لاہور: وزیراعظم نوازشریف اور وزیراعلیٰ پنجاب شہباز شریف سمیت اکیس افراد کیخلاف قتل کا مقدمہ درج کرنے کا حکم،تفصیلات کے مطابق لاہور کی سیشن عدالت نے سانحہ ماڈل ٹاؤن کے مقدمے میں وزیر اعظم نواز شریف اور وزیر اعلیٰ پنجاب شہباز شریف سمیت اکیس افراد کیخلاف مقدمہ درج کرنے کا حکم دیدیا ہے،
اطلاعات کے مطابق مذکورہ کمیشن کی رپورٹ کو وزیر اعلیٰ شہباز شریف نے سات روز تک دبائے رکھا، رپورٹ میں ہر پولیس افسر کی نا اہلی اور ذمہ داری کا تعین بھی کیا گیا ہے۔
لاہور: وزیر اعلی پنجاب شہباز شریف نے کہا ہے مڈ ٹرم الیکشن کا سوال ہی پیدا نہیں ہوتا ۔
لاہور میں میڈیا سے گفتگو میں کہنا تھا ملک میں تبدیلی صرف انتخابات کے ذریعے ہی آسکتی ہے ، مڈ ٹرم الیکشن کا سوال ہی پیدا نہیں ہوتا، ان کا کہنا تھا پاکستا ن کےعوا م ہرلانگ مارچ کو نا کام بنا دیں گے،پاکستان کسی لانگ مارچ کے نتیجہ میں نہیں بنا،چودہ اگست تجدیدعہد کادن ہے، ان کا کہنا تھا لانگ مارچ کا مقصد معیشت کو ترقی کے سفرسےروکناہے۔
لاہور: مسلم لیگ ق کے رہنما چوہدری پرویز الہٰی نے کہا کہ دس اگست کو ماڈل ٹاون میں یوم شہداء کے پروگرام میں مسلم لیگ ق کے کارکن بڑی تعداد میں شریک ہوں گے۔
مسلم لیگ ہاوس لاہور میں پارٹی عہدیداروں کے اجلاس سے خطاب کے بعد میڈیا سے گفتگوکرتے ہوئے انہوں نے کہا کہ انقلاب مارچ ہر صورت ہوگا اور کارکن اپنا سامان اور راشن وافر مقدار میں لے کرآئیں کیونکہ حکومت کے خاتمہ تک ہم اسلام آباد سے نہیں اٹھیں گے،انہوں نے کہا کہ چودہ شہداء کا خون کے ذمہ دار شہباز شریف ہیں اور ملزمان کو ہر صورت کیفرکردار تک پہنچنا ہوگا،چوہدری پرویز الہٰی نے مزید کہا کہ انقلاب مارچ اور آئندہ کے لائحہ عمل کا اعلان دس اگست کو کیاجائے گا۔
لاہور: انسداد دہشت گردی عدالت نے سانحہ ماڈل ٹاون کے مرکزی کردار گلو بٹ کے خلاف مقدمے کی سماعت نو اگست تک ملتوی کرتے ہوئے پولیس کو جلد چالان مکمل کرنے کا حکم دے دیا۔
گُلو بٹ کوآج چودہ روزہ جوڈیشل ریمانڈ مکمل ہونے کے بعد عدالت میں پیش کیا گیا، اس موقع پر سیکورٹی کے سخت انتظامات تھے، اس موقع پر ایس ایچ او سبزہ زارعامر سلیم سمیت پانچ پولیس اہلکاروں کو بھی عدالت میں پیش کیا گیا، اہلکاروں میں ایس آئی حافظ اظہر سمیت تین کانسٹیبل شامل ہیں، گرفتار اہلکار سات روزہ جسمانی ریمانڈ پر تھے۔
پولیس کی جانب سے استدعا کی گئی کہ مزید تفتیش کیلئے مہلت دی جائے، جس پرعدالت نے پولیس کو تفتیش جلدازجلد مکمل کرکے چالان عدالت میں پیش کرنے کی ہدایت کی جبکہ گرفتار پانچ پولیس اہلکاروں کے جسمانی ریمانڈ میں بھی چھ روز کی توسیع کردی گئی، عدالت نے ایس ایچ او عامر سلیم ، ایس آئی حافظ اظہر سمیت ملزمان کے جسمانی ریمانڈ میں توسیع کرتے ہوئے پولیس کو ہدایت کی انھیں آٹھ اگست کو دوبارہ پیش جائے اور کیس کی سماعت نو اگست تک ملتوی کردی۔
لاہور: وزیر اعلیٰ پنجاب نے سانحہ ماڈل ٹائون کی ذمہ اری رانا ثنا ء اللہ پر ڈال دی، وزیر علی کے بیان کے بعد عدالتی کمیشن کی تحقیقات مکمل ہوگئیں۔
