رام موہن رائے ہندوستانی سماج کی ایک روشن خیال شخصیت تھے جنھوں نے ہندو دھرم اور معاشرے کے رسم و رواج میں اصلاح کی غرض سے برہمو سماج نامی تحریک کی بنیاد رکھی تھی۔ موہن رام رائے نے ہندو شخصیات ہی نہیں مسلمان اکابرین کو بھی اپنے خیالات سے متأثر کیا جن میں سرسیّد بھی شامل ہیں۔
موہن رام رائے ایسے دور اندیش انسان تھے جس نے بالخصوص ہندوؤں کو توہّم پرستی اور تعصّبات سے نکالنے کی عملی کوششوں کے علاوہ ان میں رائج غلط رسم و رواج کی نشان دہی کی اور اس کے لیے قلم کا سہارا بھی لیا۔
ہندوستان پر ایسٹ انڈیا کمپنی کے اقتدار کے بعد ہندوؤں اور مسلمانوں کے بڑوں نے اس بات پر غور کیا کہ وہ کون سی کمزوریاں ہیں جن سے فائدہ اٹھا کر غیر ملکی انھیں زیر کرنے میں کام یاب ہوئے۔ ہندوستانی سماج میں اکثریت قدامت پرستی کی زنجیروں میں جکڑی ہوئی تھی۔ وہ سمجھتے تھے کہ ان کی روایات اور رسم و رواج مقدس ہیں اور ان میں کسی قسم کی تبدیلی ان کے وجود کو گویا مٹا دے گی۔ ان کے برعکس اس معاشرے کے روشن خیال لوگ اپنی کمزوریوں کو سمجھنا چاہتے تھے اور ان باتوں پر یقین نہیں رکھتے تھے جن سے ان کی ترقی اور اجتماعی مفاد کا راستہ مسدود ہو رہا تھا۔ یہ لوگ راجہ رام موہن کی فکر سے متاثر ہوئے بغیر نہیں رہ سکے اور ان کا ساتھ دیا۔
1833ء میں آج ہی کے دن رام موہن رائے انتقال کرگئے تھے۔ چند سال قبل ایک موقع پر راجہ صاحب نے اپنا وحدانی نظریہ اس طرح قلم بند کیا تھا، ”پرستش اسی ذات کی ہونی چاہیے جو غیر فانی ہے، جس کا پتا تلاش سے نہیں ملتا، جو تغیر سے محفوظ ہے اور جو تمام کائنات کو پیدا کرتی اور قائم رکھتی ہے۔“ ان کا توحید پر مبنی یہ فلسفہ ہندو سماج اور خود رام موہن رائے کے خاندان والوں کے لیے ناقابلِ قبول تھا اور انھیں اپنا گھر چھوڑنا پڑگیا۔
برہمن خاندان میں 1774ء میں آنکھ کھولنے والے رام موہن رائے نے گاؤں کے ایک مکتب میں ابتدائی تعلیم مکمل کی اور اسی دوران فارسی کے ساتھ عربی بھی سیکھی۔ پٹنہ اس زمانے میں اسلامی فنون و تعلیمات کا بڑا مرکز تھا۔ رام موہن رائے کو ان کے والد نے تحصیلِ علم کی غرض سے وہاں بھیج دیا۔ پٹنہ میں رام موہن رائے نے اسلامی تعلیمات، قرآن اور دیگر مذہبی کتب کا مطالعہ بھی کیا اور انھیں علومِ شرقیہ سیکھنے کا موقع ملا۔ غالباً اسی کے زیرِ اثر وہ بُت پرستی اور بعض عقائد کے سخت نکتہ چیں بن گئے اور یہی وجہ تھی کہ انھیں والد نے قبول نہ کیا۔
راجہ صاحب کا تعلق بنگال کے گاؤں رائے رادھا نگر سے تھا جہاں ان کا خاندان کئی پشتوں سے صوبے کے مغلیہ دور کے امرا سے وابستہ رہا تھا۔ ان کے والد کٹّر مذہبی شخص تھے اور والدہ بھی اپنے مذہب پر کاربند ایک نیک سیرت عورت مشہور تھیں۔ پٹنہ سے لوٹنے کے بعد جب ان کے والد کو معلوم ہوا کہ رام موہن رائے بُت پرستی کے مخالف ہوگئے ہیں تو انھیں گھر چھوڑ دینے کا حکم دیا۔ وہ شہروں شہروں پھرے اور اسی زمانے میں انگریزی، فرانسیسی، لاطینی، یونانی اور عبرانی زبانیں سیکھیں۔ انھوں نے آزادی سے ہندو مت، عیسائیت اور بدھ مت کی مقدس کتب کا مطالعہ کیا اور غور و فکر کرتے رہے۔ وہ سرکاری ملازم تھے، لیکن 39 سال کی عمر میں اپنے فرائض سے سبک دوش ہو گئے اور کلکتہ میں سکونت اختیار کر لی۔ اس عرصے میں رام موہن نے تقابلِ ادیان کا سلسلہ جاری رکھا۔ اب وہ عربی، فارسی کے عالم بھی مشہور ہوگئے تھے اور مذہب سے متعلق اپنی فکر کا پرچار بھی شروع کر دیا تھا۔ انھوں نے اپنی فکر اور خیالات کو رقم کرنے کے ساتھ متعدد مذہبی کتب کا سنسکرت، انگریزی اور بنگالی میں ترجمہ بھی کیا۔
