ARYNews.tv | Urdu – Har Lamha Bakhabar

Tag: سردار مسعود خان

  • امریکا میں پاکستانی سفیر سردار مسعود خان کی واشنگٹن میں اہم ملاقاتیں

    امریکا میں پاکستانی سفیر سردار مسعود خان کی واشنگٹن میں اہم ملاقاتیں

    واشنگٹن : امریکا میں پاکستانی سفیر سردار مسعود خان نے واشنگٹن میں اہم ملاقاتیں کیں ، جس میں پاک امریکا تعلقات مزیدمستحکم کرنے کے عزم کا اظہار کیا گیا۔

    تفصیلات کے مطابق امریکا میں پاکستانی سفیر سردارمسعود خان نے واشنگٹن میں امریکی سینیٹرلنزےگراہم سے ملاقات کی، ملاقات میں پاک امریکا تعلقات کو مزید مستحکم کرنے کے عزم کا اعادہ کیا گیا۔

    سردارمسعودخان نے سماجی رابطے کی ویب سائٹ ٹوئٹر پر اپنے پیغام میں کہا کہ پاک امریکا تعلقات کو مزید مستحکم کرنے اور سیلاب زدگان کی مدد کے لیے سینیٹرلنزے گراہم کےکردار کوکبھی نہیں بھولیں گے۔

    پاکستانی سفیر نے ورلڈ بینک کے نائب صدر برائے جنوبی ایشیا مارٹن ریزرسے بھی ملاقات کی ، اس حوالے سے سردارمسعود خان نے ٹویٹ میں بتایا کہ مفید ملاقات ہوئی، ورلڈبینک تعلیم، صحت،سماجی شعبے، صاف اور سرسبز پاکستان مہم مدد کررہا ہے۔

  • امریکی صدر بائیڈن سے پاکستانی سفیر کی وائٹ ہاؤس میں ملاقات

    امریکی صدر بائیڈن سے پاکستانی سفیر کی وائٹ ہاؤس میں ملاقات

    واشنگٹن: امریکی صدر جو بائیڈن سے پاکستانی سفیر سردار مسعود خان نے وائٹ ہاؤس میں ملاقات کی۔

    تفصیلات کے مطابق پاکستانی سفیر سردار مسعود نے امریکی صدر سے ملاقات کی، ملاقات میں بائیڈن نے پاک امریکا تعلقات کے مضبوط بنیادوں پر فروغ کے عزم کا اظہار کیا۔

    پاکستانی سفیر مسعود خان نے کہا کہ ہم امریکا کے ساتھ ہر شعبے میں کام کرنے کے خواہاں ہیں۔

    اس ملاقات کی سرکاری تصویر بھی کھنچوائی گئی، مسعود خان 25 مارچ کو واشنگٹن پہنچے تھے اور اسی روز ان سے اسناد سفارت وصول کی گئی تھیں، امریکی صدر سے یہ ملاقات اس حوالے سے اہم ہے کہ اس سے پاکستانی سفیر کی پوزیشن کی باضابطہ توثیق ہو گئی۔

    ریپبلکن قانون ساز اسکاٹ پیری نے امریکی صدر جو بائیڈن کو ایک خط لکھا تھا جس میں ان پر سردار مسعود خان کی نامزدگی کو مسترد کرنے پر زور دیا گیا تھا، بھارتی میڈیا نے اس خط کو بہت اچھالا۔

    خیال رہے کہ امریکی صدر بائیڈن سے آج 46 دیگر ممالک کے سفیروں نے بھی ملاقات کی، کرونا وبا کے باعث واشنگٹن میں کئی سفیر ایک سال سے صدر بائیڈن سے ملاقات کے منتظر تھے۔

  • کشمیر تاریخ کے سیاہ ترین دور سے گزر رہا ہے: سردار مسعود خان

    کشمیر تاریخ کے سیاہ ترین دور سے گزر رہا ہے: سردار مسعود خان

    اسلام آباد: آزاد کشمیر کے صدر سردار مسعود خان کا کہنا ہے کہ بھارت نے مقبوضہ کشمیر کا نقشہ تبدیل کردیا اور کشمیر کو اپنے ساتھ شامل کرلیا، کشمیر تاریخ کے سیاہ ترین دور سے گزر رہا ہے۔

