Tag: سبق آموز کہانی

کہتے ہیں، ایک بادشاہ کسی باغ کی سیر کو گیا۔ وہاں اپنے مصاحبوں کے درمیان وہ خوش و خرم بیٹھا جو اشعار پڑھ رہا تھا ان کا مفہوم کچھ اس طرح تھا کہ دنیا میں مجھ جیسا خوش بخت کوئی نہیں، کیونکہ مجھے کسی طرف سے کوئی فکر نہیں ہے۔

اتفاق سے ایک ننگ دھڑنگ فقیر اس طرف سے گزرا۔ وہ بادشاہ کی آواز سن کر رک گیا اور اونچی آواز میں ایسا شعر پڑھا جس کا مفہوم کچھ یوں‌ تھا کہ اے بادشاہ اگر خدا نے تجھے ہر طرح کی نعمتیں بخشی ہیں اور کسی قسم کا غم تجھے نہیں ستاتا تو کیا تجھے میرا غم بھی نہیں ہے کہ تیرے ملک میں رہتا ہوں اور ایسی خراب حالت میں زندگی گزار رہا ہوں؟

یہ آواز بادشاہ کے کانوں میں پڑی تو اس فقیر کی طرف متوجہ ہوا اور کہا کہ دامن پھیلائیے۔ ہم آپ کو کچھ اشرفیاں دینا چاہتے ہیں۔ بادشاہ کی یہ بات سن کر فقیر نے کہا کہ بابا، میں تو دامن بھی نہیں رکھتا۔ واقعی فقیر کا کرتہ نہایت خستہ تھا اور اس کا دامن تار تار تھا۔ اس کی یہ بات سن کر بادشاہ ایک لمحے کو جیسے لرز کر رہ گیا۔ بادشاہ کو اس پر اور رحم آیا اور اس نے اسے اشرفیوں کے ساتھ بہت عمدہ لباس بھی بخش دیا۔ فقیر یہ چیزیں لے کر چلا گیا اور چونکہ یہ مال اسے بالکل آسانی سے مل گیا تھا اس لیے ساری اشرفیاں چند ہی دن میں خرچ کر ڈالیں اور پھر بادشاہ کے محل کے سامنے جا کر اپنا دکھڑا پھر رونے لگا۔

کسی نے بادشاہ کو اطلاع کی کہ وہی فقیر اب محل کے اطراف گھومتا رہتا ہے اور آپ کو اپنی حالت پر متوجہ کرتا ہے۔ اس مرتبہ بادشاہ کو فقیر پر غصہ آیا۔ حکم دیا کہ اسے بھگا دیا جائے۔ یہ شخص بہت فضول خرچ ہے۔ اس نے اتنی بڑی رقم اتنی جلدی ختم کر دی۔ اس کی مثال تو چھلنی کی سی ہے جس میں پانی نہیں ٹھہر سکتا۔ جو شخص فضول کاموں میں روپیہ خرچ کرتا ہے وہ سچی راحت نہیں پاسکتا۔

جو شخص دن میں جلاتا ہے شمعِ کا فوری
نہ ہو گا اس کے چراغوں میں تیل رات کے وقت

بادشاہ کا ایک وزیر بہت دانا اور غریبوں کا ہم درد تھا۔ اس نے بادشاہ کی یہ بات سنی تو ادب سے کہا کہ حضورِ والا نے بالکل بجا فرمایا ہے۔ اس نادان نے فضول خرچی کی ہے۔ ایسے لوگوں کو تو بس ان کی ضرورت کے مطابق امداد دینی چاہیے۔ لیکن یہ بات بھی مروّت اور عالی ظرفی کے خلاف ہے کہ اسے خالی ہاتھ لوٹا دیا جائے۔ حضور، اس کی بے تدبیری کو نظر انداز فرما کر کچھ نہ کچھ امداد ضرور کریں۔ وزیر نے بادشاہ کے سامنے یہ خوب صورت اشعار پڑھے اور فقیر پر رحم کرنے کی درخواست کی۔

دیکھا نہیں کسی نے پیاسے حجاز کے
ہوں جمع آبِ تلخ پہ زمزم کو چھوڑ کر
آتے ہیں سب ہی چشمۂ شیریں ہو جس جگہ
پیا سے کبھی نہ جائیں گے دریائے شور پر

