آکسفورڈ: سانحہ آرمی پبلک اسکول کے زخمی احمد نواز کو برٹش ایمپائر میڈل سے نوازا گیا ہے، جو پاکستان کے لیے ایک اور اعزاز ہے۔
تفصیلات کے مطابق 16 دسمبر 2014 کو پشاور کے آرمی پبلک اسکول میں پیش آنے والے قیامت خیز سانحے میں زخمی ہونے والے طالب علم احمد نواز کو برطانوی اعزاز پیش کیا گیا، جو کہ باشاہ چارلس کی طرف سے دیا گیا ہے۔
احمد نواز کو یہ اعزاز نوجوانوں کو با اختیار بنانے کے لیے کی گئی جدوجہد پر دیا گیا ہے، اعزاز ملنے کے بعد احمد نواز نے گفتگو کرتے ہوئے کہا کہ اس اعزاز کا ملنا ان کے لیے قابل فخر اور حوصلہ افزا ہے۔
احمد نواز نے کہا ’’میں نوجوانوں کو مزید با اختیار بنانے اور امن کے قیام کے لیے کوششیں جاری رکھوں گا، اس طویل سفر میں ساتھ دینے پر سب کا شکر گزار ہوں۔‘‘ انھوں نے پاکستان کے لیے اپنی محبت کا اظہار کرتے ہوئے کہا کہ ملک سے محبت ان کے ایمان کا حصہ ہے۔
سانحہ اے پی ایس کے زخمی احمد نواز نے آکسفورڈ یونیورسٹی سے گریجویشن مکمل کر لی
یاد رہے کہ اس سے قبل بھی احمد نواز نے ایک منفرد اعزاز حاصل کیا تھا، مارچ 2022 میں وہ آکسفورڈ یونیورسٹی کی اسٹوڈنٹس یونین کے صدر منتخب ہوئے تھے، وہ بینظیر بھٹو کے بعد یہ عہدہ حاصل کرنے والے دوسرے پاکستانی تھے۔
احمد نواز کو حکومت نے سرکاری خرچ پر 2015 میں علاج کے لیے برطانیہ بھیجا تھا، جہاں اُن کا علاج کوئین الزبتھ اسپتال میں ہوا، برطانوی ڈاکٹرز نے ان کا علاج کیا جس کے بعد وہ صحت مند زندگی کی طرف لوٹے اور پھر لندن میں ہی تعلیم کا آغاز کیا۔