    تفصیلات کے مطابق صدر آزاد کشمیر سردار مسعود خان نے تقریب سے خطاب کرتے ہوئے کہا کہ گزشتہ سال اگست میں بھارت نے کشمیر پر ایک اور حملہ کیا، بھارت نے کشمیر کو اپنے ساتھ شامل کرلیا۔

    مسعود خان کا کہنا تھا کہ بھارت نے کشمیر کا نقشہ تبدیل کردیا، پاکستان نے چین کی مدد سے معاملے کو اٹھایا، کشمیریوں پر ہونے والے مظالم پر آواز بلند کی۔

    انہوں نے کہا کہ ایک سال گزرنے کے باوجود اقوام متحدہ سیکیورٹی کونسل نے کچھ نہیں کیا، سیکیورٹی کونسل اپنی ذمہ داریاں پوری نہیں کر رہا۔

    مسعود خان کا کہنا تھا کہ اقوام متحدہ کا اجلاس اس بار پھر ہو رہا ہے۔ پاکستان، ترکی اور دیگر ممالک کشمیر کے معاملے کو اٹھائیں گے۔

    انہوں نے مزید کہا کہ اقوام متحدہ جنرل اسمبلی کے ایجنڈے میں کشمیر نہیں، ہمیں احمقوں کی جنت میں نہیں رہنا چاہیئے۔ وزیر اعظم گزشتہ سال کی طرح کشمیر پر کھل کر بولیں گے۔ کشمیر تاریخ کے سیاہ ترین دور سے گزر رہا ہے۔

  • ریاست پاکستان جموں وکشمیرکے بغیر نامکمل ہے، صدر آزاد کشمیر

    ریاست پاکستان جموں وکشمیرکے بغیر نامکمل ہے، صدر آزاد کشمیر

    مظفرآباد : صدر آزاد کشمیر سردار مسعود خان کا کہنا ہے کہ ریاست پاکستان جموں وکشمیرکے بغیر نامکمل ہے، پاکستان کا شاندار مستقبل ہے، مایوسی پھیلانے والے کو شکست ہوگی۔

    تفصیلات کے مطابق صدر آزاد کشمیر سردار مسعود خان نے یوم آزادی کی مرکزی تقریب سے خطاب کرتے ہوئے کہا پاکستان بننا کسی معجزے سے کم نہ تھا پاکستان کے خلاف شروع سے سازشیں ہو رہی تھی جبکہ پاکستان کواغیار کی طرف سے بھی مشکلات کا سامنا رہا اور اپنی صفوں میں عناصرسےبھی مشکلات تھیں۔

    صدر آزاد کشمیر کا کہنا تھا کہ پاکستان کیخلاف 6 جنگیں لڑی گئی، اس کے باوجود مزید استحکام آیا، پاکستان کا شاندار مستقبل ہے، مایوسی پھیلانے والے کو شکست ہوگی، پاکستان کو روشن مستقبل کیلئے نئے عزم اورولولے کی ضرورت ہے۔

    سردار مسعود خان کا کہنا تھا کہ مقبوضہ کشمیرسمیت دنیابھرمیں کشمیری جشن آزادی منارہےہیں، ریاست پاکستان جموں وکشمیرکے بغیر نامکمل ہے، نئے قومی نقشے نے1947والی ریاست کی عکاسی کی ہے، نئے قومی نقشے میں ایک حصہ ایسا ہے جو ہمارے جسم کا حصہ ہے۔

    انھوں نے کہا کہ ہمارے جسم پر دہشت گردی ہورہی ہے، ہندوستان ظلم ڈھارہا ہے، اب ہمیں دشمن کے مقابلے میں جارحانہ پالیسی اختیار کرنا ہوگی، غفلت برتی تومقبوضہ کشمیر کیلئے جدوجہدکوناقابل تلافی نقصان ہوگا۔