سبق: شیخ سعدی سے منسوب اس حکایت میں دو امر غور طلب ہیں۔ ایک طرف تو فضول خرچی اور روپے پیسے کے سوچے سمجھے بغیر استعمال کی حوصلہ شکنی کی گئی ہے اور اسے غلط بتایا ہے جب کہ مال و دولت رکھنے والوں کو کہا گیا ہے کہ جذبات میں آکر نادان اور کم عقل لوگوں پر مال نہ لٹائیں بلکہ خوب سوچ سمجھ کر ضرورت کے مطابق ہی غریبوں کی امداد کریں، لیکن انھیں دھتکارنا درست نہیں ہے کہ وہ مال داروں کی طرف نہ دیکھیں‌ تو کہاں‌ جائیں گے؟ یہ حکایت بتاتی ہے کہ جو لوگ کسی کی بخشش اور خیرات کو بلا ضرورت اور ناجائز صرف کرتے ہیں، ایسی ہی تکلیف ان کا مقدر بنتی ہے۔

کسی گاؤں میں ایک کسان کے گھر کے باہر تین پردیسی بوڑھے مرد آرام کی غرض سے بیٹھے آپس میں گفتگو کر رہے تھے۔

کسان کی بیوی نے ان کو دیکھا تو اُس کے دل میں آیا کہ یہ تینوں لمبے سفر سے آئے لگتے ہیں اور بھوکے ہوں گے۔ وہ انہیں کھانے کی دعوت دینے پہنچ گئی۔

کسان کی بیوی نے انہیں کھانے کی دعوت دی تو ایک بوڑھا بولا ” کیا آپ کے گھر میں آپ کا شوہر یا رشتہ دار کوئی اور مرد موجود ہے؟” وہ بولی ” میرا شوہر کھیتوں میں ہل چلانے گیا ہے اور وہ شام کو واپس لوٹے گا۔” بوڑھے نے عورت کی بات سُن کر جواب دیا ” پھر ہم آپ کے گھر کھانا کھانے نہیں آ سکتے۔”

بوڑھے کے جواب پر کسان کی بیوی واپس گھر لوٹ آئی اور اپنے روزمرہ کے کاموں میں مشغول ہو گئی۔ شام کو کسان کھیتوں سے واپس لوٹا تو اُس نے تینوں بوڑھوں کو گھر کے قریب بیٹھا پایا تو اپنی بیوی سے پُوچھا ” یہ تینوں پردیسی مہمان لگتے ہیں کیا تم نے ان سے کھانے کا پوچھا۔”

بیوی بولی، "میں نے پوچھا تھا، وہ تینوں کسی ایسے گھر میں کھانا نہیں کھاتے جہاں کوئی مرد موجود نہ ہو۔” یہ سُن کر کسان بولا، "تم ان کو دوبارہ دعوت دو اور بتاؤ کے میرا شوہر واپس لوٹ آیا ہے۔”

کسان کی بیوی دوبارہ تینوں کے پاس گئی اور بولی کہ گھر میں میرا شوہر لوٹ آیا ہے، اب آپ تشریف لے آئیں اور کھانے پر ہمارے مہمان بنیں۔ ایک بوڑھا بولا ” ہم تینوں اکھٹے تمہارے گھر کھانا کھانے نہیں آ سکتے، تمہیں چاہیے ہم تینوں میں سے کسی ایک کو اپنے ساتھ لے جاؤ اور کھانا کھلا دو۔”

وہ بوڑھے کے عجیب جواب کو سن کر بولی ” آپ تینوں اکٹھے تشریف کیوں نہیں لاتے”، اس بات پر بوڑھے نے جواب دیا ہم تینوں میں سے کوئی ایک جہاں موجود ہو باقی دو وہاں سے چلے جاتے ہیں، پھر اپنے ایک ساتھی کی طرف اشارہ کیا اور بولا یہ دولت ہے اور یہ جس گھر میں جاتا ہے وہاں کے افراد کو دولت کی ریل پیل ہو جاتی ہے، پھر دوسرے ساتھ کی طرف اشارہ کر کے بولا یہ فتح ہے اور یہ جس گھر میں جائے اُس گھر کے افراد ہر میدان میں کام یاب ہو جاتے ہیں۔ پھر بولا میں محبت ہوں میں جہاں چلا جاؤں وہاں کے مکینوں کے دل محبت سے لبریز ہو جاتے ہیں، اس لیے تم گھر جاؤ اور مشورہ کرو کہ تمہیں ہم میں سے کس کی ضرورت ہے۔

