ARYNews.tv | Urdu – Har Lamha Bakhabar

Tag: سرمایہ کاری

سرمایہ کاری کا سادہ مطلب ہے کہ آپ اپنے موجودہ وسائل (مثلاً رقم) کو مستقبل میں زیادہ منافع کمانے کے لیے استعمال کریں۔ یہ ایک ایسا عمل ہے جس میں آپ اپنے پیسے کو کسی ایسی چیز میں لگاتے ہیں جس سے آپ کو مستقبل میں زیادہ پیسہ ملنے کی امید ہو۔

  • مستقبل کے لیے بچت: سرمایہ کاری آپ کو مستقبل کے لیے پیسہ بچانے کا ایک اچھا طریقہ فراہم کرتی ہے۔
  • مہنگائی سے بچاؤ:  آپ اپنے پیسے کی قدر کو مہنگائی سے بچا سکتے ہیں۔
  • آمدن کا اضافہ: آپ کی آمدن میں اضافہ ہو سکتا ہے۔
  • مالی آزادی: سرمایہ کاری آپ کو مالی آزادی حاصل کرنے میں مدد کر سکتی ہے۔
  • بزدار حکومت کا پنجاب میں اربوں روپے کی سرمایہ کاری کے لیے بڑا قدم

    بزدار حکومت کا پنجاب میں اربوں روپے کی سرمایہ کاری کے لیے بڑا قدم

    لاہور: پنجاب حکومت نے سرمایہ کاری کے فروغ کے پیش نظر صوبے میں سیمنٹ فیکٹریز لگانے کے لیے مختلف محکموں کو این او سی کا اجرا آسان بنا دیا۔

    اے آر وائی نیوز کے مطابق آج وزیر اعلیٰ پنجاب عثمان بزدار کی زیر صدارت اعلیٰ سطح اجلاس منعقد ہوا، جس میں وزیر اعلیٰ کو بریفنگ دی گئی کہ نئے سیمنٹ پلانٹ لگانے کے لیے 23 درخواستیں موصول ہوئی ہیں جن میں سے 5 سیمنٹ پلانٹ لگانے کے لیے این او سی اگلے ماہ جاری کر دیے جائیں گے، جب کہ دیگر درخواستوں پر بھی فوری کارروائی شروع کر دی گئی ہے۔

    بریفنگ میں بتایا گیا کہ سیمنٹ پلانٹ پر تقریباً 40،30 ارب روپے لاگت آتی ہے، فیکٹریاں لگانے کے لیے این او سی کے اجرا کو ٹائم لائن سے منسلک کر دیا گیا ہے، اجلاس میں غیر استعمال شدہ مائننگ لیز کے حوالے سے قواعد و ضوابط میں تبدیلی کا بھی فیصلہ کیا گیا۔

    وزیراعلیٰ پنجاب نے نرسوں کے سروس اسٹرکچر کو اپ گریڈ کرنے کی منظوری دے دی

    وزیر اعلیٰ عثمان بزدار نے کہا کہ سرمایہ کاروں کے لیے ہر طرح کی آسانیاں پیدا کریں گے، این او سی جاری کرنے کے طریقہ کار کو مزید تیز کیا جائے، سرمایہ کارو ں کے لیے قواعد و ضوابط آسان بنائے جائیں۔

    وزیر اعلیٰ نے این او سی کے اجرا کے حوالے سے پیش رفت پر اظہار اطمینان کیا، اور محکمہ صنعت و دیگر متعلقہ محکموں کی کارکردگی کو سراہا، اجلاس میں سیکریٹری لوکل گورنمنٹ کی سربراہی میں اسٹیرنگ کمیٹی تشکیل دینے کی بھی ہدایت کی گئی جو این او سی کے اجرا کے حوالے سےعمل کا جائزہ لے گی۔