رفتہ رفتہ موہن رائے ہندوؤں میں مذہب بیزار مشہور ہوگئے۔ اور ان کے خلاف باتیں کی جانے لگیں، لیکن انھیں کسی کی پروا نہ تھی۔ وہ مختلف شخصیات اور عام لوگوں سے ملتے اور اپنی فکر کا اظہار کرتے رہے۔ انھوں نے انگریز حکومت سے ہندوستان میں سائنسی علوم کی ترویج اور اداروں کے قیام کا پُرزور مطالبہ کیا۔ انگریزوں میں بھی وہ ایک مصلح اور علم دوست انسان کے طور پر پہچانے جاتے تھے اور ان کی بہت عزّت تھی۔ مشہور ہے کہ جب انگریزوں نے سنسکرت کالج قائم کرنے کا اعلان کیا، تو رام موہن رائے نے گورنر جنرل کو لکھا کہ ہندوستان میں سنسکرت کی تعلیم سے زیادہ سائنسی علوم کو رواج دینے کی ضرورت ہے۔ انھوں نے ریاضی، نیچرل فلاسفی، کیمسٹری، اناٹومی اور دوسرے جدید علوم کے لیے انتظامات کو وقت کی ضرورت قرار دیا۔
اس دور کی تاریخ اٹھا کر دیکھی جائے تو معلوم ہو گا کہ ہندوؤں کے ساتھ مسلمان بھی انگریزی تہذیب و ثقافت اور ان کے رہن سے سہن سے خائف تھے اور انگریزی زبان اور جدید تعلیم سے بیزار نظر آتے تھے۔ ہر سطح پر انگریزی تعلیم کی مخالفت کی جارہی تھی، لیکن جس طرح سرسّید نے مسلمانوں کو جدید تعلیم کے حصول کے لیے متوجہ کیا تھا، اسی طرح راجہ رام موہن نے ہندوؤں کو قائل کرنے کے لیے کوششیں کیں کہ وہ جدید علوم اور سائنس کو اہمیت دیں جس نے انھیں قدامت پسندوں میں متنازع بنا دیا تھا۔
رام موہن رائے نے کلکتہ میں قیام کے دوران یہ سمجھ لیا تھا کہ انگریزوں کی غلامی کا طوق ان کی زبان اور جدید علوم سیکھے بغیر نہیں اتارا جاسکتا اور یہی وجہ تھی کہ وہ ہندوؤں کو انگریزی زبان سیکھنے پر زور دیتے رہے۔ انھوں نے ہندو سماج میں ذات پات کی تفریق اور ستی کی رسم سے بیزاری کا اظہار کرتے ہوئے 1828ء میں برہمو سماج تنظیم قائم کی جس کے ذریعے ہندوؤں کو فضول رسموں اور توہم پرستی سے دور کرنے کی کوشش کی۔ انھوں نے ہندو بیواؤں کو دوبارہ شادی کرنے کا حق دینے کی حمایت میں بھی تحریک چلائی۔ ان باتوں نے قدامت پرست معاشرے میں ہندوؤں کو ان کے خون کا پیاسا بنا دیا، لیکن راجہ صاحب کہتے تھے کہ میں نے کبھی ہندو مذہب پر حملہ نہیں کیا، صرف توہّم پرستی اور تعصّب کی نشان دہی کی ہے۔ راجہ صاحب کا ایک وصف دیانت داری، ان کا انکسار بھی تھا جس نے انھیں مباحث کے دوران ہمیشہ عالمانہ وقار پر قائم رکھا اور وہ اپنے مخالفین کا بھی احترام کرتے تھے۔ مشہور ہے کہ وہ تحمل سے اپنے مخالف کی بات سنتے اور دلیل اور منطق سے قائل کرنے کی کوشش کرتے۔تاہم ہندوؤں کے ساتھ عیسائی مذہب پر سوالات اٹھانے کے بعد انھیں زبردست مخالفت کا سامنا کرنا پڑا اور ہندوستانی قوم کے دشمن مشہور ہوگئے۔
راجہ رام موہن رائے کا ایک کارنامہ “تحفتہُ المؤحدین” نامی رسالہ ہے جو فارسی میں لکھا گیا جب کہ اس کا دیباچہ عربی میں تھا۔ اس رسالے میں انھوں نے مذہبی بت پرستی پر سخت اعتراضات کیے تھے۔ انھوں نے جدید تعلیم کے فروغ کے لیے کوششوں کے علاوہ اخبار و رسائل بھی شایع کیے جن میں سے ایک فارسی زبان کا 1822ء کا مراۃ الاخبار ہے جس کے مالک اور مدیر رام موہن رائے تھے۔
سر سّید احمد خان نے بھی راجہ صاحب کی تعریف کی ہے، وہ لکھتے ہیں، “راجہ رام موہن رائے نہایت لائق اور ذی علم اور متین، مہذب و بااخلاق شخص تھے۔ راقم (یعنی سر سیّد احمد خان ) نے آپ کو متعدد بار دربارِ شاہی میں دیکھا ہے اور دلّی کے لوگ یقین کرتے تھے کہ ان کو مذہبِ اسلام کی نسبت زیادہ رجحان خاطر ہے۔ ”
راجہ رام موہن رائے رفاہِ عامّہ کے کاموں کے لیے بھی مشہور تھے۔ انھوں نے ہندوستان کے شہروں میں متعدد یتیم خانے، مکتب اور شفا خانے بھی تعمیر کرائے اور لڑکیوں کی تعلیم کے لیے اسکول قائم کیے تھے۔
رام موہن رائے مغل بادشاہ شاہ عالم کی پنشن کا مقدمہ لڑنے کے لیے ان کے وکیل کی حیثیت سے لندن میں تھے جہاں ان کا انتقال ہوگیا۔