کسان کی بیوی گھر لوٹی اور شوہر کو بوڑھوں کے جواب سے آگاہ کیا۔ اس نے یہ بھی کہا کہ ہمیں دولت کو اپنے گھر کھانے پر مدعو کرنا چاہیے تاکہ ہماری پیسے کی مشکلات حل ہو جائیں۔ یہ سُن کر کسان بولا ہمیں پیسے سے زیادہ کامیابی کی ضرورت ہے، اسے لیے ہمیں فتح کو اپنے گھر بلانا چاہیے، کسان کی بیٹی جو قریب بیٹھی دونوں کی گفتگو سُن رہی تھی بولی” اگر ہم محبت کو اپنے گھر بلائیں تو وہ ہمارے دلوں میں اتنا اطمینان بھر دے گا کہ ہم کو دولت اور کامیابی کی پروا نہیں رہے گی۔” دونوں میاں بیوی بیٹی کی بات سے متفق ہو گئے اور کسان کی بیوی نے جاکرمحبت کو دعوت دے دی۔

ایک بوڑھا اٹھا اور کسان کی بیوی کے ساتھ چل پڑا، جب وہ کسان کے گھر کے دروازے پر پہنچا تو کسان کی بیوی نے دیکھا کہ باقی بوڑھے بھی پیچھے ہی چلے آرہے ہیں۔

اس نے پوچھا، آپ تینوں تو اکھٹے نہیں جاتے، اب کیا ہوا کہ دعوت پر اکٹھے آئے ہیں۔ بوڑھوں نے جواب دیا، فقط محبت ہم میں سے ایک ایسا فرد ہے جس کے بارے میں ہمیں حکم ہے کہ جہاں محبت جائے وہاں اُس کے پیچھے پیچھے چلے جاؤ۔

ایک بادشاہ کی چار بیویاں تھیں۔ یوں تو وہ سبھی سے بہت محبت کرتا تھا، مگر ہر بیوی کے ساتھ اس کا الگ رویہ اور سلوک تھا۔

چوتھی بیوی بادشاہ کی نورِ نظر تھی۔ بادشاہ اسے اکثر بیش قیمت تحائف دیتا اور باقی بیویوں کے مقابلے میں اُس کا جھکاؤ چوتھی بیوی کی طرف زیادہ تھا۔

بادشاہ کی تیسری بیوی انتہائی خوب صورت تھی اور بادشاہ ہمیشہ دربار میں اُس کو اپنے ساتھ تخت پر بٹھاتا تھا۔

دوسری بیوی سمجھدار، بُردبار، مہربان اور تحمل مزاج تھی اور بادشاہ جب بھی کسی مشکل سے دوچار ہوتا اپنی اسی بیوی سے مشورہ کرتا اور اُس کے کہنے پر عمل بھی کرتا۔

اس بادشاہ کی پہلی بیوی انتہائی وفا شعار اور ساتھ نبھانے والی خاتون تھی۔ اسی کی ہمّت اور حوصلہ افزائی نے بادشاہ کو اس سلطنت اور تاج و تخت کا مالک بنایا تھا مگر بادشاہ اُسے نظر انداز کر دیا کرتا تھا اور کبھی اُس کے کسی کام کی تعریف نہیں کی تھی۔

ایک روز بادشاہ بیمار پڑ گیا۔ یہ بیماری اتنی بڑھ گئی کہ بادشاہ کو محسوس ہونے لگا کہ وہ اس دنیا میں کچھ دن کا مہمان ہے۔ وہ بستر پر پڑا سوچ رہا تھا کہ "میں کیسا بادشاہ ہوں؟، میری چار بیویاں ہیں اور جب میں مروں گا تو تنہا مروں گا۔ کوئی بھی میرے ساتھ نہیں جائے گا۔” اس نے اپنی چوتھی بیوی سے کہا ” میری نُور نظر میری موت قریب ہے، میں چاہتا ہوں تم بھی میرے ساتھ چلو تاکہ قبر کی تنہائی میں میرا ساتھ دے سکو۔” اس نے بادشاہ کی بات سن کر منہ دوسری طرف پھیر لیا اور پھر کمرے سے باہر چلی گئی۔ بادشاہ کو بڑا ملال ہوا۔ اس نے یاد کیا کہ کیسے وہ اس بیوی کی خاطر کرتا تھا اور اس کے لیے ہر آسائش مہیا کررکھی تھی۔ اس نے اپنی تیسری بیوی کو بلایا اور اس سے یہی بات کی مگر اس نے بھی ساتھ چلنے سے انکار کر دیا۔

