ARYNews.tv | Urdu – Har Lamha Bakhabar

Tag: سانپ

  • سانپ کو رسی کی طرح گھما کر مارنے والا شخص گرفتار

    سانپ کو رسی کی طرح گھما کر مارنے والا شخص گرفتار

    کینیڈا کی ایک سڑک پر اس وقت ایک حیران کن منظر دیکھنے میں آیا جب بیچ سڑک پر لڑتے ہوئے دو افراد میں سے ایک نے پالتو سانپ نکالا اور اسے لہرا لہرا کر اپنے حریف کو اس سے مارنا شروع کردیا۔

    سوشل میڈیا پر وائرل یہ ویڈیو کینیڈا کے شہر ٹورنٹو کی ہے، ویڈیو میں دو افراد کو ایک دوسرے سے گتھم گتھا دیکھا جاسکتا ہے۔

    ان میں سے ایک شخص کے ہاتھ میں رسی نما کوئی شے ہے جسے لہرا کر وہ اپنے حریف پر وار کر رہا ہے۔

    غور سے دیکھنے پر علم ہوا کہ وہ کوئی رسی نہیں بلکہ پائتھون سانپ ہے جو اس شخص کا پالتو تھا۔

    اسی دوران ایک پولیس کی گاڑی وہاں آ کر رکتی ہے اور دونوں کو زمین پر لیٹنے کا حکم دیتی ہے۔

    پولیس نے سانپ لہرانے والے شخص کو گرفتار کرلیا اور اس پر مندرجہ ذیل چارجز لگائے گئے ہیں۔

    خطرناک جانور کی سرعام نمائش اور لوگوں کو اس سے خوفزدہ کرنا۔

    جانور کو تکلیف پہنچانا۔

    ایک شخص پر حملہ اور اس کی جان لینے کی کوشش کرنا۔

    سوشل میڈیا پر وائرل ہونے کے بعد اس ویڈیو پر لوگوں نے مختلف کمنٹس کیے اور اس شخص کو نہایت تنقید کا نشانہ بنایا۔

  • بیوی کو ڈسنے والے سانپ کو شوہر اسپتال لے کر پہنچ گیا

    بیوی کو ڈسنے والے سانپ کو شوہر اسپتال لے کر پہنچ گیا

    لکھنؤ: بھارت میں پیش آیا ایک انوکھا واقعہ جہاں شوہر نے بیوی کو ڈسنے والے سانپ کو اسپتال لے کر پہنچ گیا۔

    یہ واقعی بھارتی ریاست اترپردیش کے ضلع اناؤ میں پیش آیا جہاں اسپتال میں ڈاکٹرز اور عملہ اس وقت حیران اور خوف زدہ ہوگیا جب ایک شخص تھیلے میں سانپ لے کر پہنچا۔

    رپورٹس کے مطابق نریندر نامی شخص کی بیوی کسم کو گھر کی صفائی کے دوران سانپ نے کاٹ لیا جس کے باعث وہ بیہوش ہوگئی جسے فوری طور پر پڑوسی اسپتال لے کر پہنچے۔

    واقعہ کی اطلاع ملنے پر شوہر گھر آیا اور سانپ کو لے کر اسپتال پہنچ گیا جس پر ڈاکٹرز اور عملے میں خوف و ہراس پھیل گیا۔

    حکام کے سوال کرنے پر کہ وہ سانپ کو لے کر اسپتال کیوں آیا ہے نریندر نے جواب دیا کہ وہ ڈاکٹرز کو اس لیے سانپ دکھانا چاہتا تھا کہ وہ زہر کا اندازہ کریں اور اس کے مطابق بیوی کا علاج کریں۔

    تاہم سانپ کی ڈسی خاتون کی حالت تسلی بخش بتائی جاتی ہے جبکہ سانپ کو قریبی جنگل میں چھوڑ دیا گیا۔

  • تالاب میں سانپ نے بگلے کو پکڑ لیا؟ کون جیتا؟ ویڈیو وائرل

    تالاب میں سانپ نے بگلے کو پکڑ لیا؟ کون جیتا؟ ویڈیو وائرل

    شکار کرنا یا شکار ہوجانا یہ جنگل کا قانون ہے اور یہی قانون فطرت ہے کہ بڑا جانور چھوٹے جانور کو اپنا نوالہ بنا لیتا ہے۔ اگر ایسا نہ ہو تو جنگلی حیات کے زندہ رہنے کی کوئی وجہ باقی نہیں رہتی۔

