لاہور : ،وزیراعلیٰ پنجاب عثمان بزدار نے کہا ہے کہ پاک افغان سرحد پر پاک فوج کے بہادر سپوتوں نے قیمتی جانیں وطن پر قربان کی ہیں، شہدا کی لازوال قربانیوں کو سلام پیش کرتے ہیں۔
یہ بات انہوں نے اک افغان سرحد پر شرپسندوں کی جانب سے کی جانے والی فائرنگ کی مذمت کرتے ہوئے اپنے بیان میں کہی۔ انہوں نے کہا کہ جام شہادت نوش کرنے والے جوان قوم کے ہیرو ہیں۔
شہداء کی عظیم قربانیوں کو فراموش نہیں کیا جاسکتا۔ وزیراعلیٰ نے شہید ہونے والے پاک فوج کے جوانوں کی عظیم قربانی کو خراج عقیدت پیش کرتے ہوئے مزید کہا کہ پاک فوج کے بہادرسپوتوں نے قیمتی جانیں وطن پر قربان کی ہیں۔
شہدا کی لازوال قربانیوں کو سلام پیش کرتے ہیں، تمام تر ہمدردیاں شہداء کے لواحقین کے ساتھ ہیں، وزیر اعلیٰ پنجاب عثمان بزدار نے شہدا کے اہل خانہ سے دلی ہمدردی و اظہار تعزیت کیا ہے، انہوں نے فائرنگ سے زخمی جوان کی جلد صحت یابی کی دعا کی۔
واضح رہے کہ دیر میں ہونے والے واقعے میں سرحد پر باڑھ لگانے والوں پر افغانستان کی جانب سے فائرنگ کی گئی، جس کے نتیجے میں چار سیکیورٹی اہلکار شہید اور ایک زخمی ہوا ہے۔
پہلا واقعہ شمالی وزیرستان میں پیش آیا جہاں پیٹرولنگ پارٹی پر فائرنگ ہوئی، فائرنگ سے 23 سالہ سپاہی اختر حسین شہید ہوگیا۔ سپاہی اختر حسین کا تعلق بلتستان سے تھا۔ واقعے میں جوابی فائرنگ سے 2 حملہ آور ہلاک ہوئے۔
دوسرا واقعہ دیر میں ہوا جہاں سرحد پر باڑھ لگانے والوں پر افغانستان کی جانب سے فائرنگ کی گئی، افغانستان کی جانب سے فائرنگ سے 3 جوان شہید ہوئے۔
