ہر انسان کو زندگی میں عام طور پر مشکلات اور سخت آزمائشوں کا سامنا کرنا پڑتا ہے اس دوران خود پر قابو پانا اور معاملات کو خوش اسلوبی سے حل کرنا ہی کامیابی کی علامت ہے۔
ایسے حالات کا مقابلہ کرنا آسان کام نہیں ہوتا انسان بے بسی اور مایوسی کے عالم میں چڑچڑے پن کا بھی شکار ہوجاتا ہے، اگر یوں کہا جائے تو بہتر ہوگا کہ مشکل حالات کا سامنا عموماً آسان حالات کی نسبت زیادہ کرنا پڑتا ہے۔
اس حوالے سے اے آر وائی ڈیجیٹل کے پروگرام گڈ مارننگ پاکستان میں ڈاکٹر ام راحیل نے اپنی آپ بیتی سنائی کہ بیٹے کی موت کے بعد ان پر کیا گزری اور پھر انہوں نے مشکلات کا کیسے مقابلہ کیا۔
ڈاکٹر ام راحیل نے بتایا کہ شادی کے بعد میری زندگی بالکل بدل کر رہ گئی تھی، اللہ نے مجھے 4بیٹیوں اور ایک بیٹے سے نوازا اور یہی میری کل کائنات تھے، گھر کی پریشانیوں اور شوہر کے نامناسب رویے کے بعد میرے بچے ہی میرا سب سے بڑا سہارا تھے۔
میں کبھی سوچ بھی نہیں سکتی تھی کہ ان میں سے کوئی بھی بچہ مجھے روتا چھوڑ کر کہیں جاسکتا ہے لیکن میرا جوان بیٹا دنیا چھوڑ کر چلا گیا، بیٹے کی موت نے مجھے توڑ کر رکھ دیا، جب راحیل کا قتل ہوا تو میں کئی دن تک اس بات کا یقین ہی کرپائی روزانہ قبرستان جاکر قبر کے پاس گھنٹوں بیٹھی رہتی تھی مجھے کسی طرح بھی چین نہیں مل رہا تھا۔
انہوں نے بتایا کہ بیٹے کی موت کے بعد گھریلو حالات بھی اس نہج پر جا پہنچے کہ مجھے شوہر کا گھر چھوڑ کر اپنی چار بیٹیوں سمیت میکے واپس آنا پڑا اور بعد ازاں بیٹیوں کے سمجھانے پر خود پر کافی حد تک قابو پایا اور ان کی خاطر زندگی کو معمول پر لانا پڑا۔