ARYNews.tv | Urdu – Har Lamha Bakhabar

Tag: سانحہ مچھ

  • ملاقات میں وزیر اعظم نے بلیک میلنگ والے جملے کی وضاحت کر دی: آغا رضا

    ملاقات میں وزیر اعظم نے بلیک میلنگ والے جملے کی وضاحت کر دی: آغا رضا

    کوئٹہ: مجلس وحدت مسلمین پاکستان کے رہنما آغا رضا نے کہا ہے کہ وزیر اعظم نے ملاقات میں بلیک میلنگ والے جملے کی وضاحت کر دی ہے۔

    اے آر وائی نیوز کے مطابق آج کوئٹہ میں وزیر اعظم عمران خان سے ملاقات کے بعد آغا رضا نے میڈیا سے گفتگو کی، انھوں نے کہا وزیر اعظم نے تمام مطالبات پر عمل درآمد کی یقین دہانی کرائی ہے۔

    آغا رضا کا کہنا تھا وزیر اعظم سے ملاقات میں بلیک میلنگ والے جملے پر احتجاج ریکارڈ کرایا، وزیر اعظم نے کہا کہ بلیک میلنگ والا جملہ پی ڈی ایم سے متعلق کہا تھا۔

    ایم ڈبلیو ایم کے رکن نے کہا شہدا کے لواحقین کوفی کس 25 لاکھ روپے دیےگئے ہیں، وزیر اعظم نے یقین دہانی کرائی کہ آئندہ ایسے واقعات رونما نہیں ہوں گے، وزیر اعظم کو بڑا مان کر شہدا کے ورثا نے کوئٹہ بلایا تھا۔

    بلوچستان میں دہشت گردی کے پیچھے بھارت ملوث ہے، وزیراعظم

    آغا رضا نے کہا 22 سالوں سے ہزارہ قوم کے ساتھ ظلم ہو رہا ہے، وزیر اعظم نے یقین دہانی کرائی کہ بائیس سالوں سے جاری ظلم کا ازالہ کریں گے۔

    انھوں نے مزید کہا دھرنے کے پلیٹ فارم سے جو لوگ بات کر رہے تھے وہ شہدا کی ترجمانی تھی، خالق ہزارہ سے متعلق لواحقین کا فیصلہ تھا کہ انھیں وزیر اعظم سے ملاقات میں شامل نہ کیا جائے، دھرنے کے خلاف بات کرنے والوں کو شامل نہ کرنے کا فیصلہ لواحقین کا تھا۔

    واضح رہے کہ سانحہ مچھ میں شہید کان کنوں کی آج ہزارہ قبرستان میں تدفین کر دی گئی ہے، نماز جنازہ میں وفاقی وزیر علی زیدی، زلفی بخاری اور ڈپٹی اسپیکر قاسم سوری سمیت صوبائی وزرا اور شہریوں کی بڑی تعداد نے شرکت کی، بعد ازاں وزیر اعظم عمران خان بھی وعدے کے مطابق لواحقین سے ملنے کوئٹہ پہنچ گئے۔

  • سانحہ مچھ میں شہید کان کنوں کی نمازجنازہ ادا کردی گئی

    سانحہ مچھ میں شہید کان کنوں کی نمازجنازہ ادا کردی گئی

    کوئٹہ: سانحہ مچھ میں شہید کان کنوں کی نمازجنازہ ادا کردی گئی، شہدا کی تدفین ہزارہ قبرستان میں کی جائے گی، ہزارہ برادری کے منتظمین سے حکومتی ٹیم کے مذاکرات کامیاب کے بعد شہدا کے ورثا نے تدفین کی اجازت دی تھی۔

    تفصیلات کے مطابق سانحہ مچھ میں شہید کان کنوں کی نمازجنازہ ادا کردی گئی، نمازجنازہ میں وفاقی وزیرعلی زیدی ،زلفی بخاری اورڈپٹی اسپیکرقاسم سوری سمیت صوبائی وزرا اور شہریوں کی بڑی تعداد نے شرکت کی۔

