راولپنڈی : سربراہ عوامی مسلم لیگ شیخ رشید نے کہا ہے کہ عمران خان اپنی شادی سے متعلق خبروں کا جواب خود دے سکتے ہیں میرا اُن سے سیاسی تعلق ہے ذاتی نوعیت کا نہیں ہے.

شیخ رشید میڈیا کے سوالوں کے جواب دے رہے تھے، اُن کا کہنا تھا کہ عمران خان کی شادی کے حوالے سے اتنا شورمچا ہوا ہے تو کوئی نہ کوئی بات تو ہوگی لیکن میرے علم میں ایسی کوئی بات نہیں ہے.

انہوں نے کہا کہ میرا عمران خان سے تعلق خالص سیاسی نوعیت کا ہے اس لیے ان کی نجی زندگی پر کوئی تبصرہ کرنے سے قاصر ہوں تاہم اگرعمران خان کی شادی کی خبر درست ہے تو میں انہیں مبارک باد دوں گا.

خیال رہے بعض اخبارات میں چیئرمین تحریک انصاف عمران خان کی تیسری شادی کے حوالے سے خبریں گردش کر رہی ہیں تاہم عمران خان کے قریبی ذرائع اور جن خاتون کا تذکرہ کیا جا رہا ہے اُن کے صاحبزادے نے بھی تردید کردی ہے.

قبل ازیں چکوال میں تحریک انصاف کے جلسے سے خطاب کرتے ہوئے شیخ رشید کا کہنا تھا کہ 9 جنوری کو چکوال کی عوام پی ٹی آئی کے انتخابی نشان بلے پر مہر لگا کر کرپشن کی سیاست کو ہمیشہ کے لیے شکست دے دی گی جس پر میں ابھی سے مبارک باد دیتا ہوں.

انہوں نے کہا کہ امریکی دباؤ مودی کی وجہ سے آیا ہے اور نواز شریف مودی کا یار ہے اس لیے مودی کے یار کو ووٹ دینے والا بھی مودی کا یار ہوگا اور میں جانتا ہوں کہ چکوال کی عوام ایسی نہیں.

شیخ رشید نے کہا کہ سی پیک پاکستان کی معیشت کی ریڑھ کی ہڈی ہے جس کے باعث چین 45 کے بجائے 13 دن میں مشرق وسطیٰ پہنچے گا جس کا پورا فائدہ پاکستان کو ہوگا.

لاہور : سربراہ عوامی مسلم لیگ شیخ رشید نے کہا ہے کہ نوازشریف گھناؤنا کھیل کھیل رہے ہیں جس کے خطرناک نتائج نکل سکتے ہیں، مریم نوازعمران خان کی ذاتی زندگی پر گفتگو نہ کریں ورنہ بات دور تک جائے گی.

وہ میڈیا سے گفتگو کر رہے تھے، شیخ رشید کا کہنا تھا کہ سعودی عرب میں ملاقاتوں کے بعد لوگوں نے پُڑیاں واپس کردی ہیں اور اب وہاں سے کسی کو کسی قسم کی مدد این آر او کی صورت میں نہیں مل سکتی.

انہوں نے کہا کہ شریف خاندان پہلی مرتبہ بری طرح پھنس چکا ہے اور اس بار انہیں کوئی نہیں بچا سکتا کیوں کہ سپریم کورٹ اور پاک فوج نے کرپشن سے پاک ملک کے عزم کا اعادہ کررکھا ہے.

شیخ رشید کا کہنا تھا کہ قومی اسمبلی میں اپوزیشن لیڈر خورشید شاہ بھی بدلے بدلے سے لگ رہے ہیں کیونکہ آصف زرداری بھی بدل گئے ہیں، اب الیکشن وہی جیتے گا جس کی سیاست چوک اور چوراہوں پر ہوگی.

انہوں نے مزید کہا کہ آمریت سے جنم لینے والے جمہوریت کی بات کریں تو ہنسی آتی ہے ان کا ماضی سب جانتے ہیں اس لیے مریم نواز کسی کی ذاتی معاملات میں نہ آئیں تو بہتر ہے ورنہ باتیں دور تک جائیں گی.

سربراہ عوامی مسلم لیگ نے آئندہ الیکشن کے منظر نامے پر روشنی ڈالتے ہوئے کہا کہ آئندہ انتخابات میں مختلف قسم کے اتحاد بنیں گے البتہ کامیابی صرف عوامی سیاست کرنے والوں کو ہی ملے گی.

ایک سوال کے جواب میں شیخ رشید نے کہا کہ خواہش ہے عمران خان اسلامی قوتوں کو آئندہ الیکشن میں اپنے ساتھ ملالیں اور اس طرح بھرپور طاقت کے ساتھ مسلم لیگ (ن) کا صفایا کردیا جائے.

ملتان : سربراہ عوامی مسلم لیگ شیخ رشید نے کہا ہے کہ کلبھوشن یادیو کی گرفتاری بڑی کامیابی ہے وہ بھارت کا حاضر سروس نیوی افسر اور جاسوس تھا جو پاکستان میں دہشت گردی کے واقعات کا ذمہ دار ہے.