جسٹس علی باقرنجفی پرمشتمل عدالتی کمیشن نے ماڈل ٹاؤن واقعے کی تحقیقات مکمل کرلیں،کمیشن کی سفارشات حکومت پنجاب کوبھجوائی جائیں گی،کمیشن کے روبرو وزیراعلیٰ پنجاب کابیان حلفی پڑھ کرسنایاگیا، جس میں کہاگیاتھاکہ منہاج القرآن سیکریٹریٹ کے باہر رکاوٹیں ہٹانے کافیصلہ رانا ثنااللہ کی سربراہی میں ہونے والے اجلاس ہوا،ٹی وی کے ذریعے واقعے کاعلم ہوا جس پرپرنسپل سیکرٹری کی سرزنش کی اورمنہاج القرآن کے باہر سے پولیس ہٹانے کا حکم دیالیکن کچھ دیر بعد پتہ چلا کہ سیکریٹریٹ کے باہرفائرنگ سے لوگ شہید اور زخمی ہوگئے ہیں جس کے بعد سی سی پی او لاہور ، ڈی آئی جی آپریشنز اور ایس پی ماڈل ٹاون ہٹانےکاحکم دیا۔
لاہورکی مقامی عدالت میں سانحہ ماڈل ٹاؤن کامقدمہ شریف برادارن سمیت اکیس افراد کےخلاف چلانےکی درخواست کی سماعت ہوئی، عدالت نے گرفتار پانچ پولیس اہلکاروں کے جسمانی ریمانڈ میں سات دن کی توسیع کردی۔انسداد دہشت گردی کی عدالت نے ایس پی سیکیورٹی علی سلمان اورگن مین کی ضمانتوں میں توسیع کی درخواست نوا گست تک منظورکرلی۔
لاہور :مسلم لیگ ق کے سربراہ چوہدری شجاعت نےآزادی مارچ اور انقلاب کے اکٹھا ہونے کی خواہش ظاہر کرتے ہوئے کہا ہےکہ ظلم کے بعد اب انقلاب کی باری ہے۔ یہ بات انھوں نے سانحہ ماڈل ٹاؤن میں جاں بحق لڑکی کے اہلخانہ سے ملاقات کے موقع پر کہی۔
چوہدری شجاعت کا کہنا تھاسانحہ ماڈل ٹاؤن کا مقدمہ اللہ کے ہاں درج ہوچکا، حکمرانوں کو اللہ کی عدالت میں جواب دینا پڑے گا،انھوں نےکہا سانحہ ماڈل ٹاؤن کی تاحال ایف آئی آر درج نہیں کی گئی، سانحے میں شہید ہونے والوں کی قربانیاں رائیگاں نہیں جانے دیں گے۔
لاہور: علامہ طاہر القادری نےکہاہےٹربیونل میں پیش کردہ حقائق میں وزیراعلٰی پنجاب جھوٹے ثابت ہو گئے،قاتل نہ بھی ہوں، نااہل ضرور ہیں،انہیں مستعفی ہو جانا چاہیئے۔
سانحہ ماڈل ٹاؤن پر آل پارٹیز ویمن کنونشن سے خطاب کرتے ہوئے ڈاکٹر طاہرالقادری کا کہنا تھا کہ ٹربیونل میں پیش کردہ حقائق کے مطابق وزیراعلٰی شہباز شریف کو آپریشن کی تمام معلومات فراہم کی جا رہی تھیں،پاکستان عوامی تحریک کے سربراہ کا کہنا تھا کہ حکومت نے جوڈیشل کمیشن کو ذمہ داروں کے تعین کا اختیار دے کر واپس لے لیا، پھر اس سے انصاف کی کیا توقع کی جا سکتی ہے۔
ڈاکٹر طاہرالقادری کا کہنا تھا کہ ایک ماہ گزرنے کے باوجود مقتولین کے لواحقین کی ایف آئی آر درج نہیں ہو سکی، کنونشن میں شریک خواتین سیاستدانوں نے منہاج القرآن کے شہداء کو خراج عقیدت پیش کرتے ہوئے مکمل یکجہتی کا اظہار کیا، ڈاکٹر طاہرالقادری نے کہا کہ آئین کی پامالی کرنے والی حکومت اب بھی سمجھتی ہے کہ وہ آئین کی وفادار ہے اور اسے پارلیمنٹ میں بیتھنے کا حق ہے، جو درحقیقت وہ کھو چکی ہے۔
لاہور: سانحہ ماڈل ٹاؤن کےمرکزی کردار گلو بٹ چودہ روزہ ریمانڈ پر جیل بھیج دیا گیا، عدالت نے آئندہ سماعت پر مکمل تفتیشی رپورٹ پیش کرنے کا حکم دے دیا ہے۔
