کراچی کے علاقے سرجانی کنیز فاطمہ سوسائٹی میں 9 ماہ قبل خالی پلاٹ کے اندر درخت سے لٹکی لاش ٹک ٹاکر حسنین کی تھی۔
کئی ماہ گزر گئے لیکن ٹک ٹاکر حسنین کے قاتل تاحال گرفتار نہ ہو سکے۔ مقتول کے والدین نے الزام لگایا ہے کہ بیٹے کے قتل کے مقدمے کا تفتیشی افسران سے رشوت طلب کر رہا ہے، انھوں نے کہا ’’ہم غریب ہیں، دو وقت کی روٹی کے لیے بھی پیسے نہیں ہیں۔‘‘
نوجوان حسنین ٹک ٹاک بنانے کا شوقین اور اپنے بوڑھے والدین کا سہارا تھا۔ گزشتہ برس 25 مئی کو 21 سالہ حسنین کی لاش سرجانی ٹاؤن میں ایک خالی پلاٹ سے ملی۔ قتل کا مقدمہ درج ہونے کے بعد کیس کی تفتیش رک گئی، اور انصاف کے حصول کے لیے حسنین کے بوڑھے والدین اب تک دربدر بھٹک رہے ہیں۔
مقتول حسنین کے غریب والدین کہتے ہیں کہ تفتیشی افسر قاتلوں کی گرفتاری کے لیے رقم کا تقاضا کر رہا ہے، جب کہ پولیس کا کہنا ہے کہ واقعاتی شواہد کی مدد سے حسنین کے اندھے قتل کا کیس حل کرنے کی کوشش کی جا رہی ہے۔
کراچی: شہر قائد کے علاقے سرجانی میں ایک گھر میں ڈکیتی کے دوران لڑکی سے اجتماعی زیادتی کا گھناؤنا جرم کرنے والے ڈاکوؤں کی ایک سی سی ٹی وی فوٹیج سامنے آئی ہے، جس میں وہ موٹر سائیکل چھیننے کی واردات کر رہے ہیں، یہ دونوں ڈاکو گزشتہ روز پولیس اہل کاروں کی گولیاں کا نشانہ بن چکے ہیں۔
اے آر وائی نیوز کو دوران ڈکیتی اجتماعی زیادتی کرنے والے ڈاکوؤں کی بلال کالونی میں کی جانے والی واردات کی فوٹیج موصول ہوئی ہے، پولیس حکام کے مطابق سرجانی میں دوران ڈکیتی لڑکی سے اجتماعی زیادتی کرنے والے ملزمان عادی مجرم تھے، اور یہ گزشتہ روز پولیس مقابلے میں مارے گئے ہیں۔
دونوں ڈاکوؤں کی شناخت بھی ہو گئی ہے، ایک کی شناخت پیر بخش ولد نتھو خان اور دوسرے کی محمد جاوید ولد شریف محمد کے ناموں سے ہوئی۔
سی سی ٹی وی فوٹیج کے مطابق ڈاکوؤں نے 13 فروری 2022 کو تھانہ بلال کالونی کے علاقے میں ایک شہری فیصل سے اسلحے کے زور پر موٹر سائیکل چھینی تھی، اور فرار ہو گئے تھے، اس واردات کا مقدمہ تھانہ بلال کالونی میں درج ہے، سی سی ٹی وی فوٹیج میں ملزمان کو واردات کرتے دیکھا جا سکتا ہے۔
یاد رہے کہ پولیس مقابلہ تھانہ سرجانی کے علاقے بھینس کالونی سیکٹر 14 اور 15 کے قریب ہوا تھا، دو افراد کچے کے راستے سے جا رہے تھے کہ مشتبہ جان کر پولیس اہل کاروں نے انھیں روکا، جس پر انھوں نے فائرنگ شروع کر دی اور پہاڑی کی جانب فرار ہو گئے، تاہم اہل کاروں کی جوابی فائرنگ سے ایک موقع ہی پر جب کہ دوسرا بعد میں مر گیا۔
