کوئٹہ : بلوچستان میں خاتون اور مرد کے قتل کا حکم دینے والا سردار شیر باز ساتکزئی کو 10 روزہ جسمانی ریمانڈ پر پولیس کے حوالے کردیا گیا۔
تفصیلات کے مطابق کوئٹہ کی انسداد دہشت گردی کی عدالت میں ڈیگاری میں خاتون اور مرد کے قتل کیس کی سماعت ہوئی۔
انسداد دہشت گردی عدالت کے جج محمد مبین نے کیس کی سماعت کی ، واقعےمیں نامزد ملزم سردار شیر باز ساتکزئی کو عدالت میں پیش کیا گیا۔
ایس سی آئی ڈبلیو کی جانب سے ملزم کے مزید جسمانی ریمانڈ کی استدعا کی گئی، جس پر عدالت نے ملزم کو 10 روزہ جسمانی ریمانڈ پر ایس سی آئی ڈبلیو کے حوالے کردیا۔
یاد رہے بلوچستان کے دارلحکومت کے نواحی علاقے ڈگاری میں انیس جولائی کو بانو نامی خاتون اور احسان اللہ نامی شخص کے قتل کرنے کا واقعہ سامنے آیا تھا، فائرنگ کے دردناک مناظر کی ویڈیو سوشل میڈیا پروائرل ہوئی۔
مزید پڑھیں : بلوچستان میں غیرت کے نام پر قتل کی گئی بانو کی والدہ کا بیان منظر عام پر
بتایا جاتا ہے میاں بیوی ڈیڑھ سال سے روپوش تھے، دونوں کو دعوت کے بہانے بلایا گیا، جرگے میں فیصلہ سنایا گیا اور پھر کھلے میدان میں لے جا کر گولیاں چلا دی گئیں۔
جس کے بعد وزیراعلیٰ بلوچستان سردار سرفراز بگٹی کی جانب سے واقعے کا نوٹس لینے پرپولیس حرکت میں آئی تھی۔
واقعے کا مقدمہ ہنہ اوڑک تھانے میں ایچ ایچ او کی مدعیت میں درج کیا گیا تھا جبکہ پولیس نے مرکزی ملزم بشیر احمد اور ستکزئی قبیلے کے سربراہ سردار شیر باز ستکزئی، ان کے 4 بھائی اور 2 محافظوں سمیت دیگر ملزمان کو گرفتار کرلیا تھا۔
مدعی مقدمہ کے مطابق بانو ستکزئی اور احسان اللہ سمالانی کو کاروکاری کے الزام میں قتل کیا گیا، واقعے میں مبینہ طور پر شاہ وزیر، جلال، ٹکری منیر، بختیار، ملک امیر، عجب خان، جان محمد، بشیر احمد اور دیگر 15 نامعلوم افراد شامل تھے۔