سانحہ ماڈل ٹاؤن کے مرکزی کردار گلو بٹ کو چودہ روزہ جوڈیشل ریمانڈ پر جیل بھیج دیا گیا، عدالت نے آئندہ سماعت پر تفتیش مکمل کرکے رپورٹ پیش کرنے کا حکم بھی دے دیا ہے۔
پولیس نے گیارہ روزہ ریمانڈ مکمل ہونے پر گلو بٹ کو انسداد دہشت گردی کی عدالت میں پیش کیا، پولیس نے عدالت کو بتایا کہ وہ گلوبٹ سے تفتیش مکمل کرچکے ہیں، جس کے بعد انسداد دہشت گردی کی خصوصی عدالت کے جج خالد محمود رانجھا نے گلو بٹ کو جوڈیشل ریمانڈ پر جیل بھیجنے کا حکم دیا۔
ایس پی سیکیورٹی علی سلمان کی عبوری ضمانت میں چھبیس جولائی تک توسیع کردی، پولیس نے موقف اختیارکیا کہ ایس پی سیکیورٹی علی سلمان اور محافظ عابد سے تفتیش جاری ہے، عدالت نے سانحہ ماڈل ٹاؤن میں گرفتار پانچ پولیس اہلکاروں ایس ایچ او عامر سلیم، اے ایس آئی حافظ اظہر، کانسٹیبل کاشف، نوید اور خرم کے جسمانی ریمانڈ میں چھبیس جولائی تک توسیع کر دی۔عدالت نے آئندہ سماعت پرمکمل تفتیشی رپورٹ کی جمع کرانے کا حکم دیا ہے۔
لاہور:ڈاکٹر طاہرالقادری کہتے ہیں نواز شریف مناظرہ کی دعوت قبول کرلیں تو انہیں سو من مٹھائی کھلائیں گے۔
لاہور میں پریس کانفرنس کے دوران مولانا طاہر القادری بھرپور فارم میں نظر آئے۔ وزیراعظم کی خوش خوراکی پر چوٹ کرتے ہوئے انہیں مناظرے کے لئے مٹھائی کی لالچ دے ڈالی، طاہر القادری کا کہنا تھا کہ وزیراعظم ٹکر مارنے کے عادی ہیں،انقلاب کا موسم بتاتے ہوئے کہتے ہیں کہ صحافیوں کو نئے کپڑے سلوانے کی ضرورت نہیں،پاکستان عوامی تحریک کے قائد کا کہنا ہے کہ انقلاب کے بعد پولیس میں درندوں کو نکال کر دس لاکھ نوجوانوں کو بھرتی کریں گے۔
لاہور: ماڈل ٹائون میں پولیس کی فائرنگ سے آٹھ افرد کی شہادت کو ایک ماہ ہو گیا، علامہ طاہر القادری نے کہا ہے کہ وزیر اعظم نواز شریف ا ور شہباز شریف کو قصاص دیناہوگا۔
سانحہ ماڈل ٹائون میں پولیس کی فائرنگ میں آٹھ افراد کی شہادت کو ایک ماہ ہو گیا ، اس موقع پر ڈاکٹر طاہرالقادری نے خصوصی پیغام میں کہاکہ نواز شریف اور وزیر اعلٰی شہباز شریف کو شہداء کے خون کا قصاص دینا ہو گا، اسلام آباد میں سانحہ ماڈل ٹائون کیخلاف آبپارہ میں مظاہرہ ہو ا جس سے عوامی تحریک کے رہنما عمرعباسی جمشید دستی،شیخ رشید اورجے سالک اور احمد رضا قصوری شریک ہوئے ۔
کراچی میں پریس کلب کےباہر ریلی میں عوامی تحریک،کے علاوہ مسلم لیگ ق ، متحدہ قومی موومنٹ، تحریک انصاف، مجلس وحدت المسلمین، سنی اتحاد کونسل، آل پاکستان مسلم لیگ، اور دیگر جماعتوں کےنمائندوں نے شرکت کی ، فیصل آباد میں عوامی تحریک کی ریلی کی قیادت مرکزی ناظم اعلیٰ تحریک منہاج القرآن زاہد فیاض نے کی ریلی کے اختتام پر شہدا کی یاد میں چوک گھنٹہ گھر پر شمعیں روشن کی گئیں ۔
کوئٹہ میں پریس کلب کے سامنے احتجاجی مظاہرہ کیا گیا ، عوامی تحریک کے رہنما ڈاکٹر اشتیاق احمد بلوچ ، خالد احمد اور دیگر کا کہنا تھا کہ سانحہ ماڈل ٹاون کی تمام تر ذمہ داری حکومت پنجاب پر عائد ہوتی ہے، گوجرانوالہ میں پاکستان عوامی تحریک نے احتجاجی ریلی نکالی شیرانوالہ باغ سے ہوتی ہوئی ریل بازار پہنچ کرختم ہوئی۔