اسلام آباد : عوامی مسلم لیگ کے سربراہ شیخ رشید نے کہا ہے کہ پاناما کیس کے فیصلے کا انتظار ہے جس کے بعد پورے ملک میں مہم چلائیں گے۔
وہ ایک ہنگامی پریس کانفرنس سے خطاب کر رہے تھے انہوں نے کہا کہ پاناما کیس میں پوری قوت سے عدالت میں کیس لڑا ہے کیوں کہ ملک کو کرپٹ لوگوں سے بچانے کا یہ آخری موقع ہے اور کرپشن کے ممکل خاتمے کا انحصار اسی کیس پر ہے۔
شیخ رشید نے کہا کہ عدالت پر پورا اعتماد ہے اور قوی امید ہے کہ پاناما کیس کا فیصلہ عوامی امنگوں کے عین مطابق ہوگا جس کی وجہ سے کرپشن کا جنازہ نکل جائے گا۔
انہوں نے کہا کہ پوری قوم کرپشن سے نجات چاہتی ہے اس لیے پاناما کیس پر فیصلہ آجانے کے بعد ملک بھر میں مہم چلائیں گے جس کے لیے دیگر سیاسی جماعتوں سے اتحاد کے لیے بات ہوئی ہے۔
عوانی مسل لیگ کے سربراہ شیخ رشید نے ایک سوال کا جواب دیتے ہوئے کہا کہ آئندہ انتخابات میں تحریک انصاف کے ساتھ مل کر آئندہ انتخابات میں حسہ لیں گے اور مسلم لیگ (ن) کو شکست فاش سے دوچار کریں گے۔
لال حویلی کے حوالے سے پوچھے گئے ایک سوال کے جواب میں شیخ رشید نے کہا کہ تصادم کی باتوں سےگریز کیا جائے لیکن مجھے سمھ نہیں آتا کہ حکومت لال حویلی سےاتنی خوفزدہ ہے کہ 3عدالتوں میں کیس کردیا اگر وزیراعظم کہیں تومیں لال حویلی انہیں تحفےمیں دے دیتا ہوں۔
اسلام آباد : عوامی مسلم لیگ کے سربراہ شیخ رشید نے کہا ہے کہ سپریم کورٹ ایسا فیصلہ دے جس سے ریاستی ادارے حکومت کے نہیں بلکہ عوام کے خادم بنیں، سپریم کورٹ کا فیصلہ کرپشن کا جنازہ نکال دے گا۔
یہ بات انہوں نے سپریم کورٹ کے باہر میڈیا سے بات کرتے ہوئے کہی، شیخ رشید کا کہنا تھا کہ معزز جج حضرات نے انصاف کی فراہمی کا حلف اُٹھایا ہوا ہے اور ہمیں اپنی عدلیہ پر پورا اعتماد ہے کہ وہ اپنے حلف کی پاسداری کرتے ہوئے حق و سچ کو واضح کردے گی۔
عوامی مسلم لیگ کے سربراہ نے کہا کہ کرپشن اس ملک کے لیے ناسور بن گیا ہے پاناما کیس میں سپریم کورٹ کا تاریخی فیصلہ کرپشن کے تابوت کو ہمیشہ ہمیشہ کے لیے دفن کر دے گا، کرپشن کا جنازہ سپریم کورٹ سے نکلے گا۔
اس موقع پر انہوں نے وضاحت پیش کی کہ تحریک انصاف کے وکیل نعیم بخاری میرے لیے محترم ہیں ان کے حوالے سے جو میرا بیان چلایا جا رہا ہے وہ حقیقت پر مبنی نہیں جب عمران خان مطمئن ہیں تو ہم بھی ان کے ساتھ ہیں۔
شیخ رشید نے کہا کہ عوامی مسلم لیگ پاناما کیس میں اپنا مقدمہ خود لڑ رہی ہے ہم خود ہی وکیل ہیں اسی لیے آج سپریم کورٹ میں اپنے دلائل پیش کروں گا۔
راولپنڈی: عوامی مسلم لیگ کے سربراہ شیخ رشید نے کہا ہے کہ وزیر داخلہ چوہدری نثار کی پریس کانفرنس پر دکھ ہوا،پرویز رشید خبر رکواسکتے ہیں تو نوازشریف کے کہنے پر لگوا بھی سکتے ہیں، نثار نواز شریف کی ضد کی بھینٹ چڑھ رہے ہیں۔