    یہ کمیٹی فیکٹریز لگانے کے لیے این او سی کے بر وقت اجرا کو یقینی بنائے گی، وزیر اعلیٰ کا کہنا تھا کہ صنعتیں لگیں گی تو سرمایہ کاری آئے گی، نئی سرمایہ کاری سے روزگار کے بے پناہ مواقع پیدا ہوں گے۔

  • سستی بجلی کی فراہمی، عالمی بینک پاکستان کو 45 کروڑ ڈالر دے گا

    سستی بجلی کی فراہمی، عالمی بینک پاکستان کو 45 کروڑ ڈالر دے گا

    اسلام آباد : عالمی بینک نے پاکستان میں متبادل توانائی کے منصوبوں کے لئے45 کروڑ ڈالر فنڈنگ کی منظوری دے دی، متبادل توانائی کے منصوبوں سے مہنگے ایندھن کی درآمد پر پاکستان کا انحصار کم ہوگا۔

    تفصیلات کے مطابق عالمی بینک پاکستان میں متبادل توانائی کے منصوبوں میں سرمایہ کاری کیلیے پر عزم ہے، عالمی بینک کے ایگزیکیٹو بورڈ آف ڈائریکٹرز نے پاکستان میں متبادل توانائی کے منصوبوں کے لئے پینتالیس کروڑ ڈالر فنڈنگ کی منظوری دے دی۔

    اس رقم سے خیبر پختونخوا کے پن بجلی اور شمسی توانائی کے منصوبوں میں سرمایہ کاری کی جائے گی، متبادل توانائی کے منصوبوں سے سستی اور ماحول دوست بجلی کی فراہمی یقینی بنائی جائے گی، متبادل توانائی کے منصوبوں سے مہنگے ایندھن کی درآمد پر پاکستان کا انحصار کم ہوگا۔

    عالمی بینک کے پاکستان کے لئے کنٹری ڈائریکٹر کا کہنا ہے کہ ان منصوبوں سے پاکستان کو گرین ہاؤس گیس کے اخراج میں کمی اور موسمیاتی تبدیلیوں سے لڑنے میں مدد ملے گی۔

  • معاشی بحران کے دنوں میں سعودی شہری کس شے میں سرمایہ کاری کر رہے ہیں؟

    معاشی بحران کے دنوں میں سعودی شہری کس شے میں سرمایہ کاری کر رہے ہیں؟

    ریاض: سعودی عرب میں ٹیکس میں اضافے کے باوجود سونے میں سرمایہ کاری کے رجحان میں اضافہ دیکھا جارہا ہے، لاک ڈاؤن ختم ہوتے ہی سعودی شہریوں کی بڑی تعداد نے سونا خریدنے میں دلچسپی ظاہر کی۔

    سعودی ویب سائٹ کے مطابق کرونا وائرس کی وجہ سے معاشی بحران کے دنوں میں اور سعودی عرب میں ٹیکس میں اضافے کے باوجود محفوظ سرمایہ کاری کے لیے سونے کو ترجیح دی جارہی ہے۔

    سعودی عرب میں سونے کے کاروباری صلاح سالم العماری کا کہنا ہے کہ کرونا وائرس کی وجہ سے رواں سال سونے کی عالمی منڈی نمایاں طور پر متاثر ہوئی تاہم اس دوران سعودی عرب میں ہماری حکومت اپنے عوام کے شانہ بشانہ کھڑی رہی اور مختلف انشورنس پروگراموں کے ذریعے مدد کی۔

    صلاح سالم کا کہنا ہے کہ لاک ڈاؤن کے دنوں میں سونے کی فروخت میں کمی آئی تھی تاہم پابندیوں میں نرمی آنے کے بعد عوام نے سونا خریدنے میں انتہائی دلچسپی ظاہر کی اور بہت سارے لوگوں نے سرمایہ کاری کے لیے خالص سونے کے ساتھ سونے کے سکے بھی خریدے۔