    سوشل میڈیا ایک ایسا پلیٹ فارم ہے جہاں پر قدرت کی نشانیاں اور اس کی مخلوقات کے شب و روز اور ان کی حرکات و سکنات کی ویڈیوز ہم آئے روز دیکھتے رہتے ہیں۔

    ایک ایسی ہی ویڈیو اس بار ہم آپ کیلئے لائے ہیں جس میں ایک بگلہ جو شاید مچھلی کے شکار کیلئے تالاب پر آیا اور خود ہی شکاری کے نرغے میں آگیا۔

    ویڈیو میں دیکھا جاسکتا ہے کہ بگلے کو ایک خطرناک سانپ نے پکڑ لیا، بگلے کا ایک پر سانپ کی پوری گرفت میں تھا باوجود کوشش کے بگلا سانپ کی گرفت سے خود کو آزاد نہیں کرپا رہا تھا۔

    اس دوران بگلا اپنی چونچ مار کر سانپ کو زخمی کرتا رہا تاہم کافی دیر کوشش کے بعد وہ خود کو آزاد کرانے میں کامیاب ہوا اور بمشکل تالاب سے باہر نکل آیا۔

    ویڈیو کو 2لاکھ 44ہزار سے زائد صارفین نے دیکھا اور کمنٹس سیکشن میں اپنے اپنے انداز میں دلچسپ تبصرے بھی کیے۔

  • گھر سے خوفناک کنگ کوبرا برآمد، گھر کا مالک خوف سے ساکت

    گھر سے خوفناک کنگ کوبرا برآمد، گھر کا مالک خوف سے ساکت

    تھائی لینڈ میں ایک شخص اس وقت خوف سے گنگ ہوگیا جب اس نے اپنے گھر کے پچھلے حصے میں ایک طویل خوفناک کنگ کوبرا سانپ دیکھا۔

    یہ واقعہ تھائی لینڈ کے چھوٹے سے علاقے کربی میں پیش آیا، جہاں ایک مقامی شخص نے گھر کے کچے حصے میں کوبرا کو دیکھا۔

    کوبرا سانپ 5 میٹر طویل اور نہایت خوفزدہ کردینے والا تھا۔

    جنگلی حیات کی ٹیم نے جلد ہی کوبرا کو قابو میں کرلیا

    مذکورہ شخص نے جنگلی حیات کے ادارے کو اطلاع دی جنہوں نے فوری وہاں پہنچ کر صرف 4 منٹ کے اندر سانپ کو پکڑ لیا، اور اسے بحفاظت واپس جنگل میں چھوڑ دیا۔

    کربی کا علاقہ جنگلات کے کنارے واقعہ ہے جس کی وجہ سے وہاں کے رہائشی اکثر و بیشتر سانپ، چھپکلیاں یا دیگر حشرات کے اپنے گھر میں آجانے سے پریشان رہتے ہیں۔

  • ویڈیو: سانپ نے سی اے اے دفتر میں کھلبلی مچا دی

    ویڈیو: سانپ نے سی اے اے دفتر میں کھلبلی مچا دی

    سکھر: سول ایوی ایشن اتھارٹی کے دفاتر زہریلے سانپوں کے نشانے پر آ گئے، سکھر کے دفتر میں سانپ نے گھس کر ملازمین میں کھلبلی مچا دی۔

    تفصیلات کے مطابق سکھر ایئر پورٹ پر شعبہ فائر میں سانپ گھسنے سے سی اے اے ملازمین خوف و ہراس کا شکار ہو گئے، تاہم ملازمین نے ہمت دکھاتے ہوئے لکڑیوں سے سانپ کو مار دیا۔

    سانپ گھسنے کے بعد سی اے اے ملازمین دفتر خالی کر کے باہر نکل گئے تھے، سانپ سی اے اے کے شعبہ فائر کے دفتر کی کھڑکی سے داخل ہوا تھا، بڑی کوششوں کے بعد سی اے اے ملازمین نے ڈنڈے اور لاٹھی سے اسے مارا۔

    سانپ زہریلا بتایا جا رہا ہے، کراچی سمیت ملک بھر کے ایئر پورٹس پر کئی بار سانپ دیکھے گئے ہیں، بارشوں کے بعد سے گھاس اور جھاڑیوں میں سے سانپ سی اے اے دفاتر اور رن ویز پر دیکھے جاتے ہیں۔

