لاہور : پاکستان عوامی تحریک نے سربراہ ڈاکٹرطاہرالقادری نے کہا ہے کہ حکومت کی اپنی ناانصافیوں کی وجہ سے اس کی روح پرواز ہونے کا وقت آگیا ہے۔
تفصیلات کے مطابق اے آر وائی نیوز کے پروگرام میں ڈاکٹر شاہد مسعود سے گفتگو کرتے ہوئے انہوں نے کہا کہ ’’ حکمرانوں نے ماڈل ٹاؤن کے شہداء کے ورثاء کو تین کروڑ روپے بطور دیت دینے کی پیشکش کی مگر لوگوں نے اُسے ٹھکرا تے ہوئے کہا کہ ہمیں قصاص چاہئیے۔
ڈاکٹر طاہرالقادری نے مطالبہ کیا کہ ’’سانحہ ماڈل ٹاؤن کا کیس نیشنل ایکشن پلان کے تحت فوجی عدالتوں میں چلایا جائے اور تمام ملزمان کا کڑا احتساب کیا جائے‘‘۔
17 جون کو ہونے والے دھرنے میں شریف برادران کے استعفے کا مطالبہ نہیں بلکہ قاتلوں سے قصاص مانگا جائے گا۔
ایک سوال کے جواب میں طاہرالقادری نے کہا کہ ’’ سانحہ ماڈل ٹاؤن میں براہ راست میاں برادران اور ان کے وزراء ملوث ہیں اس لیے آج تک جسٹس باقر کمیشن کی رپورٹ منظر عام پر نہیں لائی گئی‘‘۔
ڈاکٹرطاہرالقادری نےکہاکہ سابق چیف جسٹس افتخار چوہدری 2013 میں ان کی بات سنتے تو آج وزیراعظم کے استعفے کا مطالبہ نہ کرتے، انہوں نے سابق چیف جسٹس کو 17 جون کو ہونے والے دھرنے میں شرکت کی دعوت دیتے ہوئے کہا کہ حکومتی استعفے کی بات کریں۔
پانامہ لیکس پر تبصرہ کرتے ہوئے عوامی تحریک کے سربراہ نے کہا کہ ’’ پاکستان میں جمہوریت نہیں ہے بادشاہت ہے، شفافیت کا دعویٰ کرنے والے اپنا احتساب نہیں چاہتے یہی وجہ ہے کہ 3 ہفتے گزجانے کے باوجود ٹی او آرز فائنل نہیں ہوئے، معاشی دہشت گردوں کو سزائے موت دینی چاہیے۔