    ان کا کہنا ہے کہ میرا تجربہ یہ کہتا ہے کہ سونے کی قیمت میں اضافے کے باوجود لوگوں کو محفوظ سرمایہ کاری کے طور پر سونا خریدنا چاہیئے۔

    صلاح کے مطابق چین اور امریکا کے مابین تجارتی تنازعات عالمی معیشت کو کمزور کردیں گے جس سے بین الاقوامی اسٹاک میں کرنسی کی قدر میں کمی اور سونے کی قیمت میں نمایاں اضافہ ہوسکتا ہے۔

    انہوں نے مزید کہا کہ بحران کے دنوں کے لیے لوگوں میں اسٹاک مارکیٹ کے شیئرز اور بانڈز کے مقابلے میں سونے کو ایک محفوظ سرمایہ کاری سمجھنے کا رحجان پایا جاتا ہے۔

    صلاح کا کہنا تھا کہ اس وقت عالمی مارکیٹ میں ایک اونس سونے کی قیمت 1 ہزار 810 ڈالر تک پہنچ چکی ہے اور سنہ 2020 کے اختتام سے قبل یہ قیمت 2 ہزار ڈالر فی اونس ہوجانے کا امکان ہے۔

  • سرمایہ کاری پر مارک اپ، کاروباری افراد کو بڑی سہولت مل گئی

    سرمایہ کاری پر مارک اپ، کاروباری افراد کو بڑی سہولت مل گئی

    کراچی : اسٹیٹ بینک آف پاکستان نے سرمایہ کاری پر مارک اپ سات فیصد سے کم کر کے پانچ فیصد کر دیا، فیصلہ بزنس کمیونٹی کی طویل مدت سرمایہ کاری کیلئے کیا گیا۔

    تفصیلات کے مطابق اسٹیٹ بینک آف پاکستان نے سماجیرابطے کی ویب سائٹ ٹوئٹر پر جاری بیان میں کہا کہ ٹی ای آر ایف کے تحت سرمایہ کاری پر مارک اپ سات فیصد سے کم کر کے پانچ فیصد کر دیا ہے جبکہ نان ٹیکسٹائل سیکٹر کیلئے لانگ ٹرم فنانسنگ پر بھی مارک اپ چھ فیصد سے کم کرکے پانچ فیصد کردیا گیا۔

    اسٹیٹ بینک نے یہ فیصلہ بزنس کمیونٹی کی سہولت کے لئے طویل مدتی سرمایہ کاری کے فروغ کیلئے کیا، پہلے سےکھلی ایل سیزپر بھی ٹی ای آرایف کی سہولت میسر ہوگی جبکہ ٹی ای آرایف سہولت محدود مدت کیلئے تمام سیکٹرزمیں سرمایہ کاری پرہوگی۔

    گذشتہ روز بینک دولت پاکستان نے 30 ستمبر تک قرضوں کی اصل رقم کے التوا کی سہولت میں توسیع کا فیصلہ کیا تھا تاہم یہ سہولت صرف چھوٹے اور درمیانے کاروبار کی فنانسنگ، صارفی فنانسنگ، مکاناتی فنانس، زرعی فنانس اور مائیکرو فنانس کے لیے دستیاب ہوگی۔

  • قومی بچت اسکیموں میں سرمایہ کاری، بڑی پابندی عائد

    قومی بچت اسکیموں میں سرمایہ کاری، بڑی پابندی عائد

    اسلام آباد : وفاقی حکومت نے قومی بچت اسکیموں میں ادارہ جاتی سرمایہ کاری پر پابندی عائد کردی، پابندی اسٹیٹ بینک کی سفارشات کی بنیاد پرعائد کی گئی، جس کا اطلاق یکم جولائی سے ہوگیا ہے۔