پولیس کے مطابق ڈاکوؤں سے 2 غیر قانونی پستول، مع گولیوں، چلے ہوئے خول، چھینا گیا موبائل فون اور 125 موٹر سائیکل برآمد ہوئی تھی، یہ وہی موٹر سائیکل تھی جو انھوں نے بلال کالونی میں چھینی تھی، جس کی ایف آئی ار تھانہ اقبال مارکیٹ میں درج ہے، موٹر سائیکل شہری فیصل سے اسلحہ کے زور پر چھینی گئی تھی۔
ایس ایس پی ویسٹ سہائے عزیز کے مطابق ڈکیت عادی جرائم پیشہ تھے، اور ایک ڈاکو پیر بخش سنگین نوعیت کے مقدمات میں گرفتار ہو کر جیل جا چکا ہے۔
کراچی: شہر قائد میں اسٹریٹ کرائمز کے ساتھ ساتھ ڈکیتیاں بھی عروج پر پہنچ گئی ہیں، شہر کے دو علاقوں میں بڑی ڈکیتیاں رپورٹ ہوئی ہیں۔
اے آر وائی نیوز کے مطابق کراچی کا علاقہ سرجانی جرائم میں سب سے آگے نکل گیا ہے، علاقے میں تواتر کے ساتھ پیٹرول پمپس لوٹے جانے کے بعد اب تیسر ٹاؤن خدا کی بستی سیکٹر 36 جی میں ایک گھر میں ڈکیتی کی واردات بھی ہو گئی ہے۔
اس واردات میں 14 مسلح ملزمان اسلحے کے زور پر گھر میں داخل ہوئے، ملزمان نے گھر سے 8 لاکھ کیش اور 6 تولے سونا لوٹا۔
رپورٹ کے مطابق مسلح ملزمان نے ڈکیتی کے دوران گھر کے افراد کو ایک کمرے میں بند کر دیا تھا اور پھر بیڈروم میں موجود نقد رقم اور سونے کے زیورات لوٹ کر فرار ہو گئے۔
سرجانی کے علاقے میں کی جانے والی ڈکیتی کی واردات
ڈکیتی کی دوسری واردات کراچی کے علاقے گلستان جوہر کے بلاک 14 میں ایک گھر میں کی گئی، جس میں ڈکیت سونا اور نقدی سمیت 10 لاکھ سے زائد لوٹ کر فرار ہو گئے۔
یہ واردات 5 مسلح ملزمان نے کی، واردات کے دوران ملزمان نے 5 لاکھ روپے کیش اور 5 لاکھ مالیت کا سونا لوٹا۔
گلستان جوہر میں ایک گھر میں کی جانے والی ڈکیتی
ڈکیتوں نے گھر کی تلاشی کے دوران سارا سامان بھی باہر نکال پھینکا، واردات کے بعد اہل خانہ کی جانب سے پولیس کو اطلاع دی گئی۔
یاد رہے کہ سرجانی کے پیٹرول پمپس کو گزشتہ ماہ کے دوران مسلسل نشانہ بنایا گیا تھا، ڈاکوؤں نے ایک ماہ کے دوران تین پیٹرول پمپس کو لوٹا، ایک واردات کی سی سی ٹی وی فوٹیج بھی اے آر وائی نیوز پر چلائی گئی۔
نارتھ کراچی سلیم سینٹر کے قریب پکڑا گیا ڈاکو، اسلحہ بھی برآمد
ادھر نارتھ کراچی سلیم سینٹر کے قریب ایک ڈاکو عوام کے ہتھے چڑھ گیا، جسے مشتعل عوام نے تشدد کا نشانہ بنایا، اس دوران اس کا ساتھی فرار ہونے میں کامیاب ہو گیا۔ جب کہ شہریوں نے فوری مدد کے لیے مددگار ون فائیو کو بلا لیا اور لوٹ مار کرنے والا ڈاکو پولیس کے حوالے کر دیا گیا۔
مسلح ملزم کے قبضے سے 30 بور پستول بھی برآمد ہوا، ون فائیو پولیس نے بعد ازاں گرفتار ڈاکو کو متعلقہ تھانے کے حوالے کر دیا۔
کراچی: شہر قائد کے علاقے سرجانی کی پولیس نے ایک کارروائی میں مفت راشن کے لیے فارم فروخت کرنے والے 4 جعل ساز گرفتار کر لیے۔