    سانحہ مچھ کےشہدا کی تدفین ہزارہ قبرستان میں کی جائے گی ، قبرستان میں تدفین کے حوالے سے تمام انتظامات مکمل ہیں۔

    اس سے قبل وزیر داخلہ بلوچستان میرضیااللہ لانگو نے امام بارگاہ ولی عصر میں میڈیا سے بات چیت کرتے ہوئے کہا دھرنا مظاہرین اور منتظمین کے تمام مطالبات کل منظور کر لیے ہیں ، حکومت گورننس سےبالکل غافل نہیں ہے۔

    گذشتہ رات ہزارہ برادری کے دھرنے میں منتظمین سے حکومتی ٹیم کے مذاکرات کامیاب ہو گئے تھے اور دھرنے میں شریک شہدا کے ورثا نے تدفین کی اجازت دے دی تھی، جس کے بعد منتظمین نے پورے ملک میں دھرنے ختم کرنے کا اعلان کیا تھا۔

    حکومتی وفد کا کہنا تھا کہ وزیر اعظم ہزارہ برادری سے کیا ہوا ہر وعدہ پورا کریں گے، جبکہ شہدا کے لواحقین نے کہا تھا کہ ہم چاہتے ہیں وزیر اعظم آ کر مظلوموں کے سر پر شفقت کا ہاتھ رکھیں۔

    وزیر اعلیٰ بلوچستان نے مذاکرات کے بعد خطاب میں کہا تھا کہ وزیر اعظم عمران خان لواحقین کے پاس آئیں گے اور ان کے مسائل سنیں گے، آرمی چیف بھی جلد ہزارہ برادری سے ملاقات کریں گے، اور بلوچستان میں سیکورٹی کی بہتری کے لیے اقدامات سے آگاہ کریں گے۔

  • اندرون اور بیرون ملک کی 50 سے زائد پروازیں منسوخ

    اندرون اور بیرون ملک کی 50 سے زائد پروازیں منسوخ

    کراچی: ملک بھر میں احتجاجی دھرنوں کے باعث قومی ایئر لائن سمیت غیر ملکی ایئر لائنز کی اندرون اور بیرون ملک کی 50 سے زائد پروازیں منسوخ کر دی گئیں۔

    تفصیلات کے مطابق سانحہ مچھ کے لواحقین سے اظہار ہم دردی کے لیے شہر کراچی سمیت ملک بھر میں دھرنوں کا سلسلہ جاری ہے، کراچی میں 28 سے زائد مقامات پر دھرنوں کی وجہ سے تمام اہم شاہراہیں ٹریفک کے لیے بند کی گئی ہیں۔

    4 روز سے جاری دھرنوں کی وجہ سے فضائی آپریشن بری طرح متاثر ہو گیا ہے، پی آئی اے سمیت غیر ملکی ایئر لائنز کی درجنوں پروازیں منسوخی کا شکار ہو گئی ہیں۔

    ایئر پورٹ حکام کا کہنا ہے کہ ایئر لائنز کے فضائی عملے سمیت مسافروں کو ایئر پورٹ جانے میں مشکلات پیش آ رہی ہیں جس کی وجہ سے پروازیں منسوخ اور تاخیر کا شکار ہو رہی ہیں۔

    کراچی میں راستوں کی بندش، پی آئی اے کا پروازوں کیلیے اہم اقدام

    حکام کے مطابق غیر ملکی ایئر لائنز کی کراچی سے بنکاک، دبئی، شارجہ، دمام، کویت اور کولمبو کی 21 دو طرفہ پروازیں منسوخ کی گئیں، جب کہ پی آئی اے کی کراچی سے لاہور، پشاور، کوئٹہ، اسلام آباد کی دو طرفہ 8 پروازیں منسوخی کا شکار ہو گئی ہیں۔

    اسلام آباد سے غیر ملکی ایئر لائنز کی اسلام آباد سے جدہ، بینکاک، بیجنگ، قسیم کی 8 پروازیں منسوخی کا شکار ہوئی ہیں، جب کہ پی آئی اے کی اسلام آباد سے اسکردو، دبئی، جدہ، گلگت، چترال کی دو طرفہ 10 پروازیں منسوخی کا شکار ہو چکی ہیں۔