دونوں بیویوں کی ایسی سرد مہری دیکھ کر بادشاہ کا دل ڈوبنے لگا تو اُس نے اپنی دوسری زوجہ سے ساتھ چلنے کی درخواست کی۔ دوسری والی بولی، ” بادشاہ سلامت آپ خود ہی تو فرماتے ہیں، مرنے والوں کے ساتھ مرا نہیں جاتا۔ لہٰذا یہ منزل آپ کو تنہا ہی پار کرنی پڑے گی۔” بادشاہ نے مایوس ہوکر اس سے منہ پھیر لیا۔

ان تینوں بیویوں کو آزمانے کے بعد جب بادشاہ تکلیف اور بے بسی کے ساتھ چھت کی طرف دیکھے جارہا تھا تو اس کے کانوں میں چوتھی بیوی کی آواز پڑی، وہ کہہ رہی تھی ”بادشاہ سلامت! میں آپ کے ساتھ چلوں گی جہاں بھی آپ جائیں گے میں ساتھ دوں گی۔” بادشاہ نے چوتھی بیوی کی طرف دیکھا جو دراصل بادشاہ کے التفات سے محرومی اور کسی موقع پر اہمیت نہ دیے جانے کے سبب ذہنی اذیت سے گزرتی رہی تھی، اور وہ انتہائی لاغر ہوچکی تھی۔ اس کی رنگت زردی مائل نظر آرہی تھی۔ بادشاہ نے اسے قریب پاکر انتہائی رنجیدہ لہجے میں کہا ” میری حقیقی غم خوار! ہائے صد افسوس، کاش میں نے تمہارا خیال اُس وقت رکھا ہوتا جب میرے قبضۂ قدرت میں اختیار تھا۔” یہ جملہ ادا کر کے بادشاہ کا سَر ایک طرف ڈھلک گیا۔ وہ اس دارِ فانی سے کوچ کر گیا تھا۔

اس کہانی میں ایک سبق اور دنیا کی ایک حقیقت پوشیدہ ہے کہ گویا ہر انسان کی زندگی میں چار بیویاں ہوتی ہیں، چوتھی بیوی اُس کا جسم ہے جس کو توانا رکھنے کے لیے وہ ساری زندگی کوشش کرتا ہے مگر ایک دن اُسے یہ جسم چھوڑنا پڑتا ہے۔

تیسری بیوی اس کا مال اور منصب ہے جو مرنے پر چھوٹ جاتا ہے اور دوسروں میں تقسیم ہو جاتا ہے۔ دوسری بیوی کو اگر ہم اس کے رشتہ دار، دوست احباب فرض کریں تو ان کا حال ایسا کہ یہ ہر انسان کے مرنے کے بعد قبر تک اُس کا ساتھ دیتے ہیں اور پھر واپس اپنی عارضی زندگی کی طرف لوٹ جاتے ہیں۔

پہلی بیوی کی مثال انسان کی روح جیسی ہے جس کا ہم ساری زندگی خوب صورت جسم حاصل کرنے کی چاہت، دولت، منصب و جاہ، شان و شوکت حاصل کرنے کی آرزو میں اور محفل عیش و طرب سجانے کے دوران خیال نہیں رکھ پاتے اور کوئی اہمیت نہیں دیتے، جب ہمیں اس کی ضرورت پڑتی ہے تب تک یہ ضیف و لاغر ہو چکی ہوتی ہے۔ ہمیں پہلی بیوی یعنی اپنی روح اور سیرت و کردار کو مضبوط بنانے پر توجہ دینی چاہیے اور یہی وہ سب ہے جو ہمارے مرنے کے بعد قبر میں ہمارا مضبوط سہارا بنتا ہے۔

(قدیم اور سبق آموز کہانیاں)