    تفصیلات کے مطابق وفاق کی جانب سے نیشنل سیونگ اسکیموں میں ادارہ جاتی سرمایہ کاری پر پابندی عائد کردی گئی، عائد پابندی کا اطلاق یکم جولائی سے ہوگیا ہے۔

    وفاقی حکومت نے پابندی کے اطلاق سے متعلق نوٹیفکیشن جاری کردیا ، جس میں کہا گیا تمام محکموں کی جانب سے ہر قسم کی سیونگ اسکیمز میں سرمایہ کاری پر پابندی ہوگی ، ادارہ جاتی سرمایہ کاری پرپابندی اسٹیٹ بینک کی سفارشات کی بنیاد پرعائد کی گئی۔

    اس حوالے سے سینٹرل ڈائریکٹوریٹ آف نیشنل سیونگزکو بھی ضروری اقدامات کی ہدایات جاری کر دی گئی ہیں۔

    مزید پڑھیں : قومی بچت اسکیموں میں سرمایہ کاری کے حوالے سے بری خبر

    یاد رہے گذشتہ ماہ قومی بچت اسکیموں کےشرح منافع میں مزید کمی کر دی گئی تھی اور کہا گیا تھا کہ نئے ریٹ کا اطلاق 2 جون 2020 سے نئی سرمایہ کاری پرہوگا۔

    نوٹیفیکیشن کے مطابق ڈیفنس سرٹیفیکیٹ میں شرح منافع میں 0.49 فیصد کی کمی کردی گئی، جس کے بعد ڈیفنس سرٹیفکیٹ کا نیا شرح منافع 8.05 فیصد ہوگیا تھا۔

    حکومت کی جانب سے بہبود اور پنشن سرٹیفکیٹ پرمنافع کی شرح 0.48فیصدکم کرکے 9.84 فیصد اور سیونگ اکاؤنٹ پر منافع کی شرح 0.50 فیصد کم کرکے 6.50 فیصد کردی گئی تھی۔

    نوٹیفیکیشن میں بتایا گیا تھا کہ اسپیشل سیونگ سرٹیفکیٹ پر منافع 0.90 فیصد کم کرکے 7.10 فیصد کردیاگیا ہے جبکہ ریگولر انکم سرٹیفکیٹ پرمنافع کی شرح 0.84 فیصدکم کرکے7.44 فیصدکردی گئی۔

  • امریکی سرمایہ کاروں کی پاکستان آمد، سرمایہ کاری کے حوالے بڑی خبر آگئی

    امریکی سرمایہ کاروں کی پاکستان آمد، سرمایہ کاری کے حوالے بڑی خبر آگئی

    اسلام آباد : مشیر تجارت عبدالرزاق داؤد کا کہنا ہے امریکی سرمایہ کاروں کی پاکستان آمد سرمایہ کاری میں دلچسپی کا عندیہ ہے ،ادارے مزید معلومات کے لیے چیئرمین سرمایہ کاری سے رابطہ کرسکتے ہیں۔

    تفصیلات کے مطابق مشیر تجارت عبدالرزاق داؤد نے سماجی رابطے ویب سائٹ پر اپنے بیان میں کہا کہ امریکی نجی مالیاتی ترقیاتی سرمایہ کاروں کا وفد جلد پاکستان کادورہ کرے گا، وفدکی قیادت عالمی ترقیاتی مالیاتی کوآپریشن کے سی ای او ایڈم بوہیلرکریں گے، امریکی وفد کی آمد پاکستان میں سرمایہ کاری میں دلچسپی کا عندیہ ہے۔

    عبدالرزاق داؤد کا کہنا تھا کہ پاکستانی نجی شعبہ امریکی وفدکی آمد سے قبل تجاویز تیار کرے ، ادارےمزیدمعلومات کے لیے چیئرمین سرمایہ کاری سے رابطہ کرسکتے ہیں۔

