کوئٹہ: سانحہ نوشکی کا ایک اور زخمی دم توڑ گیا، جس سے کراچی لائے جانے والے زخمیوں میں جاں بحق افراد کی تعداد 14، جب کہ مجموعی اموات کی تعداد 20 ہو گئی ہے۔
تفصیلات کے مطابق بلوچستان کے علاقے نوشکی میں آئل ٹینکر میں دھماکے سے جھلسنے کا افسوس ناک واقعہ پیش آیا تھا، جس میں جھلسنے والے مزید ایک زخمی کی کراچی کے اسپتال میں رات گئے دوران علاج موت واقع ہو گئی۔
علاج کے لیے کراچی منتقل کیے گئے زخمیوں میں جاں بحق افراد کی تعداد 14 ہو گئی ہے، کراچی کے نجی اسپتال میں زیر علاج شوکت نامی نوجوان زخموں کی تاب نہ لا کر چل بسا، جاں بحق شوکت جان کی پروا کیے بغیر جلتا ٹینکر چلا کر آبادی سے دور لے گیا تھا۔
یاد رہے کہ آئل ٹینکر دھماکے سے پھٹنے کے نتیجے میں 3 درجن سے زائد افراد زخمی ہوئے تھے۔
نوشکی آئل ٹینکر حادثے کے جھلسنے والے مزید 5 افراد کراچی میں دم توڑ گئے
شدید زخمی 24 افراد کو خصوصی طیارے کے ذریعے کراچی ایئر بیس منتقل کیا گیا تھا، جہاں سے زخمیوں کو ایدھی ایمبولینسوں کے ذریعے نجی اسپتالوں میں منتقل کیا گیا تھا، ریسکیو حکام کا کہنا ہے کہ زخمیوں کی کراچی منتقلی کے دوران ایک زخمی دم توڑ گیا تھا، زخمیوں کے علاج معالجے کے اخراجات بلوچستان حکومت ادا کرے گی۔