    سیدو شریف ایئرپورٹ پر فلائٹ آپریشن ایک سال سے معطل، کروڑوں‌ کا مالی نقصان

    ذرائع سی اے اے کے مطابق سول ایوی ایشن کے کسی بھی فائر اسٹیشن پر سانپ کے ڈسنے کی کٹ دستیاب نہیں ہے۔

  • ویڈیو: پالتو سانپ نے مالکن پر حملہ کر کے لہولہان کر دیا

    ویڈیو: پالتو سانپ نے مالکن پر حملہ کر کے لہولہان کر دیا

    ایک برطانوی خاتون نے ٹوئٹر پر ایک دل دہلا دینے والی ویڈیو شیئر کی ہے، جس میں ایک بڑے سانپ کو خاتون مالکن پر حملہ کرتے دیکھا گیا۔

    یہ ویڈیو سوشل میڈیا پر بڑی تیزی سے وائرل ہو گئی ہے، لاکھوں لوگوں نے اسے دیکھا اور شیئر کیا، اس میں دیکھا جا سکتا ہے کہ بڑے سے پالتو سانپ نے مالکن پر حملہ کر کے انھیں لہولہان کر دیا۔

    خاتون نے شیشے کا باکس کھول کر سانپ کو باہر نکالنا چاہا تو سانپ نے اچانک اس کے بازو پر حملہ کر کے اس میں اپنے دانت گاڑ دیے، اور پھر ان کے بازو سے بری طرح لپٹ گیا۔

    اس دوران ایک اور شخص خاتون کی مدد کو آ گیا، اور دونوں مل کر سانپ سے جان چڑھانے کی جدوجہد کرنے لگے، لیکن کافی دیر تک سانپ نے خود کو الگ نہیں ہونے دیا، سانپ خاتون کی ایک ٹانگ سے بھی لپٹ گیا تھا۔

    آخر کار مرد ساتھی نے لوہے کے ایک ہک والی راڈ سانپ کے منہ میں ڈال کر اس سے خاتون کا بازو چھڑایا، لیکن اسی لمحے بازو سے خون کی دھار بہہ نکلی، تاہم اس طرح سانپ سے خاتون کی جان چھوٹ گئی۔

    ایک صارف نے اس پر تبصرہ کرتے ہوئے لکھا کہ میرا خیال ہے کہ خاتون سانپ کو کھلانے سے قبل چوہے تیار کرنے میں لگی ہوں گی، اس لیے سانپ کو وہ اپنا ’ڈنر‘ لگا۔ اگر میں ہوتا تو میں سانپ کے سر کو ٹھنڈے پانی میں ڈبو دیتا اور وہ بہ آسانی میرا ہاتھ چھوڑ دیتا۔

    ایک صارف نے واقعہ لکھا کہ میرے دوست کی ایک بیٹی کے پاس بڑا سانپ ہے، وہ اس کے ساتھ ہی بستر پر سوتا ہے، ایک دن اچانک وہ اسے جانوروں کے ڈاکٹر کے پاس لے گئی اور کہا کہ سانپ نے اچانک عجیب رویہ اختیار کر لیا ہے، وہ لپٹ کر سونے کی بجائے میرے برابر لمبا ہو کر لیٹا۔ تو ڈاکٹر نے بتایا کہ وہ دراصل خود کو ناپ رہا تھا کہ کیا میں اسے نگل سکتا ہوں۔

  • کمرے سے سانپ برآمد ہونے پر گھر والوں کے ہوش اڑ گئے

    کمرے سے سانپ برآمد ہونے پر گھر والوں کے ہوش اڑ گئے

    برمنگھم: برطانیہ میں ایک گھر کے آرام کمرے سے سانپ برآمد ہونے پر گھر والوں پر دہشت طاری ہو گئی۔

    برطانیہ اور آسٹریلیا کے خاندانوں کے لیے ٹوائلٹس اور گارڈنز میں سانپوں کو دیکھنا کوئی غیر معمولی بات نہیں ہے، تاہم معاملہ اس وقت واقعی خوف ناک ہو سکتا ہے جب سانپ بیڈ روم یا آرام کمرے میں ظاہر ہو جائے۔

    ایسا ہی واقعہ برطانوی شہر برمنگھم کے ہوج ہل علاقے سے تعلق رکھنے والے ایک خاندان کے ساتھ پیش آیا، آرام کمرے کے فرش پر 5 فٹ لمبے سانپ کو دیکھ کر گھر والوں کے ہوش اڑ گئے۔