    یاد رہے مشیر تجارت عبد الرزاق داؤد کا کہنا تھا کہ پاکستانی ہوم اپلائنسز عالمی معیار کے مطابق ہیں، پاکستان سے جلد ہوم اپلائنسز کی برآمد شروع ہوجائے گی 5روایتی برآمدات سے بڑھ کر برآمدات کے کیلئے کوشاں ہیں، انجینئرنگ اور فارما سوٹیکل کی برآمدات پر خصوصی ہے، بجٹ میں خام مال پر درآمدی ڈیوٹیز میں کمی اور ٹیرف پر نظرثانی کی گئی۔

    عبد الرزاق داؤد نے کہا تھا کہ انجینئرنگ اور ہوم اپلائنسز کی مصنوعات عالمی معیار کے مطابق ہیں، موبائل مینوفیکچرنگ پالیسی سے بھی برآمدات میں اضافہ متوقع ہے۔

  • چین کا سرمایہ کاری کے حوالے سے پاکستان کیلیے بڑا اعلان

    چین کا سرمایہ کاری کے حوالے سے پاکستان کیلیے بڑا اعلان

    اسلام آباد: چینی سفیر ژاؤ جنگ نے کہا ہے کہ چینی عوام اپنے پاکستانی بھائیوں کےشانہ بشانہ ہیں، چین مختلف ترقیاتی منصوبوں میں اپنی سرمایہ کاری کو مزید بڑھائے گا۔

    تفصیلات کے مطابق مشیر خزانہ ڈاکٹر عبدالحفیظ شیخ سے چینی سفیر ژاؤ جنگ کی ملاقات ہوئی ، ملاقات میں باہمی دلچسپی اور تعاون کے امور سمیت کورونا کے عالمی سطح پرمعیشت اورسوشل اثرات پر بھی تبادلہ خیال کیا گیا۔

    مشیر خزانہ نے چین کےبھرپوراورغیرمشروط تعاون پرچینی سفیر سےاظہارتشکر کیا اور کورونا پرروک تھام کیلئے حکومت کے اقدامات پر روشنی ڈالی، کم آمدنی والے طبقے سمیت مختلف شعبوں کیلئےدیےگئے پیکج پر بھی بات چیت کی۔

    مشیر خزانہ ڈاکٹر عبدالحفیظ شیخ نے کہا سی پیک دونوں ممالک کے مثالی تعلقات کا منہ بولتا ثبوت ہے، منصوبے سے خطےمیں ترقی اورخوشحالی کا نیا دور شروع ہوگا، سی پیک کےمشترکہ مقاصد کا حصول یقینی بنایا جائے گا۔

    اس موقع پر چینی سفیر کا کہنا تھا کہ چینی عوام اپنےپاکستانی بھائیوں کےشانہ بشانہ ہیں، چین مختلف ترقیاتی منصوبوں میں اپنی سرمایہ کاری کو مزید بڑھائے گا۔

  • وزیر اعظم کی کامیابی، پاکستان سرمایہ کاروں کے لیے پرکشش ترین ملک قرار

    وزیر اعظم کی کامیابی، پاکستان سرمایہ کاروں کے لیے پرکشش ترین ملک قرار

    لندن: کاروبار میں آسانی کے لیے حکومت پاکستان کی کوششوں کا عالمی سطح پر اعتراف کیا جانے لگا ہے، پاکستان کو سرمایہ کاروں کے لیے پرکشش ترین ملک قرار دے دیا گیا۔

    تفصیلات کے مطابق برطانوی اخبار فنانشل ٹائمز نے پاکستان کو سرمایہ کاروں کے لیے ابھرتی ہوئی مارکیٹ قرار دے دیا، فنانشل ٹائمز نے لکھا ہے کہ 2018 کے عام انتخابات میں عمران خان کی کامیابی کے بعد پاکستان کے مجموعی آؤٹ لک میں نمایاں بہتری آئی ہے۔