اے آر وائی نیوز کے مطابق سرجانی پولیس نے ان جعل سازوں کو گرفتار کر لیا ہے جو سرجانی میں غریب مکینوں سے مفت راشن کا جھانسا دے کر پیسے بٹور رہے تھے۔
ملزمان فرضی ویلفیئر ٹرسٹ کا فارم غریب افراد کو 50 روپے میں فروخت کر رہے تھے، پولیس نے ملزمان سے جعلی فارمز اور دھوکا دہی کا شکار ہونے والے 400 افراد کی فہرست بھی برآمد کر لی۔
ایس ایس پی ویسٹ کا کہنا تھا کہ ملزمان راہ نیکی ویلفیئر ٹرسٹ کے نام سے غریب گھرانوں سے پچاس روپے سے زیادہ رقم پر جعلی راشن فارم فروخت کر کے فراڈ کر رہے تھے۔
پولیس کے مطابق گرفتار ملزمان میں علی نواز ولد منشی خان، حسن علی ولد علی محمد، حمزہ نواز ولد علی نواز، عبدالجبار ولد قربان علی شامل ہیں۔ ملزمان کے خلاف ایف آئی آر درج کر دی گئی ہے، اور مزید تفتیش کی جا رہی ہے۔
خیال ر ہے کہ گزشتہ روز اے آر وائی نیوز نے خبر چلائی تھی کہ شہر میں سرگرم جعل سازوں نے سرجانی ٹاؤن میں بھوکے غریب عوام کو 50 روپے سے 200 روپے تک کے راشن ٹوکن بیچ کر تیسر ٹاؤن کے سیکڑوں مکینوں کو راشن کے نام پر چونا لگا دیا۔ علاقہ مکینوں نے جعل سازوں کی لوٹ مار کے خلاف سڑکوں پر نکل کر احتجاج بھی کیا۔
کراچی: شہر قائد کے علاقے سرجانی میں جمعے کے روز گھر سے خاتون کی لاش برآمد ہوئی تھی، پولیس نے خاتون کے قتل میں رکشا ڈرائیور کو گرفتار کر لیا۔
تفصیلات کے مطابق ایس پی اورنگی شبیر بلوچ نے کہا ہے کہ خاتون کو قتل کرنے والے حملہ آور رکشا ڈرائیور کو گرفتار کر لیا گیا ہے، ملزم نے خاتون کو تشدد کر کے قتل کیا، خود بھی زخمی ہو گیا۔
ریسکیو ذرایع کا کہنا ہے کہ جاں بحق خاتون کی شناخت یاسمین کے نام سے ہوئی، پولیس کے مطابق رکشا ڈرائیور مقتولہ کی بیٹیوں کو پک اینڈ ڈراپ پر لے جایا کرتا تھا، ملزم نے خاتون کو قتل کیا، بیٹیوں نےشور کیا تو ملزم نے خود کو بھی چھریاں مار لیں۔
پولیس کا کہنا ہے کہ ملزم رکشا ڈرائیور کی حالت تشویش ناک ہے، اسپتال منتقل کیا گیا ہے۔
ادھر مقتولہ کی بیٹی عائشہ نے میڈیا سے گفتگو کرتے ہوئے کہا کہ رکشا ڈرائیور نے میری ماں کو قتل کیا، 4 ماہ سے یہ ہمیں پک اینڈ ڈراپ کر رہا تھا، رکشے والے کو آ ج آنے سے منع کیا تھا پھر بھی شام میں گھر پر موجود تھا، کل رکشا ڈرائیور سے کہہ دیا تھا کہ آئے تو پولیس میں شکایت کروں گی۔
عائشہ نے بتایا کہ وہ آفس سے گھر پہنچیں تو رکشا ڈرائیور میری ماں کو قتل کر چکا تھا، ماں کی ناک سے خون بہہ رہا تھا جس پر شور کیا، شور کرنے پر رکشا ڈرائیور نے خود کو چھریوں کے وار کر کے زخمی کر دیا۔
مقتول خاتون کی بیٹی کا کہنا تھا کہ رکشا ڈرائیور نے گیس سلنڈر سے بھی خود کو آگ لگانے کی کوشش کی۔
