Tag: سبزیاں

سردیاں آتے ہی سبزی کے ٹھیلوں پر مختلف اقسام کی سبزیوں کی بہار دکھائی دیتی ہے، تاہم یہ اہم سوال ہے کہ سردیوں میں کون سی سبزیاں کھانی چاہیئں۔

آپ نے سنا ہوگا کہ سبز پتوں والی سبزیاں انسانی جسم کے لیے بہت مفید ہوتی ہیں، سردیوں میں پھلوں کا بھی زیادہ سے زیادہ استعمال کرنا چاہیے، سبزیوں میں موجود فلیونول حافظے کے لیے بہت مفید ہوتا ہے۔

اس سلسلے میں اے آر وائی نیوز کے پروگرام باخبر سویرا میں حکیم شاہ نذیر اہم باتیں بتائی ہیں، اور ساتھ ہی کیل مہاسوں کے لیے آسان علاج کے طور پر ایک ماسک بنانے کا بھی طریقہ بتا دیا ہے۔

حکیم شاہ نذیر نے کہا کہ سبزیوں کا استعمال زیادہ کیجیے کیوں کہ ان میں تمام قسم کے منرلز پائے جاتے ہیں، جیسا کہ ٹنڈا، ترئی، لوکی، اروی ہے، یہ چیزیں زیادہ استعمال کریں، ان میں وٹامن ڈی، وٹامن کے، کیلشیئم، آئرن ہوتے ہیں، جو ہڈیوں کے لیے بہت ضروری ہوتے ہیں۔

سبزیوں میں مٹر، میتھی، پالک، پھلیاں، پتوں والے شلجم اور مولی بھی بے حد مفید ہیں لیکن یورک ایسڈ اور کریٹنائن کے مریض ساگ، میتھی پالک ہرگز استعمال نہ کریں۔

سردیوں میں آلو بھی کھائیں، اس میں پروٹین ہوتی ہے جو گوشت کا نعم البدل ہے، جن لوگوں کے سوکھے اور پچکے گال ہوں وہ میٹھے آلو استعمال کریں جس میں کاربوہائیڈریٹس زیادہ ہیں۔

خون کو صاف کرنے کے لیے کریلے کا استعمال بھی سردیوں میں ہونا چاہیے، اس میں طاقت بھی زیادہ پائی جاتی ہے، جب کہ ٹنڈا، ترئی، لوکی اور اروی جوڑوں کے لیے بھی بہت بہترین ہے، گھٹنوں میں جو کارٹیلج کم ہو جاتا ہے اس کے لیے بھنڈی بہت مفید ہے، اسی طرح جگر کے لیے مورنگا (سوہانجنا) کا استعمال کریں۔

فیس ماسک

سردیوں میں جلد کی خشکی ایک بڑا مسئلہ ہوتا ہے، اور دانے نکل آتے ہیں، تو اس کے لیے سبزیوں کا استعمال کر کے اپنے چہرے کو صاف رکھا جا سکتا ہے، اس کے لیے ایک ماسک تیار کریں۔

ماسک کے لیے کریلے کے بیج لیں، اس کا پاؤڈر بنا لیں، اس سے ایک چائے کا چمچ لیں، پھر بھنڈی کے بیجوں کا ایک چائے کا چمچ پاؤڈر لیں، تمبے کا ایک چائے کا چمچ پاؤڈر لیں، ان سب میں اچھے برانڈ کے ابٹن کی دو چائے کے چمچ ملا لیں۔ اب عرق گلاب میں اس کا پیسٹ بنا لیں، اور پھر اسے چہرے پر لگا لیں، اور آدھے گھنٹے بعد دھو لیں۔

یہ ماسک بالخصوص ان بچیوں کے لیے بہت اچھا ہے جنھیں چہرے پر مہاسے اور دانے نکلتے ہیں، اس پیسٹ سے چند ہی دن میں نہ صرف مہاسے ختم ہوں گے بلکہ ایک ماہ میں نشان اور دھبے بھی ختم ہو جائیں گے۔

پھلوں کے حوالے سے حکیم شاہ نذیر کہتے ہیں کہ سردیوں میں کنو، کیوی، کھجور، اور انار کھائیں تاکہ آپ کے اندر آئرن پورا اور وٹامن سی اور کیلشیم بھی ملے، اور بھولیں مت کہ سردیوں میں آپ نے پانی بھی مناسب مقدار میں لازمی پینا ہے، تاکہ آپ کی آنکھیں خشک نہ ہوں، کم پانی پینے سے گردوں پر بھی اثرات مرتب ہوتے ہیں۔

انھوں نے کہا سردیوں میں پورے جسم کی جلد پر خشکی ہو جاتی ہے جس میں خارش بھی ہوتی ہے، اس کے لیے ایک گلاس دودھ میں میٹھے بادام کے تیل کے دو قطرے ملا کر روزانہ پیئں، اس سے پورے جسم کی خشکی دور ہو جائے گی، اور آپ کو موسچرائزر استعمال کرنے کی ضرورت نہیں پڑے گی۔