    صدر آزاد کشمیر کا کہنا تھا کہ اب پورے ولولے کیساتھ آزادی کی جدوجہد میں شامل ہونا پڑے گا، ہندوستان نے دنیا کو گمراہ کرنےکی کوشش کی، پاکستان نے بروقت یہ اقدام اٹھا کر کشمیر درست سمت دی، ہندوستان میں اقلیتیں محفوظ نہیں۔

    سردار مسعود خان نے مزید کہا کہ پاکستان مزید طاقتور ہو گا اور پاکستان کو کمزور کرنے والے خود بخود ختم ہو جائیں گے، مقبوضہ کشمیر میں آزادی کی شمع جلد روشن ہوگی۔

  • مودی اور امیت شاہ ہندو راشٹریا کے تحت کشمیر کا حل چاہتے ہیں: سردار مسعود خان

    مودی اور امیت شاہ ہندو راشٹریا کے تحت کشمیر کا حل چاہتے ہیں: سردار مسعود خان

    اسلام آباد: آزاد کشمیر کے صدر سردار مسعود خان کا کہنا ہے کہ مقبوضہ کشمیر میں ایک سال سے ٹارچر اور قتل عام معمول بن گیا ہے، مودی اور امیت شاہ اب ہندو راشٹریا کے تحت کشمیر کا حل چاہتے ہیں۔

    تفصیلات کے مطابق آزاد کشمیر کے صدر سردار مسعود خان نے تقریب سے خطاب کرتے ہوئے کہا کہ اقلیت میں ہونے سے مراد یہ نہیں کہ شہری دوسروں سے کم تر ہیں، پاکستان کے آئین میں اقلیتوں کے حقوق کو مکمل تحفظ حاصل ہے۔

    سردار مسعود خان کا کہنا تھا کہ بھارت میں اقلیتوں سے ناروا سلوک اور کشمیر میں بربریت ہندو توا نظریہ ہے، بھارت میں مسلمانوں کا استحصال ہو رہا ہے۔ مقبوضہ کشمیر میں ایک سال سے ٹارچر اور قتل عام معمول بن گیا۔

    انہوں نے کہا کہ ہٹلر دور میں جو ہوا وہ آج کشمیر میں ہو رہا ہے، مودی اور امیت شاہ اب ہندو راشٹریا کے تحت کشمیر کا حل چاہتے ہیں، کشمیر میں ہندوؤں کو بسانے کا منصوبہ بنایا جا رہا ہے۔

    سردار مسعود خان کا کہنا تھا کہ دنیا مقبوضہ کشمیر میں بھارتی آبادی کے تناسب کی تبدیلی اور نسل کشی روکے، عالمی انسانی حقوق کی تنظیمیں اور اقوام متحدہ کردار ادا کرے۔

  • بھارت کشمیر کے ٹکڑے ٹکڑے کرنا چاہتا ہے، صدر آزاد کشمیر

    بھارت کشمیر کے ٹکڑے ٹکڑے کرنا چاہتا ہے، صدر آزاد کشمیر

    کوئٹہ: آزاد جموں وکشمیر کے صدر سردار مسعود خان نے کہا کہ مقبوضہ کشمیر میں صورت حال بہت خطرناک ہے، بھارت کشمیر کے ٹکڑے ٹکڑے کرنا چاہتا ہے۔

    تفصیلات کے مطابق کوئٹہ میں آزاد جموں وکشمیر کے صدر سردار مسعود خان نے پریس کانفرنس کے دوران کہا کہ بلوچستان کے عوام نے بھر پور یکجہتی کا اظہار کیا، عوام اور حکومت کا شکریہ ادا کرنے آیا ہوں۔

    سردار مسعود خان نے کہا کہ مقبوضہ کشمیر میں صورت حال بہت خطرناک ہے، بھارت کشمیر کے ٹکڑے ٹکڑے کرنا چاہتا ہے۔ انہوں نے مزید کہا کہ بھارت پورے علاقوں کو جنگ کی بھٹی میں جھونکنے کی کوشش کر رہا ہے۔