    گھر کے مالک شخص نے سانپ دیکھ کر اپنے بچوں کو گھر کے دوسرے کمرے میں لے جا کر محفوظ کر دیا اور پھر ایمرجنسی سروسز کو کال کی، لیکن بدقسمتی سے جانوروں کے تحفظ کے محکمے کی جانب سے کہا گیا کہ وہ صبح تک ان کی کوئی مدد نہیں کر سکیں گے۔

    محکمے سے جواب ملنے کے بعد گھر کے مالک نے پولیس سے مدد طلب کر لی، جس پر کچھ ہی دیر میں پولیس اہل کار پہنچ گئے، اور انھوں نے گھر کے لیوِنگ روم سے 5 فٹ لمبا سانپ پکڑ کر نکال لیا، ریسکیو کی جانب سے اس کی تصاویر بھی آن لائن شیئر کی گئیں۔

    ریسکیو اہل کاروں نے جب کمرے کی تلاشی لی تو سانپ صوفے کے نیچے چھپا ہوا ملا، یہ سیاہ اور سفید رنگ کا بڑا سانپ تھا۔

    اہل کاروں نے سانپ کو پہلے گریبر سے پکڑا، اور پھر اسے تکیے کے غلاف میں ڈال دیا، بعد ازاں اسے پنجرے میں منتقل کیا گیا، اہل کاروں کا خیال تھا کہ یہ سانپ گھر میں پائپ سسٹم کے ذریعے ہی داخل ہوا ہوگا۔

    مڈلینڈز پولیس نے ایک بیان میں کہا ہمارے کال سینٹر کے عملے میں سے ایک اہل کار سانپوں سے متعلق مہارت رکھتے ہیں، جو یونیورسٹی آف برٹش کولمبیا میں جانوروں کی تحقیق میں کام کر چکے ہیں، انھوں نے ہمیں سانپ کی ممکنہ قسم اور اس سے نمٹنے کے بارے میں کارآمد مشورہ دیا تھا۔

  • والد نے ناگ کو مارا تو 24 گھنٹے کے اندر ہی ناگن نے بیٹے کو ڈس لیا

    والد نے ناگ کو مارا تو 24 گھنٹے کے اندر ہی ناگن نے بیٹے کو ڈس لیا

    نئی دہلی: بھارت میں ایک گھر میں سانپ نکل آنے کے بعد گھر والوں نے اسے مار ڈالا، لیکن اسی رات دوسرے سانپ نے گھر کے ایک بچے کو کاٹ لیا جس کے بعد بچے کی موت واقع ہوگئی۔

    بھارتی میڈیا کے مطابق واقعہ ریاست مدھیہ پردیش کے ایک گاؤں میں پیش آیا جہاں ایک گھر میں پوجا کے دوران سانپ نکل آیا۔

    گھر کے سربراہ کشوری لال اور دیگر افراد نے سانپ کو مار کر پھینک دیا جس کے بعد گھر میں معمول کی سرگرمیاں دوبارہ سے شروع ہوگئیں۔

    لیکن اسی رات گھر میں ایک اور سانپ نکلا اور اس نے کشوری لال کے 12 سالہ بیٹے کو کاٹ لیا، بیٹے کی چیخ و پکار پر گھر والوں نے دوسرا سانپ بھی مار ڈالا۔

    12 سالہ بچے کو مقامی اسپتال منتقل کیا گیا جہاں ڈاکٹرز نے اسے بھوپال کے اسپتال ریفر کردیا، تاہم بھوپال کے راستے میں ہی اس کی موت ہوگئی۔

    واقعے کے بعد گاؤں میں خوف و ہراس پھیل گیا ہے، گاؤں والوں کا کہنا ہے کہ دوسرا سانپ دراصل پہلے مارے جانے والے سانپ کا جوڑی دار تھا اور اس نے اپنے ساتھی کی موت کا بدلہ لیا ہے۔

    اہل خانہ نے پولیس کو بھی واقعے کی اطلاع کردی ہے۔

  • پیچھے دیکھنا کیوں ضروری ہے؟ ایک دل دہلا دینے والا واقعہ (ویڈیو)

    پیچھے دیکھنا کیوں ضروری ہے؟ ایک دل دہلا دینے والا واقعہ (ویڈیو)

