ساہیوال: وزیر اطلاعات پنجاب صمصام بخاری نے کہا ہے کہ تین ماہ میں مہنگائی کی شرح کم اور ڈالر نیچے آجائے گا۔
تفصیلات کے مطابق وزیر اطلاعات پنجاب صمصام بخاری نے پریس کانفرنس کرتے ہوئے کہا کہ نیب کیسز میں شریف برادران پلی بارگین کرنے کے لیے تیار تھے، شریف برادران کہتے تھے ہمارے پاس رسیدیں نہیں ہیں۔
وزیر اطلاعات پنجاب نے کہا کہ سابق ادوار میں ڈالر کو مصنوعی طریقے سے روکا گیا تھا، تین ماہ میں مہنگائی کی شرح کم اور ڈالر نیچے آجائے گا، ہم لوگوں کو مچھلی کھانے کا نہیں پکڑنے کا طریقہ سکھانا چاہتے ہیں۔
صمصام بخاری نے کہا کہ علیم خان کی ضمانت جرم ثابت نہ ہونے پر ہوئی ہے، چارٹر آف ڈیموکریسی سے ن لیگ نے راہ فرار اختیار کیا تھا۔
مزید پڑھیں: یہ لوگ اتنی تباہی کرکے گئے کہ آئی ایم ایف کے پاس جانا پڑا، صمصام بخاری
انہوں نے کہا کہ رانا ثنا اللہ گالم گلوچ بریگیڈ کے سربراہ ہیں ان کو سنجیدہ نہیں لیتے ہیں، مریم بی بی جو خود سزا یافتہ ہیں وہ کسی پر کیا الزام لگائیں گی۔
واضح رہے کہ دو روز قبل صمصام بخاری کا کہنا تھا کہ آئی ایم ایف کے پاس جانےکےعلاوہ کوئی راستہ نہیں تھا، آئی ایم ایف کے پاس جانے کا ارادہ نہیں تھا لیکن یہ لوگ اتنی تباہی کرکےگئے کہ آئی ایم ایف کے پاس جانا پڑا۔
ان کا کہنا تھا جو کریں گے عوام کی بہتری کے لئے کریں گے، آئی ایم ایف کا پیسہ ایون فیلڈ اور رائے ونڈ سیکیورٹی پر جاتا تھا ، قرضہ ہم نے نہیں لیا لیکن قسطیں اتار رہے ہیں۔
