اسلام آباد : برطانیہ، امریکہ اور کینیڈا سے 9 مئی کی گھناؤنی کارروائیوں کو اکسانے، بڑھاوا دینے اور مدد کرنے میں براہ راست ملوث 41 افراد کی شناخت کرلی گئی۔
تفصیلات کے مطابق نو مئی کے واقعات کی تحقیقات میں اہم پیش رفت ہوئی ، برطانیہ، امریکہ اور کینیڈا سے ایسے اکتالیس افراد کی شناخت کرلی گئی ، جو 9 مئی کی گھناؤنی کارروائیوں کو اکسانے، بڑھاوا دینے اور مدد کرنے میں براہ راست ملوث پائے گئے ہیں۔
ذرائع نے بتایا کہ ان میں سے اکثر افراد ایک سیاسی جماعت کے عہدیدار اور کارکن ہیں، ان افراد کی شناخت تصاویر اور ویڈیوز کے ذریعے کی گئی ہے جس میں وہ پاکستان مخالف نعرے لگاتے نظر آ رہے ہیں اور ریاست مخالف کاروائیوں کی ترغیب دے رہے ہیں۔
برطانیہ میں ان افراد میں سے تین سیاسی جماعت کے عہدیدار ہیں جبکہ 12 لندن میں مقیم کارکن ہیں، جو اکثر ایون فیلڈ ہاؤس کے باہر نظر آتے ہیں۔
کینیڈا میں سیاسی جماعت کے 08 عہدیدار ہیں جبکہ 12 افراد اس سیاسی جماعت کے سپورٹرز اور فنانسرز ہیں، اوٹاوا میں مقیم ایک سیاسی عہدیدار کی طرف سے امریکہ اور کینیڈا کا دورہ کرنے والے حکومتی وزراء کے خلاف جوتا پھینکنے جیسی کاروائی کی منصوبہ بندی کی نشاندہی بھی ہوئی ہے۔
امریکہ میں جن 06 افراد کی شناخت ہوئی ہے ، ان میں سیاسی جماعت کا نیویارک کا ایک عہدیدار اور 05 کارکن شامل ہیں۔
ذرائع کے مطابق حکومت پاکستان نے ان افراد کے خلاف پاکستان اور ان کے رہائشی ممالک میں سخت کارروائی شروع کرنے کا فیصلہ کیا ہے۔
