Tag: سانحہ ماڈل ٹاؤن

لاہور : سابق صدر آصف زرداری نے کہا ہے کہ نواز شریف نے خود کو مجیب الرحمان بننے سے تعبیر کیا ہے، پاکستان کی وحدت اور سالمیت کو جاتی امراء کے مجیب الرحمان سے خطرہ ہے حالانکہ مسلم لیگ (ن) کے ساتھ تو وہ کچھ ہوا ہی نہیں جو پی پی کے رہنماؤں اور کارکنان نے بھگتا ہے.

وہ لاہور میں متحدہ اپوزیشن کے جلسے سے خطاب کررہے تھے، سابق صدر نے کہا کہ میں نے کچھ ماہ پہلے ہی بتا دیا تھا کہ نواز شریف گریٹر پنجاب کا سوچ رہا ہے اور آج نواز شریف نے مجیب الرحمان بننے کا عندیہ دے کر میری بات کو سچ ثابت کر دیا ہے.

انہوں نے سابق وزیر اعظم نواز شریف کو مخاطب کرتے ہوئے کہا کہ نوازشریف! آپ کے ساتھ ابھی ہوا ہی کیا ہے؟ ہمارے تو قائد کو پھانسی پر لٹکایا گیا اور بی بی کو شہید کیا گیا پھربھی ہم نے پاکستان کھپے کا نعرہ لگایا.

آصف زرداری نے کہا کہ ملک کو کمزور کرنا نواز شریف کی اولین خواہش ہے کیوں کی یہ مودی کے یار ہیں اور ملک سے غداری کی روش پر گامزن ہیں جس کے لیے مجیب الرحمان بننے کی خواہش سے بھی گریز نہیں کر رہے ہیں.

صدر پی پی پی پی کا کہنا تھا کہ ہم کسی صورت ملک کے خلاف سیاست نہیں کریں گے کیوں کہ ہم پاکستان میں ہی جینا چاہتے ہیں اور اسی سرزمین پر مرنا چاہتے ہیں جب کہ ان کا مفاد بس جاتی امراء تک محدود ہے .

آصف زرداری نے کہا کہ ہم جمہوریت کا سفر پورا کرنا چاہتے ہیں لیکن ہمیں مجبورکیا جا رہا ہے کہ شریف برادران کو نکالنے کیلئے جمہوریت کا سفر پورا نہ کریں، سیاست کرنا ہمارا حق ہے ہم ہرحال میں سیاست کریں گے.

انہوں نے کہا کہ جمہوریت عزیز ہے اس لیے کچھ نہیں کیا وگرنہ جب چاہوں شریف خاندان کوحکومت سے نکال سکتا ہوں لیکن چاہتا ہوں کہ یہ خود سے ماڈل ٹاؤن اور قصور کی معصوم بچی کو انصاف نہ دلانے پر مستعفی ہوجائیں.

خیال رہے کہ لاہور میں پاکستان عوامی تحریک کی جانب سے سانحہ ماڈل ٹاؤن کے لواحقین کے لیے انصاف کے حصول اور شہباز شریف و رانا ثناء اللہ کے استعفے کے لیے احتجاجی جلسہ منعقد کیا جارہا ہے جس کے پہلے سیشن سے آصف زرداری نے خطاب کیا جب کہ دوسرے سیشن سے عمران خان کچھ دیر میں خطاب کریں گے۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

اسلام آباد : ترجمان پاکستان تحریک انصاف فواد چوہدری نے کہا ہے کہ پی ٹی آئی اور پی پی سمیت کل لاہورمیں تمام سیاسی جماعتیں اکٹھی ہوں گی تاہم کسی کو غلط فہمی نہ رہے کہ کوئی سیاسی اتحاد ہونے جا رہا ہے، عمران خان اور زرداری کے نظریات یکسر مختلف ہیں.

ان خیالا کا اظہار انہوں نے اسلام آباد میں پریس کانفرنس سے خطاب کرتے ہوئے کیا، فواد چوہدری کا کہنا تھا کہ سانحہ ماڈل ٹاؤن 2014 میں وقوع پذیر ہوا جب پولیس نے براہ راست فائرنگ کر کے نہتے عوام کو موت کے گھاٹ اتارا جنہیں تاحال انصاف نہیں مل سکا ہے.

انہوں نے کہا کہ سانحہ ماڈل ٹاؤن کے شہداء کے لواحقین کو انصاف دلوانے کے لیے تمام سیاسی جماعتیں طاہر القادری احتجاجی تحریک میں شامل ہوں گی تاہم اسے انتخابی اتحاد سے تعبیر نہیں کیا جائے، مظلوم کی حمایت ایک طرف لیکن پیپلز پارٹی اور تحریک انصاف کے نظریاتی اختلاف اپنی جگہ موجود ہیں.