    سال 2019 میں بھارتی فورسز نے 210 کشمیریوں کو شہید کیا

    مقبوضہ کشمیرمیں 5 اگست سے اب تک لاک ڈاؤن اور پابندیاں برقرارہیں اور لاک ڈاؤن اور پابندیوں کے نفاذ کو 150 روز ہوگئے ہیں، انٹرنیٹ اورموبائل سروس بدستور بند ہیں۔ ناکہ بندی، محاصرے اور کاروبارکی بندش نے کشمیریوں کی معیشت تباہ کردی ہے اور گھروں میں محصورنئی نسل تعلیم سے محروم ہے۔

    کشمیرمیڈیا سروس کی رپورٹ کے مطابق 2019 میں بھارتی فورسزنے خواتین سمیت 210 کشمیریوں کو شہید کیا، 2 ہزار سے زائد کشمیری بھارتی فوج کے تشدد سے زخمی ہوئے جبکہ 64 خواتین کی عصمت دری کی گئی۔

  • کشمیر جل رہا ہے مگر سلامتی کونسل خاموش ہے: صدر آزاد کشمیر

    کشمیر جل رہا ہے مگر سلامتی کونسل خاموش ہے: صدر آزاد کشمیر

    مظفرآباد: آزاد کشمیر کے صدر مسعود خان نے مطالبہ کیا ہے کہ اقوام متحدہ انسانی حقوق کمیشن رپورٹ پر عمل درآمد کرائے، جبکہ برطانوی حکومت کشمیر پر سلامتی کونسل کے اجلاس کے لیے کردار ادا کرے۔

    تفصیلات کے مطابق صدر آزادکشمیر مسعود خان سے برطانوی لارڈ ڈنکن کی قیادت میں وفد نے ملاقات کی، اس موقع پر کشمیر کی موجودہ صورت حال سمیت باہمی دلچسپی کے امور پر تبادلہ خیال کیا گیا، دریں اثنا میڈیا سے گفتگو کرتے ہوئے صدرآزاد کشمیر کا کہنا تھا کہ کشمیر جل رہا ہے مگر سلامتی کونسل خاموش ہے۔

    انہوں نے کہا کہ کشمیر کے لیے فیکٹ فائنڈنگ کمیٹی بناکر کشمیر بھیجی جائے، مطالبہ ہے سلامتی کونسل کشمیر کے لیے کردار اداکرے، جبکہ برطانوی سیاسی جماعتیں بھی انتخابی مہم میں مسئلہ کشمیر اجاگر کریں۔

    مسعود خان کا کہنا تھا کہ بھارت نے جموں کشمیر اور کارگل لداخ کو یونین ٹیرٹیریز کاحصہ بنا دیا، بھارتی اقدام عالمی قوانین کی خلاف ورزی ہے، مقبوضہ کشمیر کی صورت حال انتہائی تشویشناک ہے، عالمی برادری کو معاملے کی سنگینی کا اندازہ ہونا چاہیے۔

    مقبوضہ کشمیر میں کرفیو، لاک ڈاؤن کا 106 واں روز، عالمی طاقتوں نے چپ سادھ لی

    اس موقع پر لارڈ ڈنکن کا کہنا تھا کہ بھارت کا مقبوضہ کشمیر میں رویہ ظالمانہ وغیر ذمہ دارانہ ہے، عالمی اداروں کو مسئلہ کشمیر کے پرامن حل کے لیے کردار ادا کرنا چاہیے۔

  • آرمی چیف نے کہا خون کے آخری قطرے تک کشمیریوں کے لیے لڑیں گے، مسعود خان

    آرمی چیف نے کہا خون کے آخری قطرے تک کشمیریوں کے لیے لڑیں گے، مسعود خان

    مظفرآباد: صدر آزاد جموں و کشمیرسردار مسعود خان کا کہنا ہے کہ وزیراعظم عمران خان نے کہا آزاد کشمیرپرحملہ پاکستان پرحملہ تصور کیا جائے گا۔

