Tag: ساہیوال جلسہ

ساہیوال: پاکستان پیپلز پارٹی کے چیئرمین بلاول بھٹو نے کہا ہے کہ حکومت میں آئے تو بے نظیر انکم سپورٹ پروگرام کی رقم دگنی کردیں گے، ایک ایکڑ سے کم زمین کے مالک کو سود سے پاک قرضہ دیں گے، پارٹی کا منشور بتانے کے لیے ہر شہر میں جلسے کریں گے۔

یہ باتیں انہوں نے ساہیوال میں جلسہ عام سے خطاب کے دوران پارٹی کے منشور سے آگاہی کے دوران کہی۔

بلاول نے کہا کہ بدعنوان حکمرانوں نے قدم قدم پر عوام کو دھوکا دیا، یہ جب اقتدار میں آتے ہیں انہیں عوام کی نہیں اپنے کاروبار کی فکر ہوتی ہے، میاں صاحب کی وفاقی ہو یا پنجاب حکومت، آج بھی ان کے ظلم کی تلوار عوام پر لٹک رہی ہے اور عوام کے حقوق سلب کیے جارہے ہیں۔

انہوں نے کہا کہ غریب آدمی جائے تو کہاں جائے؟ یہ آمروں کی سیاسی اولاد ہیں جو جمہوری لبادہ اوڑھ کر عوام کا خون چوس رہے ہیں، کسان کو بار دانہ نہیں ملتا، غریب کسان کو بھی بجلی 10 روپے فی یونٹ دی جارہی ہے، نہری پانی کی تقسیم غیر منصفانہ ہے، مزارعین کی جائز جدوجہد کو بھی طاقت کے ذریعے روکا جارہا ہے۔

بلاول نے کہا کہ پی پی نے کالاباغ ڈیم کے خلاف احتجاج کرنے والے  مزارعین کا ہمیشہ ساتھ دیا ہے اور آج بھی ان کے ساتھ ہیں، یہ بھٹو کا کارنامہ تھا جو ٹیننسی ایکٹ نافذ کرکے بے زمین کسانوں کو ان کا حق دیا، اس قانون میں تبدیلی کرکے کسانوں کا حق مارا جارہا ہے جب کہ یہاں اوکاڑہ مزارعین کا استحصال جاری ہے۔

چیئرمین پی پی نے کہا کہ بجلی کی قیمتیں بڑھا دی گئیں، ساہیوالی میں مہنگی بجلی بنانے کے لیے کوئلہ باہر سے خریدا جائے گا جو کراچی کی پورٹ کے ذریعے اتار کر ساہیوال لایا جائے گا جس سے یہاں بجلی مہنگی ملے گی اور اس منصوبے سے لوگ متاثر ہوں گے اس لیے اس منصوبے کو لوگ کالا پاور پلانٹ کہنے لگے ہیں۔

انہوں نے کہا کہ ہم آئندہ انتخابات کے لیے منشور بنارہے ہیں، وعدہ ہے کہ یہ منشور کسان اور مزدور دوست ہوگا جس میں ہر شعبے کے لیے بالخصوص زراعت کے لیے پالیسی ہوگی، ایک ایکڑ زمین سے کم کے مالک کو کسان کارڈ دیا جائے گا تاکہ وہ انٹرنسٹ فری لان حاصل کرسکے۔

بلاول کا کہنا تھا کہ ایگری کلچر یونٹ بنایا جائے گا، فصل اترنے سے پہلے سپورٹ پرائز کا اعلان، بار دانے کی تقیسیم کا میکنزم بنایا جائےگا، مزدور کی کم از کم تنخواہ اور پنشن میں اضافہ کیا جائے گا، بے نظیر انکم سپورٹ پروگرام کی رقم دگنی کی جائے گی، لڑکیوں کی تعلیم پر خصوصی توجہ ہوگی، دیہی علاقوں میں جانے والے ڈاکٹروں کی تنخواہیں بڑھائی جائیں گی، سرکاری اسپتالوں میں مفت علاج کو یقینی بنایا جائےگا۔

انہوں نے عوام کو یقین دلایا کہ عوام کو روزگار دیا جائے گا جب بھی حکومت میں آئے سب سے پہلے روزگار دیں گے چاہے ترقیاتی منصوبوں میں کمی کرنی پڑے۔

انہوں نے کہا کہ بے نظیر انکم سپورٹ پروگرام کے تحت 42 ہزار خاندانوں کی مدد جاری ہے، بی بی نے جو عہد کیا وہ پورا کیا، ہم عوام کی سیاست کرتے ہیں دوسری طرف دائیں بازو کے سیاست دان اور رجعت پسند جماعتیں مع کالعدم جماعتیں پی پی کے خلاف ہیں اور یہی پنجاب میں غلبہ حاصل کیے ہوئے ہیں یہ بدقسمتی ہے کہ لاہور کالعدم اور رجعت پسند پارٹیوں کے قبضے میں ہے۔

ان کا کہنا تھا کہ پی پی کے خلاف محاذ بنانے کےلیے سرمایہ خرچ کیا گیا تاکہ پی پی کو روکا جاسکے۔

اسی سے متعلق:  بلاول کی آمد، جیالے نے 3 من دودھ کی چائے مفت بانٹ دی

بلاول زرداری نے کہا کہ یہ میرا پہلا الیکشن اور مخالفین کا آخری الیکشن ہوگا، میں نظریاتی، صاف ستھری اور غریبوں کی سیاست پر یقین رکھتا ہوں، میں نے فیصلہ کیا ہے کہ میں خود ہر شہر میں جلسے کروں گا، عوام سے ملوں گا اور انہیں پارٹی کے منشور سے آگاہ کروں گا، میں اپنا پارٹی پرچم اور اپنا پیغام لے کر ہر گلی اور محلے میں جاؤں گا، عوام وعدہ کریں تو ایک وعدہ میں بھی کروں گا کہ آپ کی مدد سے اس ملک سے اندھیروں کو دور کروں گا۔