    کچھ لوگ بہت محتاط ہوتے ہیں، وہ جہاں بھی جاتے ہیں یا کہیں بیٹھتے ہیں تو آس پاس کا بہ غور جائزہ لے لیتے ہیں، لیکن اکثر لوگ اس بات کا خیال نہیں رکھتے۔

    خصوصاً ایسی جگہوں پر جہاں ہمارا آنا جانا یا بیٹھ کر کام کرنا ایک معمول ہو، وہاں ہمارے دماغ کے اندر موجود حفاظتی نظام پر سکون حالت میں رہتا ہے۔

    لیکن کبھی کبھی ایسے واقعات جنم لیتے ہیں جو دہشت زدہ کر دینے والے ہوتے ہیں، اسی لیے بہت سارے لوگ روز ایک ہی جگہ جا کر بھی خاصی احتیاط برتتے ہیں۔

    تو بعض اوقات اس سوال کا جواب مل جاتا ہے کہ پیچھے دیکھنا کیوں ضروری ہے؟ آسٹریلیا میں ایسا ہی ایک دل دہلا دینے والا واقعہ پیش آیا ہے، جس کی سی سی ٹی وی فوٹیج سوشل میڈیا پر وائرل ہو گئی۔

    آسٹریلیا میں کسی مقام پر ایک شہری اپنے عرشے پر آرام کر رہا تھا، جب اس کا ایک انتہائی ڈرپوک سانپ سے غیر متوقع طور پر سامنا ہو گیا۔

    ویڈیو میں آپ دیکھ سکتے ہیں کہ آسٹریلوی کتنے اطمیان سے میز کے آگے کرسی پر لیپ ٹاپ پر کام کر رہا ہے، اور پیچھے ایک سیاہ لمبا سانپ دھیرے دھیرے اس کی طرف بڑھتا ہے۔

    لیکن سانپ جیسے ہی کرسی کے نیچے آتا ہے، چند لمحوں بعد کھٹکا ہوتے ہی سانپ ڈر کے مارے اچھل کر ایک طرف بھاگتا ہے، اور اسی دوران اس شخص کو بھی معلوم ہو جاتا ہے کہ پیروں کے پاس کچھ ہے۔

    ڈر کے مارے آسٹریلوی شخص کے رد عمل نے سانپ کو اور ڈرایا، غیر متوقع طور پر سانپ اس سے زیادہ ڈرپوک نکلا اور آن کے آن میں رینگ کر غائب ہو گیا، تاہم آسٹریلوی شخص کے دل کی دھڑکن کچھ دیر کے لیے خوف کے مارے ضرور رک گئی تھی۔

  • کپڑوں میں سانپ اور چھپکلیاں چھپا کر اسمگلنگ کرنے والا شخص گرفتار

    کپڑوں میں سانپ اور چھپکلیاں چھپا کر اسمگلنگ کرنے والا شخص گرفتار

    امریکا کی سرحد پر کپڑوں میں درجنوں سانپ اور چھپکلیاں چھپا کر لے جانے والے شخص کو حکام نے گرفتار کرلیا، مذکورہ شخص میکسیکو سے آرہا تھا۔

    امریکی میڈیا کے مطابق مذکورہ شخص گذشتہ ماہ میکسیکو سے امریکا میں داخل ہوا تھا اور وہ پک اپ ٹرک چلا رہا تھا جب اسے پوچھ گچھ کے لیے باہر نکالا گیا۔

    سرحد پر پیٹرولنگ ایجنٹ کے مطابق وہاں موجود افسران نے 43 سینگ والی چھپکلیاں اور 9 سانپ پلاسٹک کے ان تھیلوں سے برآمد کیے جو اس شخص نے اپنی جیکٹ، پینٹ کی جیبوں میں اور پیٹ کے نچلے حصے میں چھپا رکھے تھے۔

    30 سالہ امریکی شہری کو جنگلی حیات کی غیر قانونی اسمگلنگ کے شبے میں گرفتار کر لیا گیا ہے۔

    ایک اہلکار کا کہنا ہے کہ اسمگلر ہر ممکن کوشش کرتے ہیں اور ہر طریقہ اختیار کرتے ہیں تاکہ وہ مختلف اشیا یا زندہ رینگنے والے جانوروں کو سرحد کے دوسری جانب لے جا سکیں۔

    ان کا کہنا تھا کہ اسمگلر نے جانوروں کی صحت اور حفاظت کو نظر انداز کرتے ہوئے ان جانوروں کو امریکا لا کر افسران کو دھوکا دیا۔