سردیاں کیا شروع ہوئیں ساتھ ہی ناجائز منافع خوروں کی بھی چاندی ہوگئی، مرغی کی قیمتوں میں اضافے کے ساتھ اس کے انڈے بھی عوام کی پہنچ سے دور کردیے گئے۔
انڈوں کی قیمتوں میں ہونے والے اضافے سے متعلق خریداروں کا کہنا ہے کہ آئے روز دام بڑھتے جا رہے ہیں لیکن قیمتوں کو چیک کرنے والا کوئی نہیں ہے۔
اس حوالے سے اے آر وائی نیوز کی نمائندہ روحہ فاطمہ کی رپورٹ کے مطابق شہر قائد میں انڈوں کے بیوپاریوں نے سرد ہوا چلتے ہی فی درجن ریٹ میں من مانا اضافہ کردیا ہے۔
اس وقت کراچی میں فی درجن انڈے کی قیمت 370روپے سے زائد وصول کی جارہی ہے جبکہ دیسی انڈے بھی 600روپے درجن فروخت کیے جارہے ہیں۔ دوسری جانب انڈے کا سرکاری ریٹ 290 روپے فی درجن ہے۔
اے آر وائی نیوز سے گفتگو کرتے ہوئے مہنگائی کے ستائے شہریوں کا کہنا ہے کہ حکومت کے مقرر کردہ نرخوں پر کوئی چیز بازار میں دستیاب نہیں ہے کس کس چیز کی شکایت کریں؟ کمشنر کراچی کی جانب سے جاری احکامات پر بھی عمل درآمد نہیں ہورہا۔
رپورٹ کے مطابق شہر میں مرغی کے انڈوں کی بڑھتی ہوئی قیمتوں پر نظر رکھنے اور ان پر قابو پانے کیلئے کوئی مؤثر نظام موجود نہیں ہے۔