    تفصیلات کے مطابق صدر آزاد کشمیر سردار مسعود خان نے کہا کہ آج شہدائے پاکستان اور لواحقین کوخراج عقیدت وتحسین پیش کرنے کا دن ہے۔

    انہوں نے کہا کہ کشمیریوں کے حق خودارادیت کے لیے پاکستان نے 6 جنگیں لڑیں، پاکستان کشمیر کے لیے سیاسی وسفارتی کوششیں جاری رکھے ہوئے ہے۔

    صدر آزاد کشمیر نے کہا کہ 1965میں بھارت نے پاکستان کوللکارنے کی سنگین غلطی کی تھی، پاکستانی قوم مثال اتحاد کا مظاہرہ کرتے ہوئے سیسہ پلائی دیوار ثابت ہوئی۔

    سردار مسعود خان نے کہا کہ بھارت نے 5 اگست کو پھرمقبوضہ کشمیراورخطے پرحملہ کیا، پاکستان کی جانب سے بھارت کو بھرپور اور منہ توڑجواب دیا گیا۔

    انہوں نے کہا کہ وزیراعظم عمران خان نے کہا آزاد کشمیر پرحملہ پاکستان پرحملہ تصورکیا جائے گا، آرمی چیف نے کہا خون کے آخری قطرے تک کشمیریوں کے لیے لڑیں گے۔

    صدر آزاد کشمیر نے کہا کہ بھارت تشدد اور ظلم سے کشمیریوں کی آواز دبانا چاہتا ہے، ہمیں یقین ہے پاکستان ہرصورت میں کشمیریوں کا ساتھ دے گا۔

    ملک بھرمیں یوم دفاع کشمیریوں کے ساتھ اظہار یکجہتی کرتے ہوئے منایا جا رہا ہے

    واضح رہے کہ ملک بھر میں یوم دفاع یوم یکجہتی کشمیر کے طور پر منایا جا رہا ہے جس کا مقصد وطن عزیز کے لیے جانوں کا نذرانہ پیش کرنے والے شہدا کے ساتھ ساتھ بھارت مقبوضہ کشمیر میں مظلوم کشمیریوں کے ساتھ پاکستانی عوام کی حمایت کا اعادہ کرنا ہے۔

  • ظالم مودی نسل کشی کرکے کشمیریوں کو ختم کرنا چاہ رہا ہے، سردار مسعود خان

    ظالم مودی نسل کشی کرکے کشمیریوں کو ختم کرنا چاہ رہا ہے، سردار مسعود خان

    اسلام آباد : آزاد کشمیر کے صدر سردار مسعود خان نے کہا ہے کہ ظالم مودی نسل کشی کرکے کشمیریوں کو ختم کرنا چاہ رہا ہے، نسل کشی روکنا عالمی برادری کے لئے بڑا چیلنج ہے۔

    ان خیالات کا اظہار انہوں نے اسلام آباد میں ایک تقریب سے خطاب کرتے ہوئے کیا، سردار مسعود خان نے کہا ہے کہ اس وقت مقبوضہ وادی میں قیامت صغریٰ نہیں قیامت کبریٰ بپا ہے۔

    نریندر مودی مقبوضہ کشمیر کے عوام سے ان کی شناخت چھیننے کے درپے ہے، مقبوضہ کشمیر کے حوالے سے ہونے والی تقریب میں اظہار خیال کرتے ہوئے سردار مسعود احمد خان نے کہا کہ یہ مت کہیے کہ مسئلہ کشمیر فیصلہ کن مرحلے میں داخل ہو چکا بلکہ کشمیر پر ایک نئی قیامت ٹوٹی ہے۔

    مودی کے عزائم بہت خطرناک ہیں،وہ مقبوضہ کشمیر کے عوام سے شناخت چھیننے کے درپے ہے، عالمی برادری کے سامنے دوچیلنجز ہیں، پہلا یہ کہ کشمیر میں نسل کشی کو کیسے روکا جائے ؟ظالم محاصرہ کرکے کشمیریوں کو ماررہا ہے دوسرا چیلنج یہ ہے کہ مقبوضہ کشمیر کو نو آبادی بننے سے کیسے بچایا جائے؟