وزیر داخلہ چوہدری نثار کی پریس کانفرنس پرعوامی مسلم لیگ کے سربراہ شیخ رشید کا ردعمل ایک ویڈیو پیغام کے ذریعہ سامنے آیا ہے۔
انہوں نے کہا ہے کہ چوہدری نثار اچھے اور شریف آدمی ہیں لیکن وہ نواز شریف کی ضد کی بھینٹ چڑھ رہے ہیں، اگر وزیر اطلاعات پرویز رشید قومی سلامتی سے متعلق خبر کو شائع ہونے سے رکواسکتے تھے تو وہ نواز شریف کےکہنے پر یہ خبر لگوا بھی سکتے ہیں۔
انہوں نے کہا کہ مسئلہ پرویز رشید کا نہیں بلکہ قومی سلامتی کا ہے جس کی مکمل تحقیقات ہونی چاہیے اور اصل کرداروں کو بے نقاب ہونا چاہیے تا کہ قوم کو حقائق کا علم ہو سکے۔
عوامی مسلم لیگ کے سربراہ شیخ رشید نے مزید کہا کہ قومی سلامتی سے متعلق حساس خبر کو شائع کروانے میں وزیراعظم اورچند اہم سرکاری افسران بھی شامل ہیں۔
انہوں نے کہا کہ میرے پاس صرف سگار تھا لیکن چوہدری نثار نے سڑکوں پر 158 کنٹینر رکھ کر لال حویلی کی جانب جانے والے سارے راستے بن کردیے جس سے اطراف کی آبادی محصور ہو کر رہ گئی ہے۔
پرویز رشید نے اپنے ویڈیو پیغام میں وفاقی حکومت سے سوال کیا کہ لال حویلی کے اطراف کے محصور لوگوں کو اگر کوئی ایمرجنسی پیش آئی تو وہ کہاں جائیں گے؟میرے علاقے کے لوگوں کا کوئی پرسانِ حال نہیں ہے۔
لاہور: عوامی مسلم لیگ کے سربراہ شیخ رشید نے کہا ہے کہ 28اکتوبر کو لال حویلی سے ریلی نکالیں گے، ریلی میں ایسا طوفان اٹھے گا کہ اندازہ ہوجائے گا کہ دونومبر کو ہوگا،پاکستان کی تاریخ میں جنرل راحیل شریف جیسا مقبول جنرل کوئی نہیں آیا،حکومت چاہتی ہے پاک فوج پنجاب پولیس بن جائے،اپوزیشن جماعتیں اس وقت ہماری تحریک میں شامل نہ ہوئیں تو بعد میں پچھتائیں گی،ضرورت پڑی تو قادری صاحب کو شامل کرلیں گے،طویل دھرنے کی کوئی گنجائش نہیں، دس دنوں میں نتیجہ نکل جانا چاہیے۔
دو نومبر کو مرنے یا مارنے کا فیصلہ کرلیا
اے آر وائی نیوز کے پروگرام سوال یہ ہے میں میزبان ماریہ میمن سے بات کرتے ہوئے انہوں نے کہا کہ وزیراعظم کے خلاف عدالت بھی حرکت میں آئے اور احتجاج کرتی سڑکیں بھی اور الیکشن کمیشن بھی، ہم نے دو نومبر کو مرنے یا مارنے کا فیصلہ کرلیا،28ا کتوبر کو ہم لال حویلی سے شام تین بجے وارم اپ ریلی نکالیں گے اور ہم عمران خان کو اسلام آباد تک سی آف کریں گے ، اس ریلی میں ایسا طوفان ہوگا کہ لوگوں کو اندازہ ہوجائے گا کہ دو نومبر کو کیا ہوگا۔
پرویز رشید میڈیا کو دیکھ کر چور دروازسے بھاگ رہے ہیں
انہوں نے کہا کہ وزیراعظم نے وزیر اطلاعات پرویز رشید کو قربانی کا بکرا بنا کر پیش کردیا، پرویز رشید میڈیا کو دیکھ کر تقاریب میں سے چور دروازے سے بھاگ رہے ہیں،قومی سلامتی کے خلاف سازش کرناملک سے غداری ہے ، قومی غداروں کے خلاف غداری کے مقدمے قائم کیےجائیں۔