صدیوں پہلے ایک بادشاہ کو کیا سوجھی کہ اس نے اپنی سلطنت کے ہر خاص و عام کا امتحان لینے کی غرض سے ہیرے سے بھرا ایک بڑا تھیلا وزیر کو تھمایا اور کہا، ”اس میں چند اصلی ہیروں کے ساتھ نقلی ہیرے موجود ہیں جن میں‌ تمیز کرنا آسان نہیں‌ ہوگا۔ اصلی اور نقلی ہیروں کی پہچان کے لیے جوہریوں کو نہیں‌ عام آدمی کو بلانا، یہ کام کوئی بھی ذہین اور دانا شخص کرسکتا ہے۔”

وزیر نے بادشاہ کی خواہش کو پورا کرنے کے لیے اس کی سلطنت میں اعلان کروایا ”جوہریوں کے علاوہ جس شخص کو اپنی ذہانت اور قابلیت پر ناز ہو اور وہ اصلی اور نقلی ہیروں کو پہچان کر الگ کر دے اُسے منہ مانگا انعام دیا جائے گا لیکن اگر کوئی ناکام ہوگیا تو ہمیشہ کے لیے زندان میں پھینک دیا جائے گا۔”

یہ اعلان سن کر کئی لوگ اپنے علم اور ذہانت کو آزمانے کے لیے بادشاہ کے محل پہنچے مگر نقلی ہیرے ظاہری طور پر اور ہر لحاظ سے اصلی ہیروں سے اس قدر قریب تھے کہ ان سے تو جوہری بھی یہ دھوکا کھا جاتے، عام آدمی کیسےکام کرتا اور یہی وجہ تھی کہ ان سب کو قید خانہ میں پھینک دیا گیا۔ کئی لوگوں کو ناکام کوشش کے بعد سزا ہو چکی تھی اور یہ دیکھ کر کوئی بھی منہ مانگے انعام کی لالچ میں آگے بڑھنے کو تیار نہ تھا۔

ایک روز ایک عمر رسیدہ اندھا محل کے دروازے پر پہنچا اور کہا کہ وہ منادی سن کر آیا ہے اور اصلی ہیروں کو الگ کرنا چاہتا ہے۔ اسے بادشاہ تک رسائی دی جائے۔ محافظوں نے یہ سنا تو قہقہے لگانے لگے اور بوڑھے کا خوب مذاق اڑایا لیکن وہ اپنی ضد پر قائم رہا اور تب اس کو وزیر تک پہنچا دیا گیا۔ وزیر اور اس کے ساتھیوں کو جب معلوم ہوا کہ بوڑھا نابینا ہے تو وہ اس کا مذاق اڑانے لگے اور طعنے دیے۔ وزیر نے کہا بڈھے کیوں اپنی جان کا دشمن ہوا ہے، یہاں‌ تجھ سے پہلے کئی جوان اور ہر لحاظ سے صحت مند آئے مگر ان سے یہ کام نہ ہوسکا۔ اب بھی وقت ہے گھر لوٹ جا اور باقی ماندہ زندگی بینائی لوٹ آنے کی دعائیں‌ کرتے ہوئے گزار دے۔ یہ کڑوی اور دل فگار باتیں سن کر بوڑھے نے وزیر کو کہا کہ آپ کی شان سلامت رہے، میں قسمت آزمائے بغیر نہیں‌ جانا چاہتا۔ وزیر نے اسے بادشاہ تک پہنچا دیا۔

بادشاہ نے اسے دیکھ کر کہا ” کیوں اپنی جان کے دشمن بنتے ہو، تم سے پہلے آنکھوں والے کئی قابل لوگ اس مقصد میں ناکام ہوکر زندان میں سڑ رہے ہیں۔ بہتر ہے کہ تم اپنے اس قصد سے باز آجاؤ، میں ڈرتا ہوں کہ اس عمر کے ایک اندھے کو قید خانہ میں زندگی کے دن پورے نہ کرنا پڑ جائیں۔”

اندھے نے ادب سے جواب دیا، ” بادشاہ سلامت میں اگر اصلی ہیرے نہ پہچان سکا تو میں آپ کی سزا کے لیے خوشی سے تیار ہوں۔ یہ میرا انتخاب ہو گا، آپ سے کوئی شکوہ کیوں کروں گا۔”

بادشاہ نے اندھے کو ہیرے پہچاننے کی اجازت دے دی۔ وہ اندھا ہیروں کا تھیلا لے کر ایک کمرے میں چلا گیا۔ اور کچھ دیر کے بعد آکر بولا کہ اس نے اصلی اور نقلی ہیرے الگ کر لیے ہیں۔ بادشاہ نے وزیر کو اشارہ کیا۔