ان خیالات کا اظہار انہوں نے ملتان میں‌ میڈیا سے گفتگو کرتے ہوئے کیا، شیخ رشید کا کہنا تھا کہ بھارتی دہشت گرد کی اُس کے اہلِ خانہ سے ملاقات کرانا بنیادی انسانی حقوق کی فراہمی کے ساتھ ساتھ بین الااقوامی قوانین کے احترام کا مظہر ہے اور پاکستان ہمیشہ سے ان اعلیٰ روایات کا امین رہا ہے.

شیخ رشید کا کہنا تھا کہ گو اقوام متحدہ میں کلبھوشن کے معاملے پر حکومت نے بے ایمانی کی اور جنیوا میں کلبھوشن کا کیس ٹھیک نہیں لڑا تاہم جنیوا قانون کے مطابق ملاقات کرانا مثبت قدم ہے لیکن دہشت گردوں اورملک دشمن جاسوسوں کو کسی صورت نہیں چھوڑیں گے.

ایک سوال کے جواب میں انہوں نے کہا کہ عمران خان اور طاہر القادری کی ملاقات کامیاب ہوگی جس کے مثبت نتائج ملیں گے اور قوم کو نئی خوشخبری ملے گی چنانچہ اب پوری قوم لاہور جانے کے لیے تیار ہو جائے جہاں سے کرپٹ حکمرانوں کا جنازہ نکلے گا.

لاہور : سربراہ پاکستان عوامی تحریک ڈاکٹر طاہر القادری نے کہا ہے کہ 28 دسمبر کو کُل جماعتی کانفرنس کا انعقاد کر رہے ہیں جہاں اپنا لائحہ عمل پیش کرکے دیگر سیاسی جماعتوں سے رائے لیں گے.

اس بات کا اعلان انہوں نے سربراہ عوامی مسلم لیگ شیخ رشید کے ہمراہ پریس کانفرنس سے خطاب کرتے ہوئے کہا، طاہر القادری کا کہنا تھا کہ 28 دسمبر کو ہونے والی کل جماعتی کانفرنس میں ملک کی تمام مذہبی اور سیاسی جماعتوں کو مدعو کریں گے اس موقع پر شیخ رشید نے اے پی سی میں شرکت اور مکمل تائید کا اعلان بھی کیا.

طاہر القادری کا کہنا تھا کہ باقرنجفی رپورٹ سے ثابت ہوتا ہے کہ پولیس افسران حقائق بتانے کو تیار نہیں تھے اور میری اطلاعات کے مطابق بھی سانحہ ماڈل ٹاؤن مکمل منصوبہ بندی اور پنجاب حکومت کی آشیرباد سے برپا کیا گیا جس کے لیے 45 تھانوں کی نفری اور نشانہ باز بلوائے گئے تھے.

انہوں نے مزید بتایا کہ خود سرکاری ریکارڈ میں درج ہے کہ پنجاب بھر سے 809 شوٹرز اوراسنائپرز کو ماڈل ٹاون لایا گیا چنانچہ یہ طے ہے کہ اتنا بڑا آپریشن وزیراعلیٰ پنجاب کے احکامات کے بغیرہو ہی نہیں سکتا تھا اس لیے مطالبہ کرتے ہیں کہ 31 دسمبر سے پہلے شہبازشریف اور رانا ثنا مستعفی ہوں.

اس موقع پر عوامی مسلم لیگ کے سربراہ شیخ رشید نے طاہر القادری کی جانب سے بلائی گئی کل جماعتی کانفرنس کی حمایت کرتے ہوئے اپنے تعاون کی مکمل یقین دہانی کرائی اور قصاص کے حصول کے لیے پاکستان عوامی تحریک کے ہمراہ جدوجہد کا اعلان بھی کیا.

شیخ رشید کا کہنا تھا کہ شریف برادران ڈبل گیم کھیل رہے ہیں اور ایسا محسوس ہوتا ہے جیسے ملک میں رام اور شام کی فلم چل رہی ہے،نوازشریف عالمی ایجنڈے پر چل کر تباہی چاہتے ہیں اب بہت ہوگیا ہے یہ روزروز کا مذاق ختم ہوجانا چاہیے.

انہوں نے مزید کہا کہ حکومت نے اپنی حمایت کے لیے 9.3 بلین روپے بانٹے ہیں جو کیپٹن صفدر، شیخ آفتاب اورایک سینیٹر کے ذریعے تقسیم کیے گئے اور وکٹوں کے دونوں جانب کھیلنے والے خاقان عباسی نے جتنا خفیہ فنڈ بانٹا ہے اتنا تو اسحاق ڈارنے بھی تقسیم نہیں کیا تھا.

ایک سوال کے جواب میں شیخ رشید نے کہا کہ عمران خان ڈاکٹر طاہر القادری کے شانہ بشانہ کھڑے ہیں شریف خاندان عدالتوں میں تاخیری حربے استعمال کر رہا ہے اگر کو اسحاق ڈار کرپشن سے پاک ہیں تو انہیں وطن واپس آکر مقدمات کا سامنا کرنا چاہیے.

شہبازشریف کے وزیراعظم بننے سے متعلق پوچھے گئے سوال کے جواب میں طاہر القادری نے کہا کہ شریف برادران ایک ہی جسم کے دو چہرے ہیں اس لیے اگر نوازشریف ہٹے اور شہبازشریف آ جائیں تو ظلم کے راج پر کوئی فرق نہیں پڑے گا.