حکومت چاہتی ہے پاک فوج پنجاب پولیس بن جائے
ایک سوال پر شیخ رشید نے کہا کہ موجودہ حکومت چاہتی ہے کہ پاک فوج پنجاب کی پولیس بن جائے لیکن اللہ کا شکر ہے کہ ایک ایسا جرنیل اس وقت موجود ہے جو پاکستان کی تاریخ کا سب سے مقبول ترین جرنیل ہے اور ایسا جرنیل آج تک نہیں آیا جس کی فوج ، شہدا اور ملک کے ساتھ کمٹمنٹ ہے ، بیس کروڑ افراد اس کی طرف دیکھ رہے ہیں، وہ جرنیل کچھ کرے یا نہ کرے وزیراعظم کو اپنی چوری کا اقرار کرنا چاہیے۔
اپوزیشن جماعتیں نہ آئیں تو ان کی سیاست ختم ہوجائے گی
انہوں نے کہا کہ ہم یہ چاہتے ہیں کہ چور اپنی چوری کا اقرار کرتے ہوئے قوم سے معافی مانگے، ساری اپوزیشن جماعتیں بعد میں یہ وقت گزرنے پر پچھتائیں گی، میں تمام اپوزیشن جماعتوں کو دعوت دیتا ہوں کہ دونومبر سے قبل ہمارے ساتھ آجائیں ورنہ آپ کی سیاست ختم ہوجائے گی۔
ضرورت پڑی تو قادری صاحب کو شامل کرلیں گے، وہ رابطے میں ہیں
ان کا کہنا تھا کہ قادری صاحب سے رابطے میں ہوں، ضرورت پڑی تو انہیں سیکنڈ رائونڈ کے لیے رکھ سکتے ہیں اور ان سے درخواست کرسکتے ہیں کہ ہمارے ساتھ شامل ہوجائیں، آج بھی ان سے ملاقات ہوئی جو بات ہوئی وہ شیئرنہیں کرسکتا کل یا پرسوں پریس کانفرنس کرکے سب کو آگاہ کریں گے۔
موت آئے یا جیل جائیں، عمران خان کے ساتھ ہیں
انہوں نے کہا کہ ہم عمران خان کے ساتھ کھڑے ہیں، نتیجہ جو بھی ہوں، موت آئے یا جیل جائیں، وزیراعظم تلاشی دیں یا استعفیٰ دیں، حکومت سمجھتی ہے کہ ہمیں ڈسٹرکٹ میں روک لے گی اور اسلام آبادنہیں آنے دے گی تو یہ ان کی بھول ہے ، یہ لڑائی عمران خان کی نہیں پوری قوم کی ہے۔
نواز شریف کے آنسو جھوٹے تھے، آنکھوں میں گلیسرین تھی
انہوں نے کہا کہ یہ وقت آگیا ہے کہ اب لوگ نواز شریف کے آنسوئوں کو بھی ڈرامہ سمجھتے ہیں، گلیسرین ڈالی ہوئی تھی نواز شریف نے آنکھوں میں۔
سراج الحق سے کہتا ہوں تحریک جوائن کرلیں
مدرسوں کو فنڈنگ کے سوال پر انہوں نے کہا کہ مدرسوں کے لوگ دھرنوں میں آئیں یا نہ آئیں یہ مجھے نہیں پتا، انہیں گرانٹ ملی یا نہیں ملی یہ بھی غیر سیاسی اور بے وزن سی بات ہے، لیکن مدرسے بھی اس ملک کا حصہ ہے اگر وہ اپنے جذبات کا اظہارکرتے ہوئے کوئی بات نہیں، ہم نے سب کو دعوت دی، سراج الحق سے بھی کہتا ہوں کہ یہی درست وقت ہے اس تحریک کو جوائن کرلیں، فضل الرحمن سے تو درخواست کر نہیں سکتا وہ تو کچھ اور چاہتے ہیں۔
ہم کیلے بیچ کر سیاست کرنے نہیں آئے