    معروف برطانوی اخبار نے لکھا کہ مختصر عرصے میں پاکستان میں معاشی پالیسیوں میں قابل ذکر بہتری ہوئی، کاروباری اور معاشی پالیسیوں میں نمایاں تبدیلیوں کے باعث پاکستان کا مجموعی آؤٹ لک بھی بہتر ہوا۔

    اخبار کے مطابق نئی قیادت کے تحت پاکستان کے اسٹیٹ بینک میں بھی بنیادی اصلاحات کی گئیں، جن کے ذریعے اسٹیٹ بینک کو جدید مرکزی بینک کے سانچے میں ڈھالا جا چکا ہے۔

    عمران خان کے ایک سالہ اقتدار میں پاکستان عالمی پلیئر کے طورپر سامنے آیا: برطانوی اخبار

    اخبار نے یہ بھی لکھا ہے کہ سرمایہ کاروں کو پاکستان جیسی نئی ابھرتی ہوئی مارکیٹوں سے پیچھے نہیں ہٹنا چاہیے۔

    یاد رہے کہ گزشتہ برس برطانوی اخبار انڈیپینڈنٹ نے عالمی سطح پر پاکستان کے کردار کا تجزیہ کرتے ہوئے لکھا تھا کہ عمران خان کے ایک سالہ دور اقتدار میں پاکستان عالمی پلیئر کے طور پر سامنے آیا ہے۔

    تجزیے میں کہا گیا تھا کہ پاکستان کو ورثے میں نامساعد حالات اور ابتر معاشی صورت حال ملی، تنقید کے باوجود عمران خان ملک کو آگے لے جانے میں کامیاب نظر آئے، ملک کی تقدیر بدلنے کے لیے عمران خان نے کئی اقدامات کیے، وہ ان اقدامات پر تنقید کی بجائے تعریف کے مستحق ہیں۔

  • قومی بچت اسکیموں میں سرمایہ کاری کے حوالے سے بری خبر

    قومی بچت اسکیموں میں سرمایہ کاری کے حوالے سے بری خبر

    اسلام آباد: حکومت پاکستان نے نیشنل سیونگ اسکیم سرٹیفکیٹ کےمنافع کی شرح مزید کم کردی، نئے ریٹ کا اطلاق آج سے نئی سرمایہ کاری پر اطلاق ہوگا۔

    تفصیلات کے مطابق قومی بچت اسکیموں کےشرح منافع میں مزید کمی کر دی گئی اور ‌‌اس حوالے سے وزارت خزانہ نے نوٹیفیکیشن جاری کردیا، جس میں کہا گیا کہ نئے ریٹ کا اطلاق 2 جون 2020 سے نئی سرمایہ کاری پر ہوگا۔

    نوٹیفیکیشن کے مطابق ڈیفنس سرٹیفیکیٹ میں شرح منافع میں 0.49 فیصد کی کمی کردی گئی ہے، جس کے بعد ڈیفنس سرٹیفکیٹ کا نیا شرح منافع 8.05 فیصد ہوگیا ہے۔

    حکومت کی جانب سے بہبود اور پنشن سرٹیفکیٹ پرمنافع کی شرح 0.48فیصدکم کرکے 9.84 فیصد اور سیونگ اکاؤنٹ پر منافع کی شرح 0.50 فیصد کم کرکے 6.50 فیصد کردی گئی۔

    نوٹیفیکیشن میں بتایا گیا کہ اسپیشل سیونگ سرٹیفکیٹ پر منافع 0.90 فیصد کم کرکے 7.10 فیصد کردیاگیا ہے جبکہ ریگولر انکم سرٹیفکیٹ پرمنافع کی شرح 0.84 فیصدکم کرکے7.44 فیصدکردی گئی ہے۔

