بھارت میں پٹنہ کے مکامہ ڈویژن میں اس وقت اچانک افرا تفری کی صورتحال پیدا ہوگئی، جب سرکاری اسکول میں مڈ ڈے میل کھانے کے بعد درجنوں بچے بیمار ہو گئے۔
بھارتی میڈیا رپورٹس کے مطابق یکے بعد دیگرے بچوں کو بیمار ہوتے دیکھ کر گاؤں میں افراتفری کی صورتحال پیدا ہوگئی، بچوں کا اس حوالے سے کہنا تھا کہ ان کے کھانے میں سانپ گر گیا تھا، اس کے باوجود اسکول کے اساتذہ نے انھیں کھانے پر مجبور کیا، پولیس نے معاملے کی تحقیقات شروع کردی ہیں۔
رپورٹس کے مطابق پٹنہ کے مکامہ ڈویژن میں مڈ ڈے میل کھانے کے بعد طلبا کی طبیعت خراب ہونے لگی، یکے بعد دیگرے اسکول میں پڑھنے والے درجنوں طالب علم بیمار ہوگئے۔
بچوں کو چکر آنے اور الٹی کی شکایت ہونے لگی، معاملے کی اطلاع ملنے پر پورے گاؤں میں کہرام مچ گیا۔ اسکول میں لوگ بڑی تعداد میں پہنچ گئے، بیمار بچوں کو آناً فاناً میں اسپتال لے جایا گیا۔
بچوں کے مطابق مڈ ڈے میل کے لیے بنے کھانے میں سانپ گر گیا تھا۔ اسے اسکول کے اساتذہ نے کھانے سے نکال دیا اور اسی کھانے کو بچوں کو زبردستی کھلایا گیا۔
بعض بچوں نے جب زہریلے کھانا کھانے سے انکار کیا تو اسکول کے اساتذہ کے ذریعہ انھیں ڈرایا دھمکایا گیا۔ بچوں نے بتایا کہ تقریباً 400 طلبا نے اس زہریلے کھانے کو کھایا۔ زہریلا کھانا کھاتے ہی بچے بیمار ہونے لگے۔ کئی بچوں کے بیہوش ہونے کی خبریں بھی سامنے آ رہی ہیں۔
رپورٹس کے مطابق زہریلا کھانا کھلانے کے بعد ماحول خراب ہوتا دیکھ کر اسکول کے سبھی اساتذہ تالا لگا کر اسکول سے غائب ہوگئے۔ پورے گاؤں میں افرا تفری کا ماحول پیدا ہوگیا۔
قاتل 40 سال بعد کیسے پولیس کے ہاتھ آیا؟ جان کر حیران رہ جائیں
مقامی پولیس موقع پر پہنچی اور سبھی بچوں کو اسپتال بھیجا گیا۔ پولیس نے اس معاملے کی تحقیقات کا آغاز ک ردیا ہے، پولیس کا کہنا ہے کہ بچوں کے والدین کا الزام ہے کہ بچوں کو جبراً زہریلا کھانا کھلایا گیا ہے۔