    پی آئی اے کی لاہور سے کراچی اور دبئی کی دو طرفہ 4 پروازیں منسوخ ہوئیں، نجی ایئر لائنز کی اندرون و بیرون ملک کی دو طرفہ 8 پروازیں منسوخی کا شکار ہوئی ہیں۔

  • آپ کے دور میں ماڈل ٹاؤن واقعہ ہوا، کیا آپ گئیں؟ صحافی کا مریم نواز سے سوال

    آپ کے دور میں ماڈل ٹاؤن واقعہ ہوا، کیا آپ گئیں؟ صحافی کا مریم نواز سے سوال

    کراچی: شہر قائد میں کوئٹہ دورے سے واپسی پر پاکستان مسلم لیگ ن کی مرکزی نائب صدر مریم نواز نے میڈیا سے گفتگو کی، جس میں انھوں نے وزیر اعظم کے بیان کو تنقید کا نشانہ بنایا تاہم ایک صحافی کے سوال پر وہ کوئی جواب نہ دے سکیں۔

    میڈیا سے گفتگو کے دوران صحافی نے مریم نواز سے سوال کیا ’آپ کے دورمیں ماڈل ٹاؤن کا واقعہ ہوا، کیا آپ گئی تھیں؟‘ تاہم مریم نواز نے ماڈل ٹاؤن کے حوالے سے کئے گئے اس سوال کو یک سر نظر انداز کر دیا۔

    صحافی نے مریم نواز سے سوال کیا کہ سانحہ ماڈل ٹاؤن کے لواحقین سے آپ اور نواز شریف کتنی بار ملے؟ نواز دور میں ہزارہ برادری کے سیکڑوں افراد شہید ہوئے آپ کتنی بار گئیں؟

    مریم نواز ان سوالوں کا کوئی جواب نہ دے سکیں، جب کہ انھوں نے اپنی گفتگو میں وزیر اعظم عمران خان پر شدید تنقید کرتے ہوئے کہا کہ انھیں صرف ان کی انا لواحقین کے پاس جانے سے روک رہی ہے۔

    لواحقین تدفین کریں، گارنٹی دیتا ہوں آج ہی کوئٹہ آؤں گا، وزیراعظم

    مریم نواز کا کہنا تھا کہ وزیر اعظم نے مظلوموں کو بلیک میلر کہہ کر انسانیت کی توہین کی۔ واضح رہے کہ وزیر اعظم عمران خان نے آج اسلام آباد میں ایک تقریب سے خطاب میں کہا تھا کہ شہدا کی تدفین کے لیے وزیر اعظم کی آمد کی شرط رکھنا مناسب نہیں، لواحقین آج تدفین کریں تو آج ہی کوئٹہ آ جاؤں گا۔

    انھوں نے کہا کہ یہ کسی ملک میں نہیں ہوتا کہ وزیر اعظم کو بلیک میل کریں، میں نے کہا ہے یہ جیسے ہی تدفین کریں گے تو میں کوئٹہ جاؤں گا، آج تدفین کریں تو آج ہی کوئٹہ جاؤں گا، جب سارے مطالبات مان لیے ہیں تو دفنانے پر شرط کیوں؟

    مریم نواز نے اپنی تنقید میں کہا کہ جسے کوئٹہ جانےکی اجازت نہ ملی وہ کیسے کسی کو این آر او دے گا، کیا وزیر اعظم لاشوں کو این آر او دیں گے؟ یہ نہ کہیں کہ سیاست کی جارہی ہے، سیاست قوم اور عوام کی خدمت کرنے کا نام ہے۔ تاہم جب اسی عوامی خدمت کے تناظر میں صحافی نے ان سے ماڈل ٹاؤن اور ہزارہ برادری سے متعلق سوال کیا تو انھوں نے نظر انداز کر دیا۔

  • سانحہ مچھ: افغان حکومت کی 7 میتوں کی بطور افغان شہری شناخت، ناموں کی فہرست جاری