    انہوں نے مزید کہا کہ نو لاکھ فوجیوں نے مقبوضہ کشمیر پر حملہ کیا ہے ،مسلح افواج نے غیر مسلح لوگوں پر حملہ کیا ہے، فیصلہ ہونا تو ابھی باقی ہے،کشمیریوں کی جدوجہد کے ایک نئے باب کا اظہار ہوا۔

    مقبوضہ وادی میں کربلا بپاہے،لوگ بھوکے اور پیاسے اپنے گھروں میں قید ہیں،ان کے پاس ادویات نہیں ہیں،رسد کا کوئی سامان نہیں ہے۔

    ظالم قابض ہندوستانی فوجیوں نے 10ہزار کشمیریوں کو قید کردیا ہے، ان میں عورتیں اور بچے بھی شامل ہیں، یہ قیامت صغریٰ نہیں قیامت کبریٰ ہے۔

  • پاک فوج ہر قسم کی بھارتی جارحیت کا جواب دینے کے لیے تیار ہے: صدر آزاد کشمیر

    پاک فوج ہر قسم کی بھارتی جارحیت کا جواب دینے کے لیے تیار ہے: صدر آزاد کشمیر

    اسلام آباد: صدر آزاد کشمیر مسعود خان کا کہنا ہے کہ بھارت نے دھمکی دی ہے کہ آزاد کشمیر پر حملہ کریں گے۔ پاک فوج ہر قسم کی بھارتی جارحیت کا جواب دینے کے لیے تیار ہے۔

    تفصیلات کے مطابق صدر آزاد کشمیر مسعود خان نے نیوز کانفرنس کرتے ہوئے کہا کہ بھارت کی جانب سے جنگ کا خطرہ ہے، بھارت نے دھمکی دی ہے کہ آزاد کشمیر پر حملہ کریں گے۔ افواج پاکستان جنگ کے لیے تیار ہے۔

    صدر آزاد کشمیر کا کہنا تھا کہ حکومت پاکستان مشاورت کر رہی ہے، قتل عام پر عالمی عدالت سے رجوع کیا جا سکتا ہے۔ پاک فوج ہر قسم کی بھارتی جارحیت کا جواب دینے کے لیے تیار ہے۔

    انہوں نے کہا کہ مقبوضہ وادی میں قتل عام پر عالمی عدالت سے رجوع کیا جا سکتا ہے، برطانوی وفد کی موجودگی میں برطانیہ سے مطالبہ ہے، برطانوی وزیر اعظم کی جانب سے مسئلہ کشمیر پر بیان آنا چاہیئے۔

    سردار مسعود خان کا کہنا تھا کہ برطانوی وزیر اعظم اپنی خاموشی کو الفاظوں میں بدلیں، برطانیہ کو چاہیئے اس معاملے پر آواز اٹھائے ہمارا ساتھ دے۔

    خیال رہے کہ گزشتہ روز وزیر اعظم عمران خان نے مسئلہ کشمیر پر قوم سے خطاب کرتے ہوئے کہا تھا کہ ہم مذاکرات کی بات کرتے ہیں، بھارت کوئی اور بات شروع کر دیتا ہے، اگر آج ہمارے ساتھ کوئی نہیں کھڑا، تو مایوس ہونے کی ضرورت نہیں۔

    وزیر اعظم نے کہا تھا کہ پاکستان کشمیر کے لیے ہر حد اور ہر سطح تک جائے گا۔ اقوام متحدہ محسوس کرے، مسئلہ ایٹمی جنگ کی طرف چلاگیا تو جیت کسی کی نہیں ہوگی، ایٹمی جنگ کے اثرات پوری دنیا پر پڑیں گے۔

    انہوں نے مزید کہا تھا کہ حکومت میں آنے کے بعد پہلی کوشش ملک میں امن کا قیام تھا، پاکستان اور بھارت کے مسائل مشترکہ ہیں، ہماری کوشش تھی سب کے ساتھ اچھے اور دوستانہ تعلقات ہوں۔