وزیر نے اچھی طرح ہیروں کا معائنہ کیا اور بادشاہ سے بولا ” عالی جاہ! حیرت کا مقام ہے، ایک اندھا نقلی ہیروں کو اصلی ہیروں سے الگ کرنے میں واقعی کام یاب ہو گیا ہے۔”

بادشاہ یہ جان کر دنگ رہ گیا۔ اس نے بے چینی سے اندھے سے پوچھا، تم نابینا ہو اس کے باوجود اصلی اور نقلی ہیروں کو پہچان لیا، ہمیں‌ یہ راز بتاؤ؟ اندھا بولا ” یہ کام بہت آسان تھا جناب۔ میں نے سارے ہیرے آگ کے قریب رکھ دیے، جو ہیرے اصلی تھے ان کو ہاتھ لگا کر دیکھا تو وہ آگ کی حدّت سے گرم نہیں ہوئے تھے اور جو نقلی تھے وہ تپنے لگے، میں ان کو الگ کرتا گیا۔”

بادشاہ یہ سن کر بہت خوش ہوا۔ اس نے اندھے کو بہت سا انعام دیا اور جب وہ بوڑھا رخصت ہونے لگا تو بادشاہ سے بولا کہ میں ایک اور بات کہنا چاہتا ہوں۔ بادشاہ نے اسے بخوشی اجازت دے دی۔ وہ بولا، حضور دنیا میں محنتی اور بہترین اوصاف کے مالک انسان کی پہچان بھی اسی طرح کی جاسکتی ہے کہ جو محنتی اور اعلیٰ ظرف ہوتا ہے وہ ان ہیروں جیسا ہی ہے کہ جب دنیا کی مشکلات اور تلخیاں اس پر پڑتی ہیں‌ تو وہ ان کو سہہ لیتا ہے اور دل شکنی کرنے والوں اور ان کے طنز اور طعنوں کے مقابلے میں اپنے اوصافِ‌ حمیدہ کو مٹی میں‌ نہیں ملا دیتا اور اخلاق سے نہیں گرتا بلکہ آگے بڑھ جاتا ہے۔ ایسے شخص کی مثال اصلی ہیرے جیسی ہوتی ہے۔ مگر وہ جو ان تلخیوں پر اپنا توازن کھو بیٹھے، اور نچلی سطح تک گر جائے، وہ نقلی ہوتا ہے۔ یہ کہہ نابینا شخص دربار سے چلا جاتا ہے اور وہ تمام وزیر اور درباری شرمندہ ہو کر نظریں نیچی کر لیتے ہیں جو کچھ دیر پہلے اسے معذور اور ناتواں سمجھ کر طعنے دے رہے تھے۔

(ایک سبق آموز قدیم کہانی)

کسی اسکول کے طلباء ایک روز کرکٹ کے میدان میں‌ جمع تھے۔ انھیں اچانک خیال آیا کہ کیوں نہ اپنے استاد کو بھی میدان میں اترنے کی دعوت دیں، کیوں کہ وہ کرکٹ کے کھیل کا بہت شوق رکھتے تھے اور انھیں کئی ملکی اور غیر ملکی کھلاڑیوں کے ریکارڈ اور ان کے بارے میں بہت سی معلومات بھی تھیں۔ طلباء دیکھنا چاہتے تھے کہ ان کے استاد خود کتنے اچھّے کھلاڑی ہیں۔

چند لڑکے اپنے استاد کے پاس گئے اور انھیں کہا، سَر آج آپ ہمارے ساتھ کرکٹ کھیلیں۔ استاد نے فوراً ہامی بھر لی اور ان کے ساتھ میدان میں چلے آئے۔

کھیل شروع ہوا تو دیگر کلاسوں کے طلباء بھی میدان میں اکٹھے ہوگئے۔ چوں کہ بچّے اپنے اساتذہ سے بہت محبّت کرتے ہیں اور اپنے درمیان ان کی موجودگی اور دوستانہ تعلق انھیں زیادہ پُرجوش اور جذباتی بنا دیتا ہے، اسی لیے آج سب کی توجہ استاد پر تھی۔ پانچ گیندوں پر استاد نے صرف دو رن بنائے اور چھٹی گیند پر کلین بولڈ ہو گئے۔ طلباء نے شور مچا کر بھرپور خوشی کا اظہار کیا۔