    سانحہ مچھ: افغان حکومت کی 7 میتوں کی بطور افغان شہری شناخت، ناموں کی فہرست جاری

    کوئٹہ : افغان حکومت نے سانحہ مچھ میں جاں بحق ہونے والے 7 افراد کی بطور افغان شہری شناخت کرتے ہوئے ناموں کی فہرست بھی جاری کردی۔

    تفصیلات کے مطابق افغان حکومت نے سانحہ مچھ میں جاں بحق 11میں سے 7 افغان باشندوں کی فہرست جاری کردی ہے ، جاں بحق افغان باشندوں کی فہرست افغان قونصل جنرل نے جاری کی۔

    مچھ واقعےمیں جاں بحق افغان شہریوں میں چمن علی،عزیز، نسیم ، عبداللہ ،شیرمحمد،حسن جان ، انور علی شام شامل ہیں۔

    دوسری جانب ترجمان بلوچستان حکومت لیاقت شاہوانی کی جانب سے بیان میں کہا گیا ہے کہ سانحہ مچھ میں افغان حکومت کی7میتوں کی بطور افغان شہری شناخت کردی۔

    لیاقت شاہوانی کا کہنا تھا کہ افغان حکومت نے حکومت پاکستان سے 3میتوں کو ان کے حوالے کرنے کی درخواست کی ہے، 3میتوں کےلواحقین نےافغانستان میں افغان حکومت کو درخواست دی، بلوچستان حکومت صورتحال کا جائزہ لےرہی ہے، بلوچستان حکومت اپنی مینڈیٹ کےتحت کردارادا کرے گی۔

    یاد رہے افغان قونصلرجنرل نے وزارت خارجہ کوخط لکھا تھا، جس میں کہا گیا تھا کہ مچھ دہشت گردحملےمیں جاں بحق ہونےوالوں میں سے7اافغانی تھے، جاں بحق 3 افراد کے لواحقین نے میتیں افغانستان بھیجنے کی درخواست کی ہے۔

    واضح رہے بلوچستان کے علاقے مچھ نامعلوم دہشت گردوں نے ڈیرے میں سوئے 11 کان کنوں کو پہلے یرغمال بنایا، پھر ان کے ہاتھ پاؤں باندھ کر قتل کردیا تھا، جاں بحق کان کنوں کا تعلق کوئٹہ سے تھا۔

  • بلوچستان حکومت کی معطلی کا مطالبہ نہیں کیا: مجلس وحدت مسلمین

    بلوچستان حکومت کی معطلی کا مطالبہ نہیں کیا: مجلس وحدت مسلمین

    کوئٹہ: مجلس وحدت المسلمین (ایم ڈبلیو ایم) کے رہنما سید آغا رضا نے کہا ہے کہ سوشل میڈیا پر غلط خبریں پھیلائی گئیں کہ بلوچستان حکومت کی معطلی کا مطالبہ کیاگیا ہے، ہماری جانب سے بلوچستان حکومت کی معطلی کی کوئی بات نہیں ہوئی۔

    اے آر وائی نیوز کے مطابق رہنما ایم ڈبلیو ایم سید آغا رضا نے میڈیا سے گفتگو میں کہا کہ ہم نے مچھ واقعے کے خلاف دھرنا دیا تھا، اور اس وقت جنازے بھی موجود نہیں تھے، اگلے دن لواحقین خود جنازے لے آئے اور دھرنے میں شریک ہوئے۔

    ان کا کہنا تھا جو مطالبات پیش کیے گئے ہیں وہ لواحقین نے پیش کیے، ہم نے نہیں، بلوچستان حکومت کی معطلی کی بات نہیں ہوئی تھی، سوشل میڈیا پر غلط خبریں پھیلائی گئیں، بلوچستان حکومت کی معطلی کی کوئی بات نہیں ہوئی نہ مطالبہ تھا۔

    ادھر آے آر وائی نیوز کے پروگرام الیونتھ آور میں گفتگو کرتے ہوئے وفاقی وزیر اطلاعات شبلی فراز نے کہا کہ وزیر اعظم عمران خان لواحقین کی داد رسی کے لیے ضرور کوئٹہ جائیں گے، صبح تک وزیر اعظم عمران خان کے کوئٹہ جانے کا بتا دیا جائے گا۔

