو بھی ہو رہا ہے اس سے ہماری فیملی شدید متاثر ہوئی ہے۔

بینش بتول کا کہنا تھا کہ میرے شوہرعرفان کے والد نے ایسا کوئی بیان نہیں دیا ،ہمارا خاندان خوف کا شکار ہے ، بچے اسکول نہیں جارہے،برطانوی حکام سے تعاون کرنے کو تیار ہیں، اپنا مقدمہ عدالت میں لڑیں گے۔

یاد رہے برطانیہ میں دس سالہ پاکستانی نژاد لڑکی کی پراسرار موت کے بعد برطانوی پولیس کو فرار ہونے والے مقتولہ بچی کے والد اور سوتیلی والدہ کی تلاش ہے۔

برطانوی پولیس کی درخواست پر جہلم میں مقتولہ بچی کے باپ ملک عرفان شریف کے بھائیوں کو حراست میں لیا تھا۔

خیال رہے برطانوی پولیس کو دس سالہ سارہ شریف کی لاش دس اگست کو گھرسے ملی تھی، جس کے بعد سے اس کا باپ ملک عرفان دوسری بیوی اور چار بچوں سمیت غائب تھا، جن کےبارے میں پتہ چلا کہ وہ پاکستان پہنچ گئے ہیں۔