اسلام آباد: قومی کرکٹ ٹیم کے کپتان سرفراز احمد، عمرگل، محمد حفیظ اور وقار یونس بنی گالا پہنچے اور عمران خان کو الیکشن میں کامیابی پر مبارکباد پیش کی۔

تفصیلات کے مطابق پاکستان تحریک انصاف کے چیئرمین عمران خان کو الیکشن میں کامیابی پر مبارکباد دینے کے لیے سابق و موجودہ کھلاڑیوں کی جانب سے بنی گالہ آمد کا سلسلہ جاری ہے۔

قومی کرکٹ ٹیم کے کپتان سرفراز احمد، عمرگل، محمد حفیظ اور سابق کپتان وقار یونس بھی عمران خان کو مبارکباد دینے کے لیے بنی گالہ پہنچے اور الیکشن میں کامیابی پر مبارکباد پیش کی۔

سابق فاسٹ بولر وقار یونس بنی گالا پہنچے اور میڈیا سے گفتگو کرتے ہوئے انہوں نے یکہا کہ عمران خان کو الیکشن جیتنے پر مبارکباد دینے کے لیے آیا ہوں۔

سابق کپتان وقار یونس نے کہا ہے کہ عمران خان کے ساتھ بڑا پرانا تعلق اور پیار ہے، عمران خان کی کامیابی کا سن کر مبارکباد دینے آسٹریلیا سے آیا ہوں، عمران خان کے آنے سے کرکٹ نہیں تمام کھیلوں کے حالات بہتر ہوں گے۔

وقار یونس نے کہا کہ عمران خان پر جس طرح کا کیچڑ اچھالا گیا وہ سب کے سامنے ہے، انہوں نے مشکل حالات کا اچھے سے مقابلہ کیا ہے، عمران خان اپوزیشن میں بیٹھ چکے ہیں انہیں حالات کا اندازہ ہے، اوورسیز پاکستانی بھی ملک کے لیے کچھ کر گزرنے کو تیار ہیں، پاکستانیوں سے درخواست ہے عمران خان کو سپورٹ کریں۔

Pakistani cricketers arrive at Bani Gala to congratulate Imran Khan on winning the elections pic.twitter.com/bPyshGJVxE

— ARY Sports (@ARYSports_Web) July 31, 2018

عمر گل نے کہا کہ عمران خان کی جیت سے بہت خوش ہیں، عمران خان بچپن سے ہی ہمارے ہیرو ہیں، ان کو دیکھ کر ہی کرکٹ کھیلنی شروع کی، خوشی ہے ایک کھلاڑی ملک کا وزیر اعظم بنے گا۔

واضح رہے کہ دو روز قبل چیف سلیکٹر انضمام الحق اور مشتاق احمد نے بنی گالا میں عمران خان سے ملاقات کی اور الیکشن میں کامیابی پر مبارکباد پیش کی تھی۔

چیف سلیکٹر کا کہنا تھا کہ عمران خان نے جو وعدے کیے ہیں وہ اس کو پورا کریں گے، ہماری دعائیں ان کے ساتھ ہیں، انشاء اللہ وہ قوم کے لیے بہترین کام کریں گے۔

سابق لیگ اسپنر مشتاق احمد نے کہا کہ عمران خان نے 22 سال جدوجہد کی، اللہ نے صلہ دیا، دعا ہے اللہ عمران خان کو ان کے مقصد میں کامیاب کرے۔

خبر کے بارے میں اپنی رائے کا اظہار کمنٹس میں کریں۔ مذکورہ معلومات کو زیادہ سے زیادہ لوگوں تک پہنچانے کے لیے سوشل میڈیا پر شیئر کریں۔

ہرارے: قومی کرکٹ ٹیم کے کپتان سرفراز احمد نے کہا ہے کہ جب ٹیم کی قیادت سنبھالی تو رینکنگ ساتویں نمبر پر تھی ، نئے اور پرانے کھلاڑیوں نے گزشتہ دو سالوں میں اچھی پرفارمنس پیش کی اسی وجہ سے آج ہم سرفہرست ہیں۔

زمبابوے کے شہر ہرارے میں میڈیا سے گفتگو کرتے ہوئے سرفراز احمد کا کہنا تھا کہ ٹی 20ٹیم پچھلے2 سال سےاچھی پرفارمنس کامظاہرہ کررہی ہے کیونکہ ہمارے اسکواڈ میں نوجوان اور سنیئر کھلاڑیوں کا بہترین کمبی نیشن موجود ہے۔

اُن کا کہنا تھا کہ پوری ٹیم کھیل کے تینوں شعبوں بیٹنگ، فیلڈنگ، باؤلنگ میں اچھی پرفارمنس دکھارہی ہے، بالخصوص نوجوان کھلاڑیوں نے مختصر عرصے میں اپنی صلاحیتوں کو منوایا۔

کپتان سرفراز احمد کا کہنا تھا کہ عالمی رینکنگ کی اہمیت اپنی جگہ مگر ہماری توجہ سیریز جیتنے پر ہے، جب میں نے ٹیم کی قیادت سنبھالی تو ہماری ساتویں پوزیشن تھی۔

مزید پڑھیں: کوشش کرتا ہوں اپنی پرفارمنس سے میچ جتواؤں‘ سرفرازاحمد

قومی کرکٹ ٹیم کے کپتان کا مزید کہنا تھا کہ ٹی 20 میں کوئی بھی ٹیم آسان حریف نہیں ہوتی کیونکہ مختصر اوورز کے میچ میں کسی بھی وقت کھیل کا پانسہ پلٹ سکتا ہے، ہم بہترین پلیئنگ الیون کے ساتھ میدان میں آئیں گے۔

واضح رہے کہ قومی کرکٹ ٹیم ہرارے میں موجود ہے جہاں وہ آسٹریلیا اور زمبابوے کے درمیان ٹرائنگولر ٹی ٹوئنٹی سیریز کھیلے گی، ایونٹ کا آغاز یکم جولائی سے ہوگا جب کہ فائنل 8 جولائی بروز اتوار کھیلا جائے گا۔

اسے بھی پڑھیں: دورہ زمبابوے کے لیے کوئی پریشر نہیں، شاداب خان

ٹرائنگولر سیریز کے بعد قومی ٹیم زمبابوے سے پانچ ون ڈے میچز پر مشتمل سیریز کھیلے گی جس کا آغاز 13 جولائی سے ہوگا، پانچواں اور آخری ون ڈے میچ 22 جولائی بروز اتوار کو کھیلا جائے گا۔

خبر کے بارے میں اپنی رائے کا اظہار کمنٹس میں کریں‘ مذکورہ معلومات کو زیادہ سے زیادہ لوگوں تک پہنچانے کےلیے سوشل میڈیا پرشیئر کریں