    سانحہ مچھ کے لواحقین سے اظہار یکجہتی، کراچی میں 18 مقامات پر دھرنے جاری

    شبلی فراز نے کہا کہ ہزارہ برادری نے مطالبہ کیا ہے کہ بلوچستان حکومت مستعفی ہو جائے، دراصل ہزارہ برادری کو نشانہ بنانے کا مقصد ملک میں عدم استحکام پیدا کرنا ہے، وزیر اعلیٰ بلوچستان بھی مظاہرین کے پاس اظہار یک جہتی کے لیےگئے تھے، بلوچستان حکومت ہزارہ برادری کی بھرپور مدد کرے گی۔

    انھوں نے کہا ملک میں دہشت گردی سے نمٹنے کی بھرپور کوشش کی جا رہی ہے، کوئٹہ واقعہ دل خراش ہے، پوری قوم کو واقعے پر افسوس ہے۔

  • سانحۂ مچھ: مریم نواز اور بلاول بھٹو کل کوئٹہ جائیں گے

    سانحۂ مچھ: مریم نواز اور بلاول بھٹو کل کوئٹہ جائیں گے

    کراچی/لاہور: پاکستان مسلم لیگ ن کی مرکزی نائب صدر مریم نواز اور پاکستان پیپلز پارٹی کے چیئرمین بلاول بھٹو زرداری کل ہزارہ برادری سے اظہار یک جہتی کے لیے کوئٹہ جائیں گے۔

    تفصیلات کے مطابق اے آر وائی نیوز کے پروگرام پاور پلے میں نواز شریف اور مریم کے ترجمان محمد زبیر نے بتایا کہ مریم نواز کل ہزارہ برادری سے اظہار یک جہتی کے لیے کوئٹہ جائیں گی۔

    مریم نواز نے اپنے ٹویٹر اکاؤنٹ کے ذریعے بتایا میں اپنے والد محمد نواز شریف کی ہدایت پر انشاء اللہ کل یہ التجا لے کر اپنی بہنوں اور بھائیوں کے پاس جا رہی ہوں کہ وہ اپنے پیاروں کی میتیں اللہ کے حوالے کر دیں، مجھے یقین ہے وہ اپنی بیٹی کی درخواست رد نہیں کریں گے۔

    ذرایع بلاول ہاؤس کی جانب سے بھی کہا گیا ہے کہ پی پی چیئرمین بلاول بھٹو کل ہزارہ برادری سے اظہار یک جہتی کے لیے کوئٹہ جائیں گے، بلاول ہزارہ کمیونٹی کے دھرنے میں شریک ہوں گے، وزیر اعلیٰ سندھ مراد علی شاہ بھی ان کے ہم راہ ہوں گے۔

    ‘ہوسکتا ہے وزیراعظم آج رات یا کل کوئٹہ آجائیں’

    خیال رہے کہ کوئٹہ میں سانحہ مچھ کے خلاف ہزارہ برادری کے دھرنے کو 4 دن بیت چکے ہیں، مغربی بائی پاس پر جاری دھرنے میں ورثا لاشوں سمیت احتجاج کر رہے ہیں۔ بلوچستان کے ضلع بولان کے علاقے مچھ میں 3 جنوری کو  11 کان کنوں کو بہیمانہ طور پر قتل کر دیا گیا تھا، جس کے بعد نہ صرف بلوچستان بلکہ کراچی میں بھی مظاہرے اور دھرنے شروع ہو چکے ہیں۔

    آج وزیر اعظم عمران خان نے مچھ واقعے کے لواحقین سے اپنے پیاروں کی تدفین کی دراخوست کرتے ہوئے کہا تھا کہ بہت جلد کوئٹہ آ کر شہدا کے لواحقین سے تعزیت اور فاتحہ خوانی کروں گا۔ وفاقی وزیر علی زیدی نے کہا ہے کہ ہو سکتا ہے وزیر اعظم آج رات یا کل کوئٹہ جائیں۔

     