دوسرے دن کلاس میں استاد نے پوچھا کون کون چاہتا تھا کہ وہ مجھے ضرور آؤٹ کرے؟

سب بولروں نے ہاتھ کھڑے کر دیے۔ استاد مسکرائے اور پوچھا، یہ بتاؤ میں کرکٹر کیسا ہوں..؟

سب نے یک زباں ہوکر کہا ،بہت برے۔

پوچھا، اچھا میں استاد کیسا ہوں۔

جواب ملا بہت اچھے۔

استاد نے ہنستے ہوئے کہا، صرف آپ نہیں آپ سے پہلے بھی میں نے جن بچّوں کو پڑھایا اور آج وہ عملی زندگی کا آغاز کرچکے ہیں، سب مجھے ایک اچھا استاد مانتے ہیں۔ آج میں راز کی ایک بات بتاؤں کہ میں جتنا اچھا استاد ہوں، اتنا اچھا طالبِ علم کبھی نہیں رہا۔ مجھے ہمیشہ سبق یاد کرنے میں دشواری کا سامنا کرنا پڑتا تھا اور بات سمجھنے میں وقت لگتا تھا لیکن کیا آپ بتا سکتے ہیں اس کے باوجود مجھے اچھا استاد کیوں مانا جاتا ہے..؟

سَر آپ بتائیں، ہمیں نہیں معلوم، طلباء نے کہا۔

اس پر استاد نے انھیں ایک واقعہ سنانا شروع کیا۔ مجھے اچھی طرح یاد ہے ایک دن میں اپنے ٹیچر کے گھر دعوت کی تیاری میں ان کی مدد کر رہا تھا۔ فریزر سے برف نکالی، جسے توڑنے کے لیے کمرے میں کوئی چیز نہیں تھی۔ استاد کام کے لیے کمرے سے نکلے تو میں نے مکا مار کر برف توڑ دی اور استاد کے آنے سے پہلے جلدی سے ٹوٹی ہوئی برف دیوار پر بھی دے ماری…

دوستو، آپ سوچ رہے ہوں گے کہ جب میں برف توڑ چکا تھا، تو پھر یہ حرکت کرنے کی کیا ضرورت تھی، اس کا جواب آپ کو ابھی مل جائے گا۔

استاد کمرے میں آئے تو وہی محسوس کیا جو میں چاہتا تھا، انھوں نے دیکھا کہ میں نے برف دیوار پر مار کر توڑی ہے۔ مجھے ڈانٹنے لگے اور کہا کہ تمہیں عقل کب آئے گی، یوں برف توڑی جاتی ہے، میں نے ان کی ڈانٹ خاموشی سے سنی اور وہ دن گزر گیا۔ بعد میں انھوں نے میری اس بیوقوفی کا ذکر کئی جگہ کیا۔ لیکن یہ راز آج تک نہیں جان سکے کہ برف تو میں نے اپنی جسمانی طاقت سے ہاتھوں کا استعمال کرتے ہوئے توڑی تھی ۔

یہ بات میں نے انھیں اس لیے نہیں بتائی کہ وہ ایک ہاتھ سے معذور تھے۔ ان کی غیر موجودگی میں، میں نے جوانی کے جوش میں مکا مار کر برف توڑ دی، لیکن جب ان کی معذوری کا خیال آیا تو سوچا کہ کہیں میرے طاقت کے مظاہرے سے انھیں احساسِ کمتری نہ ہو، اس لیے میں نے برف دیوار پر مارنے کی احمقانہ حرکت کی اور کئی سال تک ان کی ڈانٹ سنتا رہا۔

جب میں‌ آپ کے درمیان میدان میں موجود تھا اور بیٹنگ کر رہا تھا، تو میں نے غور کیا کہ آپ سب ایک دوسرے کو چیخ چیخ کر کہہ رہے ہیں کہ سَر کو آؤٹ کرو۔ یاد رکھو جیتنا سب کچھ نہیں ہوتا، کبھی ہارنے سے بھی زندگی میں جیت کے رستے کھلتے ہیں۔ آپ طاقت میں اپنے اساتذہ اور والدین سے بے شک آگے بڑھ جاتے ہیں، لیکن زندگی میں کبھی اپنے اساتذہ اور والدین کو ہرانے کی کوشش مت کیجیے گا۔ اللہ پاک آپ کو ہر میدان میں سرخرو کرے گا۔