فواد چوہدری نے احتجاج سے متعلق تفصیلات بتاتے ہوئے کہا کہ کل کے احتجاج کو 2 سیشن میں تقسیم کیا گیا ہے ایک سیشن میں عمران خان جب کہ دوسرے سیشن میں آصف زرداری آئیں گے اس لیے اسٹیج پر ان دونوں رہنماؤں کی بہ یک وقت موجودگی خارج از امکان ہے.

ترجمان پی ٹی آئی نے کہا کہ پاکستان عوامی تحریک کا احتجاج ایک روزہ ہے جہاں ریلی نہیں نکالی جائے گی بلکہ جلسہ عام منعقد کیا جائے گا اور اگر مطالبات نہ مانے گئے تو احتجاج کے دائرہ کار کو بڑھایا بھی جاسکتا ہے جو شہباز شریف کے مستعفی ہونے پر ہی ختم ہوگا.

فواد چوہدری نے کہا کہ اسپیکر قومی اسمبلی خود قصور سے ہیں جہاں درندگی کے 12 واقعات ہوئے اور جب عوام ڈی سی او کے خلاف احتجاج کے لیے نکلی تو پولیس کی براہ راست فائرنگ سے ہلاکتیں بھی ہوئیں جس سے ثابت ہوا کہ مسلم لیگ (ن) نے سانحہ ماڈل ٹاؤن سے کوئی سبق حاصل نہیں کیا.

ترجمان پی ٹی آئی نے کہا کہ سانحہ ماڈل ٹاؤن ہو یا قصور زیادتی کیس ہو، پنجاب حکومت مکمل طور پر ناکام ہو چکی ہے جہاں جعلی پولیس مقابلے ایک رواج بن چکے ہیں اور آج ہی پنجاب پولیس نے تین افراد کو مقابلے میں قتل کیا جن کے بارے میں کہا جا رہا ہے وہ زیادتی میں ملوث تھے.

خیال رہے کہ سربراہ پاکستان عوامی تحریک طاہر القادری نے اپنے ایک بیان میں کہا تھا کہ سانحہ ماڈل ٹاؤن کے شہداء کے لواحقین کو انصاف دلوانے کے لیے کل لاہور میں ہونے والے احتجاج میں عمران خان اور آصف زرداری ایک ساتھ اسٹیج پر موجود ہوں گے۔

اگرآپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔

لاہور: چیئرمین پاک سرزمین پارٹی مصطفیٰ کمال کا کہنا ہے کہ کراچی چلے گا تو پاکستان بھی آگے بڑھے گا۔

تفصیلات کے مطابق لاہور میں پاک سرزمین پارٹی کے سربراہ مصطفیٰ کمال میڈیا سے گفتگو کرتے ہوئے کہا کہ نجفی صاحب نے جن کو ذمہ دارقراردیا انہیں گرفتارکیا جائے۔

مصطفیٰ کمال نے کہا کہ سانحہ ماڈل ٹاؤن متاثرین کے ساتھ ہیں، سانحہ ماڈل ٹاؤن سے متعلق اے پی سی میں شرکت کررہے ہیں۔

پاک سرزمین پارٹی کے سربراہ نے کہا کہ جن پرظلم ہوا ان سے اظہاریکجہتی کے لیے آئے ہیں، ظلم پرخاموش رہ کر خود کو ظالم نہیں کہلوانا چاہتے۔

چیئرمین پی ایس پی مصطفیٰ کمال نے کہا کہ ماڈل ٹاؤن میں معصوم لوگوں پرگولیاں برسائی گئیں۔

انہوں نے کہا کہ کراچی پربرسوں سے را کا ایجنٹ قابض تھا، را کے ایجنٹوں کے خلاف نکلے ہیں، پاکستانی عوام کامیاب ہوں گے۔

مصطفیٰ کمال نے کہا کہ را کے ایجنٹ ایم پی ایزاورایم این ایزکی صورت میں بھی تھے، انہوں نے کہا کہ ملک سے جتنا مذاق ہونا تھا ہوگیا خمیازہ ابھی بھی بھگت رہے ہیں۔

پاک سرزمین پارٹی کے سربراہ نے کہا کہ الیکشن سے پہلے کسی سے کوئی اتحاد نہیں ہوگا، جس کومینڈیٹ ملا الیکشن کے بعد اتحاد کا سوچیں گے۔

مصطفیٰ کمال نے کہا کہ پی ایس پی اپنے طورالیکشن میں بھرپورحصہ لے گی، انہوں نے کہا کہ ڈولفن ہماراانتخابی نشان ہے اسی کے تحت الیکشن لڑیں گے۔

چیئرمین پاک سرزمین پارٹی نے کہا کہ کراچی چلے گا تو پاکستان بھی آگے بڑھے گا، انہوں نے کہا کہ این آراوکی طرح مذاق ہوتا رہا توپاکستان کا اللہ ہی حافظ ہے۔

اگر آپ کو یہ خبر پسند نہیں آئی تو برائے مہربانی نیچے کمنٹس میں اپنی رائے کا اظہار کریں اور اگر آپ کو یہ مضمون پسند آیا ہے تو اسے اپنی فیس بک وال پر شیئر کریں۔