  • سانحہ مچھ : وزیراعظم کی ہزارہ برادری سے اپنے پیاروں کی تدفین کی دراخوست

    سانحہ مچھ : وزیراعظم کی ہزارہ برادری سے اپنے پیاروں کی تدفین کی دراخوست

    اسلام آبد : وزیراعظم عمران خان نے مچھ واقعے کے لواحقین سے اپنے پیاروں کی تدفین کی دراخوست کرتے ہوئے کہا بہت جلد کوئٹہ آکر شہدا کے لواحقین سے تعزیت اور فاتحہ خوانی کروں گا۔

    تفصیلات کے مطابق وزیراعظم عمران خان نے سماجی رابطے کی ویب سائٹ ٹوئٹر پر اپنے بیان میں کہا کہ مچھ واقعے کے لواحقین سے درخواست ہے اپنے پیاروں کی تدفین کریں، آپ کادردسمجھتاہوں ، ہزارہ برادری کو یقین دلاتاہوں ان کے دکھ اور مطالبات کااحساس ہے، مستقبل میں ایسے حملے روکنے کیلئے اقدامات کررہےہیں اور جانتے ہیں ہمارا پڑوسی فرقہ وارانہ دہشت گردی کو ہوا دے رہا ہے۔

    عمران خان کا کہنا تھا کہ پہلے بھی چل کرآپ کے پاس آیا تھا اور دکھ میں ساتھ کھڑاتھا، بہت جلدکوئٹہ آکرشہداکےلواحقین سےتعزیت اور فاتحہ خوانی کروں گا، کبھی اپنےعوام کابھروسہ نہیں توڑوں گا، اپیل ہے اپنے پیاروں کو دفن کریں تاکہ ان کی روح کو سکون ملے۔

    خیال رہے کوئٹہ میں سانحہ مچھ کے خلاف ہزارہ برادری کے دھرنے کو 4 دن بیت گئے، مغربی بائی پاس پر جاری دھرنے میں ورثا لاشوں سمیت احتجاج کر رہے ہیں۔

    گذشتہ روز حکومتی وفد کے دھرنے کے شرکا سےمذاکرات ناکام ہوگئے تھے اور شرکا نے وزیراعظم کی آمدتک دھرناختم کرنے سے انکار کردیا تھا، حکومتی وفدقاسم سوری،علی زیدی،زلفی بخاری پرمشتمل تھا۔

  • سانحہ مچھ کے درندوں کو انجام تک پہنچائیں گے، وزیراعلی بلوچستان

    سانحہ مچھ کے درندوں کو انجام تک پہنچائیں گے، وزیراعلی بلوچستان

    کوئٹہ: وزیراعلی بلوچستان جام کمال کا کہنا ہے کہ مچھ میں پیش آنے والا واقعہ افسوسناک ہے، وزیراعظم کی ذمہ داری بلوچستان کیلئے بھی ہے وہ بھی ضرور آئیں گے ، سانحہ مچھ کے درندوں کو انجام تک پہنچائیں گے۔

    تفصیلات کے مطابق وزیراعلی بلوچستان جام کمال کی زیر صدارت امن وامان سے متعلق اجلاس ہوا، جس میں وزیر داخلہ ضیااللہ لانگو، ایڈیشنل چیف سیکریٹری داخلہ ،دیگرحکام شریک ہوئے۔

    اجلاس میں امن و امان سے متعلق اہم فیصلے کئے گئے اور مچھ میں شہید مزدوروں کے واقعہ پر افسوس کا اظہار کیا۔

    وزیراعلیٰ بلوچستان جام کمال نے کہا مچھ میں پیش آنے والا واقعہ افسوسناک ہے، حکومت متاثرین کو تنہا نہیں چھوڑے گی، عوام کے جان ومال کا تحفظ حکومت کی ذمےداری ہے، سانحہ مچھ کے درندوں کو انجام تک پہنچائیں گے۔

    بعد ازاں جام کمال نے پریس کانفرنس کرتے ہوئے کہا کہ کسی ایک جماعت سےاظہاریکجہتی کرنےنہیں آئے، ہم پوری کمیونٹی سےاظہاریکجہتی کرنےآئےہیں، یقینی طورپر وزیراعظم ،صدرمملکت وزرا بھی آئیں گے ۔