    ادارہ قومی بچت کا کہنا ہے کہ شہدا فیملی ویلفیئر اکاونٹ کی شرح منافع 9.84 فیصد کر دی گئی، اس سے پہلے شہدا ویلفیئر اکاونٹ کی شرح منافع 10.32 فیصد تھی جبکہ پینشن بینیفٹ اکاؤنٹ کی شرح منافع بھی 9.84 فیصد مقرر کردی۔

  • سعودی عرب: کرونا وائرس بحران کے باوجود 50 ارب ریال کی سرمایہ کاری

    سعودی عرب: کرونا وائرس بحران کے باوجود 50 ارب ریال کی سرمایہ کاری

    ریاض: کرونا وائرس کے بحران کی وجہ سے دنیا بھر کی معیشتوں کو شدید نقصان پہنچا ہے تاہم اس کے باوجود سعودی عرب میں سال رواں کے آغاز سے اب تک 50 ارب ریال سے زائد سرمایہ کاری کی جاچکی ہے۔

    سعودی ویب سائٹ کے مطابق سعودی عرب میں الجبیل اور ینبع رائل کمیشن کے چیئرمین انجینیئر عبداللہ بن ابراہیم السعدان کا کہنا ہے کہ نئے کرونا وائرس کی وبا کے باوجود ینبع اور الجبیل میں 2020 کی پہلی سہ ماہی کے دوران 50 ارب ریال سے زیادہ کا سرمایہ آچکا ہے۔

    السعدان نے یہ بات سعودی ایوان ہائے صنعت و تجارت کونسل کے ماتحت صنعتی کمیٹی کے ارکان اور رائل کمیشن سٹیز کے ایگزیکٹیو ڈائریکٹر کے ساتھ آن لائن اجلاس کے دوران بتائی۔

    انجینیئر عبد اللہ بن ابراہیم السعدان نے کہا کہ سعودی حکومت نے کرونا کی وبا سے نمٹنے، اسے پھیلنے سے روکنے اور مقامی شہریوں و تارکین وطن کو اس سے بچانے کے لیے پیشگی حفاظتی اقدامات کیے۔

    انہوں نے کہا کہ دنیا بھر کے ملکوں اور عالمی تنظیموں نے کرونا کی وبا سے نمٹنے کے سلسلے میں سعودی اقدامات پر پسندیدگی کا اظہار کیا ہے۔

    السعدان نے مزید کہا کہ جدہ اسلامی بندرگاہ اور مشرقی افریقہ کی بندرگاہوں سے ینبع کی انڈسٹریل سٹی پورٹ کے درمیان جہاز رانی سے سرمایہ کاروں کو بڑا فائدہ ہوگا، اس کے اثرات بہت جلد نظر آنے لگیں گے۔

    ان کے مطابق سرمایہ کار اپنی مارکیٹوں پر آسانی اور تیزی سے پہنچ سکیں گے اور لاگت بھی کم آئے گی۔

    الجبیل اور ینبع رائل کمیشن کے چیئرمین نے بتایا کہ جازان بندرگاہ تیاری کے آخری مرحلے میں ہے اور آئندہ برس کے دوران کام کرنے لگے گی۔ سعودی آرامکو یہ منصوبہ تیزی سے مکمل کر رہی ہے۔

    صنعتی علاقوں میں کام کرنے والے ورکرز کے حوالے سے انہوں نے کہا کہ رائل کمیشن میں لیبر سٹیز منصوبہ بندی کے تحت ہیں تاہم لیبر سٹیز سے باہر مقیم ورکرز کے حوالے سے کرونا بحران کے دوران مشکلات پیش آئیں۔

    السعدان نے مزید بتایا کہ رائل کمیشن نے کرونا وبا کے آغاز ہی میں اسپیشل کمیٹیاں تشکیل دے کر ورکرز کی رہائش اور انہیں فیکٹریوں میں لانے لے جانے کے مسائل سائنسی بنیادوں پر حل کر لیے تھے، رہائشی مراکز میں کرونا وائرس سے بچاؤ کے انتظامات تسلی بخش ہیں۔