ماریہ میمن نے کہا کہ فضل الرحمن ایک منجھے ہوئے سیاست دان انہیں ایسا کیا نظر آرہا ہے جو وہ یہاں نہیں آرہے اس پر شیخ رشید نے کہا کہ ہم کوئی کیلے یا لیموں بیچ کر سیاست کرنے نہیں آئے، ہم نے بھی اصولی سیاست کی ہے،جب یہ تحریک کامیاب ہوگی تو فضل الرحمان یہاں آنے کا راستہ ڈھونڈیں گے اور وہ اتنی گنجائش ضرور رکھتے ہیں کہ تنگ دروازے سے داخل ہوجائیں، نام وہ اسلام کا لیتے ہیں اور نظر ان کی اسلام آباد پر ہوتی ہے وہ کامیاب نہیں ہوں گے۔
طویل دھرنے کی کوئی گنجائش نہیں، دس دنوں میں نتیجہ نکل جانا چاہیے
انہوں نے کہا کہ طویل دھرنے کی کوئی گنجائش نہیں، دس دن بہت ہوتے ہیں، دس یا گیارہ نومبر تک لازمی طور پر نتیجہ نکلنا چاہیے، عوام سے کٹمنٹ کرتے ہیں کہ بیک ڈور سے کوئی رابطہ نہیں ہورہا، رحمان ملک کا اس حوالے سے بیان بے بنیاد ہے۔
کراچی: عوامی مسلم لیگ کے سربراہ شیخ رشید نے کہاہے کہ 1970ء کی طرح عمران خان کو ووٹ ملے تو ہی مسائل حل ہوں گے، اب سولو فلائٹ ہی مسئلے کا حل ہے، نواز شریف کی سربراہی میں اجلاس ہونا سیاست کی توہین ہے۔
پارلیمنٹ کے باہر میڈیا سے گفت گو کرتے ہوئے شیخ رشید کا کہنا تھا کہ جس طرح 1970ء میں پیپلز پارٹی کو ووٹ ملے تھے اسی طرح اگر قوم عمران خان کو ووٹ دے تو ملک میں سیاسی استحکام آسکتا ہے۔
انہوں نے اجلاس کے انعقاد پر کہاکہ یہ نام نہاد اپوزیشن ہے اچھا ہے کہ سارا گند ایک ہی جگہ جائے گا،اب سولو فلائٹ ہی سیاست کا حل ہے۔
شیخ رشید کا کہنا تھا کہ اچکزئی ایک دم نواز شریف کومحبوب ہوگیا،دونوں کی سوچیں مطا بقت رکھتی ہیں،ہم پاکستان کے ساتھ ہیں ،کوئی اپوزیشن نہیں چاہتے، بعض چھوٹے لوگ بڑے گھروں میں چلے گئے اور ان کے سارے ہتھکنڈے اپنے دولت کو بچانے کے لیے ہیں۔
انہوں نے کہا کہ میں یہ سمجھتا ہوں کہ ساری قوم پاک فوج کے ساتھ ہے، ساری قوم کشمیر کے معاملے پر کشمیریوں کے ساتھ ہے اور کشمیر ی اس اجلاس کی طرف نہیں دیکھ رہے، اس میٹنگ کو ایک کور ہیڈ کوارٹر اور ایک میجر نے بریف کرنے کے قابل نہیں سمجھا، ساری دنیا کو پتا ہے کہ پاکستان کی خارجہ پالیسی کن کے اشاروں پر چلتی ہے، ن لیگ کا تو وزیر خارجہ ہی کوئی نہیں تو وہ خارجہ امور کیا چلائیں گے۔
عوامی مسلم لیگ کے سربراہ نے نواز شریف کو مخاطب کیا کہ وہ کہتے ہیں شیخ رشید اگلی اسمبلی میں نہیں ہوگا، میں کہتا ہوں کہ اگر وقت آیا تو حکومت کے شانہ بشانہ دشمنوں سے لڑوں گا، اپنی بندوق اور اسلحے سے لڑوں گا لیکن پاناما لیکس کے چوروں اور سانحہ ماڈل ٹاؤن کے قاتلوں کو نہیں چھوڑوں گا۔
شیخ رشید نے مزید کہا کہ ن لیگ کی سربراہی میں یہ اجلاس ہونا ہی سیاسی توہین ہے ،ایک شخص رنگے ہاتھوں پکڑا گیا ہے اوراس کی سربراہ میں اجلاس ہورہا ہے، سیاسی جماعتوں کو سب سے پہلے یہ کہنا چاہیے تھا کہ اجلا س کی صدارت اسپیکر یا صدر مملکت کرلے کیوں کہ جو شخص کرپشن میں ملوث ہے وہ کس طرح ملک کی پالیسی دے سکتا ہے۔