    ان کا کہنا تھا کہ لواحقین اور کمیونٹی کے مسائل ہم سے جڑے ہیں ، کل وزیراعظم بھی آجاتے ہیں تو ایک دوسرےکےمسائل ہم نےخودحل کرنےہیں، وزیراعظم کی ذمہ داری بلوچستان کیلئے بھی ہے وہ بھی ضرور آئیں گے۔

    وزیراعلیٰ بلوچستان نے مزید کہا چاہتے ہیں مذہبی طریقہ کار کے مطابق تدفین کا عمل پورا ہوجائے، ہم اپنی ذمہ داری پوری کریں تو وزیراعظم ،وزرا سمیت سب کریں گے۔

    خیال رہے کوئٹہ میں سانحہ مچھ کے خلاف ہزارہ برادری کے دھرنے کو 4 دن بیت گئے، مغربی بائی پاس پر جاری دھرنے میں ورثا لاشوں سمیت احتجاج کر رہے ہیں۔

    گذشتہ روز حکومتی وفد کے دھرنے کے شرکا سےمذاکرات ناکام ہوگئے تھے اور شرکا نے وزیراعظم کی آمدتک دھرناختم کرنے سے انکار کردیا تھا، حکومتی وفدقاسم سوری،علی زیدی،زلفی بخاری پرمشتمل تھا۔

  • افغان قونصلرجنرل کی سانحہ مچھ میں جاں بحق 3 افراد کی میتیں افغانستان بھیجنے کی درخواست

    افغان قونصلرجنرل کی سانحہ مچھ میں جاں بحق 3 افراد کی میتیں افغانستان بھیجنے کی درخواست

    اسلام آباد : افغان قونصلرجنرل نے حکومت پاکستان سے مچھ دہشت گردحملے میں جاں بحق 3 افراد کی میتیں افغانستان بھیجنے کی درخواست کرتے ہوئے کہا مچھ حملےمیں ملوث دہشت گرددونوں ممالک کےمشترکہ دشمن ہیں۔

    تفصیلات کے مطابق افغان قونصلرجنرل نے وزارت خارجہ کوخط لکھا ، جس میں کہا کہ مچھ دہشت گردحملےمیں جاں بحق ہونےوالوں میں سے7اافغانی تھے، جاں بحق 3 افراد کے لواحقین نے میتیں افغانستان بھیجنے کی درخواست کی ہے۔

    خط میں حکومت پاکستان سے چمن علی ولدنذیربیک،عزیزولدرضاقلی اور نسیم ولدعبدالرحیم کی میتیں چمن بارڈرسے افغانستان بھیجنے کی درخواست کرتے ہوئے کہا مچھ حملےمیں ملوث دہشت گرد دونوں ممالک کے مشترکہ دشمن ہیں۔

    یاد رہے ہفتہ اور اتوار کی درمیانی شب بلوچستان کے علاقے مچھ نامعلوم دہشت گردوں نے ڈیرے میں سوئے 11 کان کنوں کو پہلے یرغمال بنایا، پھر ان کے ہاتھ پاؤں باندھ کر قتل کردیا تھا، جاں بحق کان کنوں کا تعلق کوئٹہ سے تھا۔

    بعد ازاں وزیراعظم عمران خان، وزیر داخلہ شیخ رشید، وزیر اطلاعات شبلی فراز سمیت سیاسی ومذہبی شخصیات نے مچھ میں دہشت گردوں کے بزدلانہ وار کی شدید الفاظ میں مذمت کی ہے۔

    کاؤنٹر ٹیررزم ڈیپارٹمنٹ نے سانحہ مچھ کا مقدمہ نامعلوم افراد کے خلاف درج کرلیا ہے، پولیس کا کہنا ہے کہ مقدمہ انسداددہشت گردی ایکٹ کے تحت درج کیا گیا اور مقدمے میں 302 اور 324 کی دفعات شامل کی گئی ہے۔